យុទ្ធនាការឃោសនាបោះឆ្នោតព្រឹទ្ធសភាមិនសូវមានការចាប់អារម្មណ៍
យុទ្ធនាការឃោសនារកសំឡេងឆ្នោតសម្រាប់ការបោះឆ្នោតជ្រើសរើសសមាជិកសភានីតិកាលទី៣កំពុងតែប្រព្រឹត្តទៅដោយមិនសូវជាមានភាពទាក់ទាញប៉ុន្មានឡើយ។ យុទ្ធនាការដែលបានចាប់ផ្តើមកាលពីថ្ងៃសៅរ៍ម្សិលមិញ នឹងត្រូវបញ្ចប់នៅថ្ងៃទី២៧មករាខាងមុខ មានតែគណបក្សពីរប៉ុណ្ណោះ ដែលចូលរួមប្រកួតគឺ គណបក្សប្រជាជនកម្ពុជា និងគណបក្សសម រង្ស៊ី។ គណបក្សប្រជាជនកម្ពុជាបានផ្តើមការឃោសនាយ៉ាងអធិកអធម តែគណបក្សសម រង្ស៊ី វិញបានរៀបចំការឃោសនាបែបស្ងាត់ស្ងៀមតាមរយៈការជួបជុំនៅក្នុងទីស្នាក់ការរបស់ខ្លួនតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នេះគឺជាថ្ងៃទី២ហើយនៃយុទ្ធនាការឃោសនារកសំឡេងឆ្នោតសម្រាប់ការបោះឆ្នោតជ្រើសរើសសមាជិកព្រឹទ្ធសភានីតិកាលទី៣ដែលនឹងប្រព្រឹត្តទៅនៅចុងខែមករានេះ។ គណបក្សប្រជាជនកម្ពុជាបានផ្តើមយុទ្ធនាការយ៉ាងអធិកអធមមួយកាលពីថ្ងៃម្សិលមិញដែលជាថ្ងៃបើកឆាក និងចំថ្ងៃ៧មករាដែលគណបក្សនេះរម្លឹកខួប៣៣ឆ្នាំនៃជ័យជម្នះលើពួកខ្មែរក្រហម។ ប៉ុន្តែ គណបក្សសម រង្ស៊ីដែលជាគូប្រកួតតែមួយគត់ក្នុងការបោះឆ្នោតនេះមិនបានផ្តល់តម្លៃដល់ការឃោសនាទេ។ គណបក្សនេះបានរៀបចំពិធីឃោសនាផ្ទៃក្នុងតាមរយៈការជួបជុំនៅតាមទីស្នាក់ការគណបក្សរបស់ខ្លួន ដោយមានការចូលរួមពីលោកសម រង្ស៊ី ប្រធានគណបក្ស តាមរយៈ Video Conference ។ ពិធីជួបជុំបែបនេះបានផ្តើមធ្វើចាប់ពីថ្ងៃអាទិត្យនេះទៅហើយ។
ការបោះឆ្នោតជ្រើសរើសសមាជិកព្រឹទ្ធសភានៅពេលនេះមានតែគណបក្សពីរប៉ុណ្ណោះដែលចូលរួមគឺគណបក្សប្រជាជនកម្ពុជា និងគណបក្សសម រង្ស៊ី។ ដោយឡែក គណបក្សហ៊្វុនស៊ិនប៉ិចនិងគណបក្ស នរោត្តម រណឬទ្ធិ ដែលមានតំណាងរាស្ត្រ និងសមាជិកក្រុមប្រឹក្សាឃុំសង្កាត់តិចតួចនោះមិនចូលរួមបោះឆ្នោតទេពីព្រោះតែគ្មានសំឡេងគ្រប់គ្រាន់ដើម្បីទទួលបានកៅអី។ យ៉ាងណាក៏ដោយ គេរំពឹងថា តំណាងរាស្ត្រ និងសមាជិកក្រុមប្រឹក្សាឃុំសង្កាត់របស់គណបក្សទាំងពីរនឹងបោះឆ្នោតឲ្យគណបក្សប្រជាជនកម្ពុជាដែលជាសម្ពន្ធមិត្តរបស់ខ្លួន។
ការបោះឆ្នោតជ្រើសរើសសមាជិកព្រឹទ្ធសភានីតិកាលទី៣នេះនឹងប្រព្រឹត្តទៅនៅថ្ងៃទី២៩មករាខាងមុខដោយមានតែសមាជិកសភា និងសមាជិកក្រុមប្រឹក្សាឃុំសង្កាត់ប៉ុណ្ណោះជាអ្នកមានសិទ្ធិបោះឆ្នោត។ ដូច្នេះ លទ្ធផលបោះឆ្នោតនេះ ត្រូវបានគេដឹងជាមុនរួចជាស្រេច។ គណបក្សសម រង្ស៊ី ត្រូវគេរំពឹងថា នឹងទទួលបាន១១កៅអី និងគណបក្សប្រជាជនបាន៤៦កៅអីក្នុងចំណោមកៅអី៥៧ដែលចេញពីការបោះឆ្នោត។ តួលេខនេះត្រូវបានគេគណនាទៅតាមចំនួនអ្នកបោះឆ្នោតរបស់គណបក្សនីមួយៗ។ ក្រៅពីនោះ មានសមាជិកព្រឹទ្ធសភា៤រូបទៀតកើតចេញពីការតែងតាំងរបស់រដ្ឋសភា (២រូប) និងរបស់ព្រះមហាក្សត្រ(២រូប) ដែលធ្វើឲ្យសមាជិកព្រឹទ្ធសភាទាំងអស់មានចំនួនសរុប៦១រូប។
យ៉ាងណាក៏ដោយ លទ្ធផលនេះអាចមានការប្រែប្រួលក្នុងករណីដែលអ្នកបោះឆ្នោតមួយចំនួនមិនបោះឲ្យគណបក្សរបស់ខ្លួន តែបែរជាបោះឲ្យគណបក្សផ្សេងទៅវិញនោះ។ កាលពីពេលថ្មីៗនេះ គណបក្សសម រង្ស៊ី បានតម្រូវឲ្យអង្គបោះឆ្នោតរបស់ខ្លួនសច្ចាប្រណិធានដើម្បីធានាថាពួកគេពិតជាបោះឆ្នោតឲ្យគណបក្សរបស់ខ្លួន។ ការបោះឆ្នោតតាមបែបអសកលនេះហើយដែលធ្វើឲ្យការឃោសនាមិនសូវមានភាពទាក់ទាញឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ