លោក ជា ស៊ីម ជាប់ឆ្នោតជាប្រធានព្រឹទ្ធសភាអាណត្តិថ្មី
ព្រឹទ្ធសភានីតិកាលទី៣ ដែលកើតចេញពីការបោះឆ្នោតកាលពីថ្ងៃទី២៩មករា បានបើកសម័យប្រជុំលើកដំបូងនៅព្រឹកថ្ងៃសៅរ៍នេះក្រោមព្រះរាជាធិបតីភាពរបស់ព្រះមហាក្សត្រសម្តេចព្រះបរមនាថ នរោត្តម សីហមុនី។ ព្រឹទ្ធសភាក៏បានដំណើរការបោះឆ្នោតជ្រើសរើសក្បាលម៉ាស៊ីនដឹកនាំរបស់ខ្លួនរួចរាល់ហើយដែរ។ លោក ជា ស៊ីម ប្រធានគណបក្សប្រជាជនកម្ពុជាត្រូវបានជ្រើសតាំងជាប្រធានព្រឹទ្ធសភាជាថ្មីទៀត ខណៈដែលគណបក្សសម រង្ស៊ី ដែលមាន១១កៅអីមិនបានទទួលតួនាទីដឹកនាំណាមួយនៅក្នុងស្ថាប័ននីតិបញ្ញត្តិកំពូលនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដូចការគ្រោងទុក ព្រឹទ្ធសភានីតិកាលទី៣ បានបើកសម័យប្រជុំដំបូងរបស់ខ្លួននៅព្រឹកថ្ងៃសៅរ៍នេះ ក្រោមព្រះរាជាធិបតីភាពរបស់ព្រះមហាក្សត្រ សម្តេចព្រះបរមនាថ នរោត្តម សីហមុនី និងដោយមានវត្តមានរបស់លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន ប្រមុខរដ្ឋាភិបាលកម្ពុជា។ កិច្ចប្រជុំលើកដំបូងនេះត្រូវបានរៀបចំធ្វើឡើងដើម្បីជាការបើកសម្ពោធស្ថាប័នព្រឹទ្ធសភានីតិកាលថ្មីផង និងដើម្បីជ្រើសរើសក្បាលម៉ាស៊ីនដឹកនាំស្ថាប័ននីតិបញ្ញត្តិកំពូលនេះផង។
សម្តេច ជា ស៊ីម ប្រធានគណបក្សប្រជាជនកម្ពុជាត្រូវបានសមាជិកទាំងអស់ជ្រើសរើសជាប្រធានព្រឹទ្ធសភាអាណត្តិថ្មីបន្តទៀត និងអមដោយឥស្សរជនគណបក្សកាន់អំណាចពីរនាក់ទៀតគឺលោក សាយ ឈុំ អនុប្រធានទី១ និងលោក ទេព ងន អនុប្រធានទី២នៃព្រឹទ្ធសភា។ លោក គង់ គាំ បេក្ខភាពអនុប្រធានទី២របស់គណបក្ស សម រង្ស៊ី មិនបានជាប់ឆ្នោតទេដោយទទួលបានសំឡេងគាំទ្រតែ១១សំឡេង ទល់នឹង៤៨សំឡេងរបស់លោក ទេព ងន។
សូមបញ្ជាក់ថា សមាជិកព្រឹទ្ធសភាទាំងអស់មានចំនួនសរុប ៦១ រូបក្នុងនោះ ៥៧រូបកើតចេញពីការបោះឆ្នោតតាមបែបអសកលកាលពីថ្ងៃទី២៩មករាឆ្នាំ២០១២។ លទ្ធផលនៃការបោះឆ្នោតបានបង្ហាញថា គណបក្សប្រជាជនកម្ពុជាបានទទួល៤៦កៅអី និងគណបក្សសម រង្ស៊ីបាន១១កៅអី។ ចំណែកឯសមាជិក៤នាក់ទៀតគឺលោក អ៊ុំ ម៉ាន្នូរីន និងលោកអៀវ បណ្ណាការ ត្រូវបានតែងតាំងដោយព្រះមហាក្សត្រ ចំណែកឯព្រះអង្គម្ចាស់ក្សត្រីសម្តេចព្រះរៀម នរោត្តម បុប្ផាទេវី និង ព្រះអង្គម្ចាស់ស៊ីសុវត្ថិ ជីវន័មុនីរក្ស ត្រូវបានជ្រើសតាំងដោយរដ្ឋសភាជាតិ។
គណបក្សសម រង្ស៊ី បានទាមទារកាន់កាប់តំណែងអនុប្រធានទី២នៃព្រឹទ្ធសភា និងប្រធានគណៈកម្មការចំនួន៤ក្នុងចំណោមគណៈកម្មការ៩របស់ព្រឹទ្ធសភា ព្រមទាំងតំណែងក្នុងអគ្គលេខាធិការដ្ឋានមួយចំនួនទៀតផងដែរ។ ប៉ុន្តែ ដោយហេតុថា គណបក្សប្រជាជនកម្ពុជាមានសំឡេងភាគច្រើនលើសលប់ គេគ្មានសង្ឃឹមថាបេក្ខភាពគណបក្សសម រង្ស៊ី ណាម្នាក់បានជាប់ឆ្នោតដើម្បីទទួលតំណែងណាមួយនោះឡើយ។
ក្រោយពីកិច្ចប្រជុំដំបូងបានបិទបញ្ចប់ សមាជិកព្រឹទ្ធសភាទាំងអស់បានធ្វើសច្ចាប្រណិធាននៅរសៀលថ្ងៃនេះដែរនៅក្នុងព្រះបរមរាជវាំងមុននឹងចូលបំពេញមុខងារជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ