ព្រះមហាក្សត្រកោះប្រជុំព្រឹទ្ធសភាអាណត្តិថ្មីនៅថ្ងៃទី២៤មីនា
ព្រះមហាក្សត្រសម្តេចព្រះបរមនាថ នរោត្តម សីហមុនី បានចេញលិខិតកោះប្រជុំសមាជិកព្រឹទ្ធសភា អាណត្តិថ្មី ទាំង ៦១ រូបឲ្យចូលរួមសម័យប្រជុំលើកដំបូងនៅថ្ងៃទី២៤ខែមីនា ឆ្នាំ២០១២ វេលាម៉ោង ៩ ព្រឹក។ កិច្ចប្រជុំព្រឹទ្ធសភាលើកដំបូងនោះ ដើម្បីប្រកាសសុពលភាព សមាជិកព្រឹទ្ធសភាទាំង ៦១រូប ព្រមទាំងបោះឆ្នោតជ្រើសតាំងប្រធាននិងអនុប្រធានទាំងពីរដែលជាក្បាលម៉ាស៊ីនដឹកនាំព្រឹទ្ធសភានីតិកាលទី៣ រយៈពេល៦ឆ្នាំចាប់ពីឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ព្រឹទ្ធសភាអាណត្តិថ្មីនឹងបើកសម័យប្រជុំលើកដំបូង ក្រោមព្រះរាជាធិបតីភាពព្រះមហាក្សត្រនាព្រឹកថ្ងៃសៅរ៍ ទី២៤ ខែមីនា ឆ្នាំ២០១២។ ថ្ងៃបើកសម័យប្រជុំព្រឹទ្ធសភាលើកដំបូង នាថ្ងៃសៅរ៍សប្តាហ៍ក្រោយនោះ នៅពេលព្រឹក ព្រះមហាក្សត្រនឹងថ្លែងព្រះរាជសុន្ទរកថាមួយ ទៅកាន់អង្គព្រឹទ្ធសភាថ្មី។ បន្ទាប់ពីពិធីថតរូបជាអនុស្សាវរីយ៍ ការបើកសម័យប្រជុំដំបូងរបស់ព្រឹទ្ធសភា នឹងធ្វើឡើងក្រោមអធិបតីភាពរបស់ព្រឹទ្ធបុរស។ ព្រឹទ្ធបុរស ដែលជាសមាជិកព្រឹទ្ធសភា មានអាយុច្រើនជាងគេ គឺលោក អ៊ុំ ម៉ាន្នូរីន អាយុ ៨៨ ឆ្នាំ ត្រូវបានតែងតាំងដោយព្រះមហាក្សត្រ។
កិច្ចប្រជុំដឹកនាំដោយព្រឹទ្ធបុរស មានការប្រកាសសុពលភាពរបស់សមាជិកព្រឹទ្ធសភាទាំង ៦១ រូប និងការបោះឆ្នោតជ្រើសតាំងប្រធាន អនុប្រធានទី១ និងអនុប្រធានទី២ ព្រឹទ្ធសភា។ នៅម៉ោង ៤ រសៀល មានពិធីសច្ចាប្រណិធាននៅព្រះបរមរាជវាំង ចំពោះព្រះភ័ក្ត្រព្រះមហាក្សត្រដោយសមាជិកព្រឹទ្ធសភាថ្មីទាំង ៦១ រូប ត្រូវទៅធ្វើសច្ចាប្រណិធាន ដើម្បីចូលកាន់តំណែង ស្របតាមរដ្ឋធម្មនុញ្ញ។ នេះបើតាមការលើកឡើងរបស់លោក អ៊ុំ សារឹទ្ធ អគ្គលេខាធិការព្រឹទ្ធសភា។
លោក អ៊ុំ សារឹទ្ធ បានបន្ថែមថា កាលពីថ្ងៃទី១៣ ខែមីនា ឆ្នាំ២០១២ ព្រឹទ្ធបុរស លោក អ៊ុំ ម៉ាន្នូរីន បានធ្វើលិខិតទៅកាន់គណបក្សប្រជាជនកម្ពុជា គណបក្សសមរង្ស៊ី ព្រះបរមរាជវាំង និងរដ្ឋសភា ដើម្បីសុំឲ្យបញ្ជូនឈ្មោះបេក្ខជនប្រធាន និងអនុប្រធានព្រឹទ្ធសភាសម្រាប់ដាក់ឲ្យអង្គប្រជុំព្រឹទ្ធសភាលើកដំបូងបោះឆ្នោតជ្រើសតាំងនៅថ្ងៃទី២៤ ខែមីនាឆ្នាំ២០១២។
ឮតាមអគ្គលេខាធិការព្រឹទ្ធសភា មកដល់ថ្ងៃនេះ គណបក្សប្រជាជនកម្ពុជា បានឆ្លើយតបហើយថា គណបក្សប្រជាជនកម្ពុជា មានបេក្ខជន ៣ រូប ក្នុងនោះបេក្ខជនប្រធានព្រឹទ្ធសភា គឺលោកជាស៊ីម បេក្ខជនសម្រាប់តំណែងអនុប្រធានទី១ព្រឹទ្ធសភា គឺលោក សាយ ឈុំ និងអនុប្រធានទី២ លោក ទេព ងន។ ការបោះឆ្នោតជ្រើសតាំងថ្នាក់ដឹកនាំព្រឹទ្ធសភានោះធ្វើឡើងតាមសំឡេងគាំទ្រ ៥០ ភាគរយ បូក ១ ក្នុងចំណោមសមាជិកព្រឹទ្ធសភាសរុប ៦១ រូប។
សមាជិកព្រឹទ្ធសភា នីតិកាលទី៣រយៈពេល ៦ឆ្នាំ ចាប់ពីឆ្នាំ២០១២ ដល់ឆ្នាំ២០១៨ មានចំនួន ៦១ រូប។ ក្នុងនោះ សមាជិកព្រឹទ្ធសភា ៥៧ រូបបានមកពីការបោះឆ្នោតតាមលក្ខណៈអសកល កាលពីថ្ងៃទី២៩ ខែមករា ឆ្នាំ២០១២ ដោយគណបក្សប្រជាជនកម្ពុជា ទទួលបាន ៤៦ រូប និងគណបក្សសមរង្ស៊ី ទទួលបាន ១១ រូប។ ចំណែកសមាជិកព្រឹទ្ធសភា២រូបទៀត ត្រូវបានជ្រើសតាំងដោយព្រះមហាក្សត្រ គឺលោក អ៊ុំ ម៉ាន្នូរីន និងលោក អៀវ បណ្ណាការ។ រីឯសមាជិកព្រឹទ្ធសភា ២ រូបផ្សេងទៀត ត្រូវជ្រើសតាំងដោយរដ្ឋសភា នោះគឺសម្តេចរាជបុត្រីព្រះរៀម នរោត្តម បុប្ផាទេវី និងសម្តេច ស៊ីសុវត្ថិ ជីវ័នមុនីរ័ក្ស។
កាលពីចុងខែកុម្ភៈ គណបក្សសមរង្ស៊ី បានស្វែងរកការចរចាជាមុន ដើម្បីបែងចែកតួនាទីថ្នាក់ដឹកនាំព្រឹទ្ធសភា។ ក៏ប៉ុន្តែគណបក្សប្រជាជនកម្ពុជាបានបដិសេធ។ គណបក្សប្រជាជន បានសម្រេចរួចហើយថា នឹងដឹកនាំព្រឹទ្ធសភាដូចនៅរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ