ចិនពង្រឹងសន្តិសុខជុំវិញវត្តទីបេមួយនៅប៉ែកនិរតីនៃប្រទេស
អាជ្ញាធរចិនបានពង្រឹងសន្តិសុខក្នុងទីក្រុងអាបា(Aba) នៅប៉ែកនិរតីនៃប្រទេសក្រោយពីលោកសង្ឃទីបេពីរអង្គបានសាកល្បងដុតសម្លាប់ខ្លួនឯង កាលពីថ្ងៃចន្ទទី២៦កញ្ញាម្សិលមិញ។
ចុះផ្សាយនៅថ្ងៃ៖
ស្តាប់ - ០១:០២
រដ្ឋអំណាចចិនបារម្ភ ម្ល៉ោះហើយបានជាបង្កើនការប្រុងប្រយ័ត្ន ដោយបានបិទប្រព័ន្ធអ៊ីនធ័រណែតនិងប្រព័ន្ធផ្ញើសារតាមទូរស័ព្ទ ដាក់ពង្រាយនគរបាលនៅគ្រប់ច្រកល្ហក ក្នុងទីក្រុងអាបា(Aba) បិទផ្លូវដែលនាំទៅកាន់វត្តគីរទី(Kirti)។
គឺនៅវត្តគីរទីនេះហើយដែលកាលពីថ្ងៃចន្ទទី២៦កញ្ញាម្សិលមិញ លោកសង្ឃពីរអង្គដែលបានសាកល្បងដុតសម្លាប់ខ្លួនឯង ត្រូវបានប៉ូលិសសង្គ្រោះទាន់និងដឹកទៅកាន់មន្ទីរពេទ្យ។ ប៉ុន្តែ នៅពេលនេះ គេនៅមិនទាន់ដឹងថាតើលោកសង្ឃទាំងពីរអង្គបានសុគតបាត់ទៅហើយឬក៏នៅរស់ទេ។
គឺនៅវត្តគីរទីនេះហើយ ដែលកាលពីថ្ងៃទី១៦មីនា លោកសង្ឃមួយអង្គបានដុតសម្លាប់ខ្លួនឯង ដើម្បីប្រឆាំងនឹងការកាន់កាប់ទីបេដោយប្រទេសចិន និងដើម្បីរំឭកព្រឹត្តិការណ៍នៃការផ្តើមងើបបះបោរប្រឆាំងនឹងអាជ្ញាធរចិន នៅទីក្រុងឡាស់សា(Lhassa) ក្នុងឆ្នាំ២០០៨។
ប៉ុន្មានឆ្នាំចុងក្រោយនេះ អង្គការការពារសិទ្ធិមនុស្សអន្តរជាតិនានាបានចោទប្រទេសចិនថាកំពុងអនុវត្តនយោបាយប្រល័យវប្បធម៌ទីបេ តាមរយៈការបញ្ជូនជនជាតិចិនច្រើនឡើងៗ ទៅរស់នៅក្នុងដែនដីទីបេ និងតាមរយៈការហាមមិនឲ្យរៀន និងមិនឲ្យនិយាយភាសាទីបេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ