លោក ហ៊ុន សែន៖ បរិបទនៃការបោះឆ្នោតនៅម៉ាឡេស៊ី ដូចគ្នានឹងកម្ពុជា
នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានប្រៀបប្រដូចសម័យកាលបោះឆ្នោត នៅប្រទេសម៉ាឡេស៊ី ថាដូចគ្នាទៅនឹងស្ថានភាពបោះឆ្នោតនៅក្នុងប្រទេសកម្ពុជា។ នោះគឺបក្សប្រឆាំងលើកយកបញ្ហាពុករលួយ ការចោទប្រកាន់គ.ជ.ប. និងពាក់ព័ន្ធនឹងបញ្ជីឈ្មោះ ជាដើម។ រីឯប្រធានបទរបស់គណបក្សកាន់អំណាចវិញ ត្រូវបានលោកនាយករដ្ឋមន្ត្រី លើកឡើងថា លោកនាយករដ្ឋមន្ត្រីម៉ាឡេស៊ីបានប្រកាសពីការបន្តរក្សាសន្តិភាព ស្ថិរភាព និងការបន្តអភិវឌ្ឍន៍ប្រទេស ដូចគ្នាទៅនឹងប្រធានបទដែលគណបក្សប្រជាជនកម្ពុជា បានប្រកាស នៅមុនពេលបោះឆ្នោត ពេលនេះ។
ចុះផ្សាយនៅថ្ងៃ៖
ស្តាប់ - ០៣:២៦
ក្នុងពិធីសម្ពោធបើកការដ្ឋានសាងសង់កំណាត់ផ្លូវជាតិលេខ៤៤ នៅខេត្តកំពង់ស្ពឺ នាព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានប្រកាសផ្ទាល់មាត់ សាទរចំពោះជ័យជម្នះជាថ្មីរបស់នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ តាមរយៈការបោះឆ្នោត កាលពីថ្ងៃអាទិត្យម្សិលមិញ។
លោកនាយករដ្ឋមន្ត្រី ហ៊ុន សែន ក៏បានប្រដូចការបោះឆ្នោតនៅប្រទេសម៉ាឡេស៊ី កាលពីថ្ងៃអាទិត្យ ថាដូចគ្នាទៅនឹងស្ថានការណ៍បោះឆ្នោតនៅកម្ពុជា។ នោះគឺបក្សប្រឆាំងនៅម៉ាឡេស៊ីទាមទារឲ្យមានការផ្លាស់ប្តូរមេដឹកនាំ។ រីឯប្រធានបទឃោសនាបោះឆ្នោតក៏ដូចកម្ពុជា គឺបក្សប្រឆាំងលើកយកបញ្ហាពុករលួយ ជនបរទេសចូលរួមបោះឆ្នោត បក្សប្រឆាំងចោទប្រកាន់គ.ជ.ប. រឿងបញ្ជីឈ្មោះបោះឆ្នោត ទឹកថ្នាំជ្រលក់ម្រាមដៃ និងឈ្មោះខ្មោច ជាដើម។ រីឯប្រធានបទរបស់បក្សកាន់អំណាចវិញ គឺការប្រកាសពីការរក្សាសន្តិភាព ស្ថិរភាព និងបន្តការអភិវឌ្ឍន៍ប្រទេស។ ជាប្រធានបទដែលលោកនាយករដ្ឋមន្ត្រីអះអាងថា ដូចគ្នានឹងគោលនយោបាយរបស់គណបក្សប្រជាជនកម្ពុជារបស់លោក។
ជ័យជម្នះរបស់គណបក្សកាន់អំណាច នៅម៉ាឡេស៊ី ដែលបន្តឲ្យគណបក្ស Barisan Nasional (រណសិរ្សជាតិ) របស់លោកនាយករដ្ឋមន្ត្រី ណាជីប រ៉ាហ្សាក់ បន្តកាន់តំណែងតទៅទៀតនោះ ក៏ត្រូវបានលោកនាយករដ្ឋមន្ត្រី ហ៊ុន សែន ប្រកាសនៅថ្ងៃនេះថា លោកក៏នឹងបន្តដឹកនាំប្រទេសកម្ពុជារហូតដល់ឆ្នាំ២០២៣ ដែលពេលនោះ លោកមានអាយុ ៧៤ ឆ្នាំ។ ពោលគឺលោកធ្វើដូចមេដឹកនាំចិន និងវៀតណាម ស្របតាមការរិះគន់របស់បក្សប្រឆាំង។
នៅព្រឹកមិញ លោកនាយករដ្ឋមន្ត្រី ហ៊ុន សែន ក៏បានប្រកាសថា គណបក្សប្រឆាំងនៅកម្ពុជា មិនមានសិទ្ធិដើម្បីធ្វើវេតូ Veto ជំទាស់ មិនឲ្យគ.ជ.ប. រៀបចំការបោះឆ្នោតឡើយ។
លោកនាយករដ្ឋមន្ត្រី ហ៊ុន សែន ក៏បានប្រកាសថា ទោះជាមិនមានវត្តមានរបស់បក្សប្រឆាំង ក៏កម្ពុជាត្រូវរៀបចំការបោះឆ្នោត តាមកាលកំណត់ នៅខែកក្កដា។ ចំពោះការយឺតយ៉ាវរបស់បក្សប្រឆាំងក្នុងការដាក់បញ្ជីបេក្ខជនចុះឈ្មោះចូលរួមការបោះឆ្នោត ត្រូវបានលោកនាយករដ្ឋមន្ត្រីប្រកាសថា ដោយសារតែជម្លោះផ្ទៃក្នុងរវាងគណបក្សសមរង្ស៊ី និងគណបក្សសិទ្ធិមនុស្ស។ ប៉ុន្តែលោកនាយករដ្ឋមន្ត្រីអះអាងថា បក្សប្រឆាំងបានយកលេស ចាប់ពិរុទ្ធ តវ៉ាជំទាស់នឹង គ.ជ.ប. ដែលជាអាប៊ីតទៅវិញ។ តាមលោកនាយករដ្ឋមន្ត្រី បក្សប្រឆាំងកំពុងតែមានបញ្ហាផ្ទៃក្នុងលើការរៀបចំបេក្ខជន នៅខេត្តកំពង់ធំ សៀមរាប តាកែវ និងខេត្តកំពង់ស្ពឺ ជាដើម។
យ៉ាងណាក៏ដោយ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានប្រាប់អ្នកកាសែត នៅរសៀលថ្ងៃចន្ទនេះថា គណបក្សសង្គ្រោះជាតិនឹងចុះបញ្ជីបេក្ខជនឈរឈ្មោះបោះឆ្នោត ដាក់នៅគ.ជ.ប. ក្នុងសប្តាហ៍នេះ។ រីឯការពន្យារពេលមិនទាន់ចុះបញ្ជី មកពីគណបក្សប្រឆាំងចង់តវ៉ានឹងគ.ជ.ប. ពាក់ព័ន្ធនឹងបញ្ជីឈ្មោះអ្នកបោះឆ្នោតដែលសង្គមស៊ីវិល រកឃើញថាមិនប្រក្រតី និងបាត់ឈ្មោះអ្នកបោះឆ្នោតជាដើម។
ការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោតតំណាងរាស្ត្រ ចាប់ផ្តើមពីថ្ងៃទី២៩ ខែមេសា ឆ្នាំ២០១៣ ដល់ថ្ងៃទី១៣ ខែឧសភា ឆ្នាំ២០១៣។ រហូតដល់ថ្ងៃទី៣ឧសភា មានគណបក្ស ៥ បានចុះឈ្មោះ។ គ.ជ.ប. បានទទួលស្គាល់ជាផ្លូវការហើយ លើបញ្ជីបេក្ខជនឈរឈ្មោះបោះឆ្នោតរបស់គណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ