គ.ជ.ប. ចាប់ផ្តើមទទួលចុះឈ្មោះគណបក្ស និងបេក្ខជនឈរឈ្មោះបោះឆ្នោត
នៅថ្ងៃទី២៩មេសានេះ គ.ជ.ប. បានចាប់ផ្តើមទទួលចុះឈ្មោះគណបក្សនយោបាយនិងបញ្ជីបេក្ខជនឈរឈ្មោះបោះឆ្នោតតំណាងរាស្ត្រនីតិកាលទី៥។ នៅថ្ងៃផ្តើមដំបូងនេះ យ៉ាងហោចណាស់មានគណបក្សនយោបាយចំនួន៤បានដាក់សំណុំឯកសារចុះឈ្មោះ ដើម្បីចូលរួមប្រកួតប្រជែងការបោះឆ្នោត នាថ្ងៃទី២៨កក្កដា។ គណបក្សប្រជាជនកម្ពុជា ចុះឈ្មោះមុនគេបង្អស់។
ចុះផ្សាយនៅថ្ងៃ៖
ស្តាប់ - ០២:៥២
ការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោត ជ្រើសតាំងតំណាងរាស្ត្រ ត្រូវធ្វើឡើងចាប់ពីថ្ងៃទី២៩មេសា រហូតដល់ថ្ងៃទី១៣ឧសភា។ នៅថ្ងៃដំបូងនេះ មានគណបក្សនយោបាយចំនួន៤គណបក្ស បានដាក់សំណុំឯកសារ ចុះបញ្ជីឈ្មោះគណបក្ស និងបញ្ជីបេក្ខជនឈរឈ្មោះ នៅគ.ជ.ប.។ នេះបើតាមការបញ្ជាក់របស់លោក ទេព នីថា អគ្គលេខាធិការ គ.ជ.ប.។
គណបក្សនយោបាយដែលបានចុះឈ្មោះចូលរួមការបោះឆ្នោត នៅ គ.ជ.ប. នៅថ្ងៃ២៩មេសានេះ រួមមាន៖ គណបក្សប្រជាជនកម្ពុជា ចុះមុនគេតាំងពីព្រឹក ហើយនៅពេលរសៀលនេះ គឺគណបក្សហ្វ៊ុនស៊ិនប៉ិច គណបក្សសញ្ជាតិកម្ពុជា និងគណបក្សសាធារណៈរដ្ឋប្រជាធិបតេយ្យ។
តាមលោក ទេព នីថា គ.ជ.ប. នឹងចាប់ផ្តើមពិនិត្យលើសំណុំឯកសាររបស់គណបក្សនយោបាយទាំងនោះ ចាប់ពីថ្ងៃអង្គារស្អែក។ គ.ជ.ប. មានរយៈពេល៧ ថ្ងៃ គិតចាប់ពីថ្ងៃទទួលសំណុំឯកសារ ដើម្បីពិនិត្យ ហើយបើមានចំនុចខ្វះខាត គ.ជ.ប. ទុកពេល៥ថ្ងៃ ឲ្យគណបក្សនយោបាយ ធ្វើការកែតម្រូវ និងបំពេញឯកសារបន្ថែម។
សម្រាប់គណបក្សប្រជាជនកម្ពុជា ដែលកំពុងកាន់អំណាច បានដាក់បេក្ខជនឈរឈ្មោះបោះឆ្នោតតំណាងរាស្ត្រនៅទូទាំងប្រទេសក្នុង២៤ខេត្ត-រាជធានី។ តាមតំណាងគណបក្សប្រជាជនកម្ពុជា លោក អ៊ក គីមហាន បេក្ខជនរបស់គណបក្សប្រជាជនកម្ពុជា សរុបចំនួន ២៦៨នាក់ ក្នុងនោះ បេក្ខជនពេញសិទ្ធិ១២៣នាក់ និងបម្រុង ១៤៥នាក់។ បេក្ខជនទាំងនោះ មានស្ត្រី៤៨នាក់។
លោកបញ្ជាក់ថា ការរៀបចំបញ្ជីបេក្ខជនតំណាងរាស្ត្ររបស់គណបក្សប្រជាជនកម្ពុជា គឺមានតំណាងរាស្ត្រចាស់ៗមួយចំនួន ហើយមានបេក្ខជនថ្មីជាយុវជននិងជាកូនអ្នកដឹកនាំមួយចំនួន។ ក្នុងនោះ មានទាំងកូនប្រុសរបស់លោកនាយករដ្ឋមន្ត្រីផងដែរ។
រីឯគណបក្សសង្គ្រោះជាតិវិញ ទោះបីជាអះអាងថា ខ្លួននឹងចូលរួមការបោះឆ្នោត តែប្រឆាំងរួបរួមរវាងគណបក្សសមរង្ស៊ី និងគណបក្សសិទ្ធិមនុស្សមួយនេះ មិនទាន់ចុះបញ្ជីទេ ដោយសារនៅទាមទារទៅគ.ជ.ប. លើចំនុចមួយចំនួន ពាក់ព័ន្ធនឹងការរៀបចំបញ្ជីឈ្មោះអ្នកបោះឆ្នោត មានឈ្មោះស្ទួន ឈ្មោះខ្មោច និងឈ្មោះអ្នកបោះឆ្នោត ជាជនជាតិវៀតណាមជាដើម។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានប្រាប់វិទ្យុបារាំងថា គណបក្សប្រឆាំងបានរៀបចំបញ្ជីឈ្មោះបេក្ខជនតំណាងរាស្ត្រអស់ហើយ នៅតែការសម្រេចចិត្តជាចុងក្រោយ របស់គណៈកម្មាធិការអចិន្ត្រៃយ៍ប៉ុណ្ណោះ។
យ៉ាងណាក៏ដោយ គ.ជ.ប. រំពឹងថា សម្រាប់ការបោះឆ្នោតជាតិ នៅថ្ងៃទី២៨កក្កដាខាងមុខ នឹងមានគណបក្សនយោបាយតិចជាង ១០គណបក្ស ដែលនឹងមកចុះឈ្មោះ ចូលរួមការបោះឆ្នោតក្នុងចំណោមគណបក្សនយោបាយសរុបចំនួន ៤៣គណបក្ស ដែលបានចុះឈ្មោះផ្លូវការ នៅក្រសួងមហាផ្ទៃ នាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ