គណៈកម្មាធិការព្រំដែនទូទៅកម្ពុជាថៃប្រជុំថ្ងៃទី២០ខែធ្នូ
មានការកំណត់កាលបរិច្ឆេទសាជាថ្មីនៃកិច្ចប្រជុំគណៈកម្មាធិការព្រំដែនទូទៅកម្ពុជាថៃ។ កិច្ចប្រជុំនេះនឹងប្រព្រឹត្តទៅរយៈពេល៦ថ្ងៃ នៅក្នុងរាជធានីភ្នំពេញ ពីថ្ងៃទី២០ដល់ថ្ងៃទី២៥ខែធ្នូ។ អ្នកនាំពាក្យក្រសួងការពារជាតិកម្ពុជា លោក ឈុំ សុជាតិ ថ្លែងថា ក្រៅពីការសង្កត់ធ្ងន់ទៅលើការអនុវត្តន៍សាលក្រមតុលាការឡាអេ ពាក់ព័ន្ធនឹងការដកកងទ័ពចេញពីតំបន់គ្មានកងទ័ពបណ្តោះអាសន្ននោះ ការបាញ់ប្រហារពលរដ្ឋខ្មែរតាមព្រំដែនពីសំណាក់ទាហានថៃ ក៏នឹងត្រូវលើកដាក់លើតុពិភាក្សាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ប្រសិនបើគ្មានការប្រែប្រួលចិត្តពីភាគីថៃទៀតទេនោះ កិច្ចប្រជុំគណៈកម្មាធិការព្រំដែនទូទៅលើកទី៨នឹងអាចប្រព្រឹត្តទៅចាប់ពីថ្ងៃទី២០ដល់ថ្ងៃទី២៥ខែធ្នូក្នុងរាជធានីភ្នំពេញ។
អ្នកនាំពាក្យក្រសួងការពារជាតិកម្ពុជាលោកឧត្តមសេនីយឯក ឈុំ សុជាតិ បានថ្លែងប្រាប់សារព័ត៌មានថា រដ្ឋមន្ត្រីការពារជាតិខ្មែរលោក ទៀ បាញ់ បានផ្ញើលិខិតអញ្ជើញទៅសមភាគីថៃតាមរយៈស្ថានទូតថៃប្រចាំកម្ពុជារួចហើយ សម្រាប់ការបើកកិច្ចប្រជុំគណៈកម្មាធិការព្រំដែនទូទៅដែលភាគីទាំងពីរបានព្រមព្រៀងគ្នានៅថ្ងៃទី២០ខែធ្នូនោះ។
មានសំណុំរឿងជាច្រើនដែលគណៈកម្មាធិការចម្រុះមួយនេះជជែកពិភាក្សា និងព្រមព្រៀងគ្នាដើម្បីរក្សាសន្តិសុខតាមព្រំដែន។ ប៉ុន្តែនៅពេលនេះ កិច្ចការសំខាន់ជាងគេ គឺការនិយាយអំពីនីតិវិធីនៃការដកកងទ័ពចេញពីតំបន់ដែលត្រូវគ្មានកងទ័ពបណ្តោះអាសន្នក្បែរប្រាសាទព្រះវិហារដែលគូសវាសដោយតុលាការឡាអេ និងនីតិវិធីនៃការទទួលអ្នកសង្កេតការណ៍ឥណ្ឌូនេស៊ី។
រដ្ឋាភិបាលថ្មីរបស់គណបក្សភឿថៃដែលដឹកនាំដោយលោកស្រីនាយករដ្ឋមន្ត្រី យីងឡាក់ស៊ីណាវ៉ាត់ ប្អូនស្រីរបស់លោក ថាក់ស៊ីន ស៊ីណាវ៉ាត់ ធ្លាប់បានប្រកាសជំហររបស់ខ្លួននឹងគោរពតាមសាលក្រមរបស់តុលាការឡាអេថ្ងៃទី១៨កក្កដាឆ្នាំ២០១១នេះ ដើម្បីដោះស្រាយទំនាស់និងភាពតានតឹងតាមព្រំដែន។
បើទោះមានជំហរទន់ភ្លន់ក៏ដោយ ប៉ុន្តែដោយសារតែមានបញ្ហាផ្ទៃក្នុងនៅឯខាងភាគីថៃនោះ កិច្ចប្រជុំគណៈកម្មាធិការព្រំដែនទូទៅដែលត្រូវបានគ្រោងធ្វើតាំងពីខែកញ្ញានោះក៏ត្រូវពន្យារដល់ពេលនេះ។ នៅក្នុងកិច្ចប្រជុំលើកនេះ កម្ពុជាក៏ត្រៀមនិយាយជាមួយថៃលើបញ្ហាការបាញ់ប្រហារមកលើពលរដ្ឋស្លូតត្រង់ខ្មែរពីសំណាក់ទាហានថៃនៅតាមព្រំដែនផងដែរ។ ករណីបាញ់ប្រហារនេះបានកក្រើកឡើងវិញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ