ឥស្សរជនសង្គមដកខ្លួនចេញពី”ក្រុមប្រឹក្សាសិទ្ធិមនុស្សនៅអមប្រធានាធិបតី”
គេទើបប្រកាសថា ក្រោយពីលោកនាយករដ្ឋមន្ត្រី ពូទីន ធ្វើសច្ចាប្រណិធានចូលកាន់តំណែងជាប្រធានាធិបតីថ្មីនៅថ្ងៃទី៧ឧសភាខាងមុខគេនឹងដកខ្លួនចេញពី ”ក្រុមប្រឹក្សាសិទ្ធិមនុស្សនៅអមប្រធានាធិបតី”។ មូលហេតុមកពីមានដំណឹងថា ក្រោយពីឡើងកាន់អំណាចកំពូលលោកពូទីននឹងចាប់ហ្វ្រាំងបង្អន់ដំណើរស៊ើបអង្កេតអំពីមរណភាពលោកមេធាវីរុស្ស៊ី Serguei Magnitsky មរណភាពដែលញ៉ាំងឲ្យមានការថ្កោលទោសប្តូរផ្តាច់ពីខាងបស្ចិមលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ក្នុងចំណោមអ្នកដែលបានថ្លែងដកខ្លួននោះ មានបីនាក់ទៅហើយគឺ៖ លោកស្រី Ella Panfilova នាយិកានៃសាខារុស្ស៊ី របស់អង្គការអន្តរជាតិខាងការពារសិទ្ធិមនុស្ស “ Amnesty International “ , លោក Dmitri Oreshkin ជានយោបាយវិទូដ៏ល្បីល្បាញលោកស្រី Svetlana Gannuskina ប្រធានអង្គការខាងផ្តល់ជំនួយដល់ជនភៀសខ្លួន ឈ្មោះ “ ជំនួយស៊ីវិល “។
ជាការកត់សម្គាល់នៅរុស្ស៊ី “ក្រុមប្រឹក្សាសិទ្ធិមនុស្សនៅអមប្រធានាធិបតី” មានសមាជិកសរុបចំនួន២០នាក់ ដែលសុទ្ធតែជាឥស្សរជនសង្គមដ៏ល្បីៗ បែបយ៉ាងអ្នកការពារសិទ្ធិមនុស្ស អ្នកសង្គមសាស្ត្រ ប្រធានអង្គការមនុស្សធម៌ ប្រធានអង្គការសាសនា ។ល។ ក្រុមប្រឹក្សានេះ ដែលត្រូវបានបង្កើតឡើងស្របនឹងក្រឹត្យប្រធានាធិបតីចុះថ្ងៃទី១កុម្ភៈឆ្នាំ២០១១ មានភារៈជួយប្រមុខរដ្ឋ ឲ្យបំពេញកាតព្វកិច្ចខ្លួន ដូចដែលមានចែងក្នុងរដ្ឋធម្មនុញ្ញ ក្នុងវិស័យធានានិងការពារសិទ្ធិ-សេរីភាពពលរដ្ឋ រាយការណ៍ជូនប្រមុខរដ្ឋអំពីស្ថានភាព ក្នុងវិស័យនេះនិងជំរុញដល់ការអភិវឌ្ឍន៍រាល់ស្ថាប័ននៃសង្គមស៊ីវិល។
ថ្លែងថ្ងៃនេះទៅកាន់ពួកអ្នកកាសែត លោកស្រី Ella Panfilova លើកឡើងជាអាទ៌៍ ៖ “ការដែលខ្ញុំសុខចិត្តត្រដរ ស្ថិតនៅក្នុងក្រុមប្រឹក្សានេះ មកពីមានពាក្យសន្យា ទៅម្តាយ លោក Serguei Magnitsky ថានឹងធ្វើការស៊ើបអង្កេតឲ្យបានល្អិតល្អន់អំពីកាលៈទេសៈនៃមរណភាព កូនប្រុសនោះរបស់គាត់”។
ជាការរំលឹក លោក Serguei Magnitsky ជាអ្នកច្បាប់ជាតិរុស្ស៊ី បានធ្វើការជាមេធាវី ការពារផលប្រយោជន៍របស់មូលនិធិវិនិយោគអាមេរិកាំងឈ្មោះ Hermitage តាំងពីឆ្នាំ២០០៧មក។ ប៉ុន្តែថ្ងៃ២៤វិច្ឆិកាឆ្នាំ២០០៨ គាត់បានត្រូវអាជ្ញាធររុស្ស៊ីឃាត់ខ្លួនក្រោយពីគាត់បានបរិហារអាក្រាតពួកមន្ត្រីជាន់ខ្ពស់នៃក្រសួងមហាផ្ទៃរុស្ស៊ី ថាបានគៃបន្លំយកលុយ ២៣០លានដុល្លារពីក្រុមហ៊ុន៣ របស់មូលនិធិនេះ។ មួយឆ្នាំក្រោយមក នៅថ្ងៃ១៦វិច្ឆិកាឆ្នាំ២០០៩គាត់ស្រាប់តែដាច់ខ្យល់ស្លាប់ទៅក្នុងអាយុទើប៣៧ឆ្នាំនៅក្នុងមន្ទីរឃុំឃាំងមួយនៃពន្ធនាគារក្រុងម៉ូស្គូ។
មរណភាពលោក Serguei Magnitsky ញ៉ាំងឲ្យមានប្រតិកម្មអវិជ្ជមានក្រៃពីខាងបស្ចិមលោក។ សហភាពអឺរ៉ុបនៅថ្ងៃ២៥វិច្ឆិកាឆ្នាំ២០១០ បានសម្រេចថា ហាមមិនឲ្យចេញទិដ្ឋាការដល់មន្ត្រីរុស្ស៊ីចំនួន៦០នាក់ដែលត្រូវសង្ស័យថាពាក់ព័ន្ធនឹងមរណភាពនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ