Edward Snowden បានស្នើសុំសិទ្ធិជ្រកកោននយោបាយទៅ ប្រទេសចំនួន២១
អតីតបុគ្គលិកបម្រើការនៅទីភ្នាក់សម្ងាត់អាមេរិក CIA និងទីភ្នាក់ងារសន្តិសុខជាតិអាមេរិក NSA គឺ Edward Snowden ដែលកំពុងតែជាប់នៅព្រលានយន្តហោះទីក្រុងមូស្គូ បានដាក់ពាក្យស្នើសុំសិទ្ធិជ្រកកោននយោបាយ ទៅប្រទេសចំនួន២១។ ហើយក្នុងនោះលោកយល់ថាអាមេរិកកំពុងតែដាក់គំនាបទៅលើប្រទេសទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
វុបសៃតិ៍ Wikileaks បានចេញផ្សាយនៅក្នុងថ្ងៃអង្គារទី២ កក្កដាថា លោក Edward Snowden បានសុំសិទ្ធិជ្រកកោនទៅប្រទេសមួយចំនួនរួចទៅហើយ ដែលមានដូចជា អ៊ីស្លង់ អេក្វាទ័រ គុយបា វ៉េណេស៊ុយអេឡា(Venezuela) ប្រេស៊ីល ឥណ្ឌា ចិន អាឡឺម៉ង់ និងបារាំង។ នៅក្នុង សេចក្តីប្រកាសរបស់ខ្លួន នៅក្នុងវិបសែតិ៍ខាងលើ Edward Snowden បានចោទអាមេរិកថា បានដាក់សម្ពាធទៅលើប្រទេសទាំងអស់នោះ ចាប់តាំងពីពេលដែល លោកបានចាកចេញពីទីក្រុងហុងកុងមក។
ក្នុងសេចក្តីប្រកាសដដែល Edward Snowden បន្ថែមថា លោកអូបាម៉ា កំពុងតែបោកប្រាស់ភ្នែកអ្នកដទៃចំពោះទង្វើរបស់អាមេរិកក្នុងរឿងលួចស្តាប់ប្រទេសដទែ និងចង់រកលេសដាក់ទោសរូបលោក ឱ្យក្លាយជាជនម្នាក់ដែលរស់ក្រៅប្រទេស ដោយខុសច្បាប់។ ក្នុងន័យនេះ Snowden ចាត់ទុកថា ខ្លួនមិនមែនជាអ្នកទោសក្បត់ជាតិនោះទេ គ្រាន់តែចង់បង្ហាញព័ត៌មានឱ្យសាធារណៈជន ដឹងពីការពិតប៉ុណ្ណោះ។
កាលពីល្ងាចថ្ងៃអាទិត្យ ទី៣០ មិថុនាកន្លងទៅ លោក Snowden បានដាក់ពាក្យសុំសិទ្ធិជ្រកកោន នៅក្នុងប្រទេសរុស្ស៊ី តាមរយៈជនជាតិអង់គ្លេសម្នាក់ ដែលបាននាំលោកចេញពីទីក្រុងហុងកុង។ ពាក្យស្នើសុំនេះ បានដាក់ជូនទៅកុងស៊ុលឡារុស្ស៊ីប្រចាំនៅព្រលានយន្តហោះទីក្រុងមូស្គូ។
នៅមួយថ្ងៃបន្ទាប់ គឺកាលពីថ្ងៃចន្ទម្សិលមិញ ថ្នាក់ដឹកនាំកំពូលរបស់រុស្ស៊ីបានប្រកាសក្នុងសន្និសីទកាសែតមួយ នៅវិមានក្រេមឡាំងថា រុស្ស៊ីនឹងមិនបញ្ជូនជនណាម្នាក់ឡើយទៅឱ្យសហរដ្ឋអាមេរិក។ លោកពូទីន ក៏បានបញ្ជាក់បន្ថែមដែថា រុស្ស៊ីមិនមានបំណងកេងចំណេញយកឯកសារសម្ងាត់របស់អាមេរិក ដោយរួមដៃជាមួយ Snowden នោះឡើយ។ ផ្ទុយទៅវិញ លោកបានប្រកាសឱ្យ បុរសដែលជាអ្នកទម្លាយឯកសារសម្ងាត់អាមេរិករូបនេះ បញ្ឈប់ការវាយទៅលើអាមេរិក ជាថ្នូរនឹងការផ្តល់សិទ្ធិជ្រកកោននយោបាយ។ ហើយរុស្ស៊ី ចាត់ទុក Snowden ជាសកម្មជនការពារសិទ្ធិមនុស្ស មួយរូបប៉ុណ្ណោះ។
តាមព័ត៌មានដែលទទួលបានជាចុងក្រោយ នាល្ងាចថ្ងៃអង្គារនេះ Edward Snowdenបានដកពាក្យសុំសិទ្ធិជ្រកកោននៅរុស្ស៊ីវិញ បន្ទាប់ពីលោកពូទីន ប្រកាសឱ្យគេបញ្ឈប់ សកម្មភាពវាយប្រហារទៅលើរដ្ឋាភិបាលអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ