សំណុំរឿង Edward Snowden ៖សហភាពអឺរ៉ុបជាចំណុចស៊ីបរបស់ NSA
បើតាម ឯកសារសម្ងាត់ដែល Edward Snowden បានទំលាយឱ្យដឹងពីកន្លងទៅនេះអាមេរិកបានលួសស្តាប់រាល់ការទំនាក់ទំនងទាំងឡាយស្ទើតែគ្រប់ប្រទេសនៅក្នុងពិភពលោក ។ ក្នុងនោះ សហភាព អឺរ៉ុប ក៏ជាចំណុចស៊ីបមួយរបស់កម្មវិធី Prism ប្រើសម្រាប់លួចស្តាប់ ការសន្ទាតាមទូរស័ព្ទដោយភ្នាក់ងារសន្តិសុខអាមេរិក ហៅកាត់ថា NSA។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ការសែតក្នុងស្រុកមួយរបស់អាឡឺម៉ង់ ឈ្មោះ Der Spiegel បានទំលាយឱ្យដឹងកាលពីព្រឹកថ្ងៃអាទិត្យទី៣០ មិថុនានេះថាអាមេរិកបាន ប្រើកម្មវិធីលួចស្តាប់ការសន្ទនាតាមទូរស័ព្ទ និងនៅក្នុងបណ្តាញព័ត៌មានវិទ្យារបស់ ការិយាល័យក្រុមប្រឹក្សាសហភាពអឺរ៉ុប នៅក្នុងស្នាក់អង្គការសហប្រជាជាតិទីក្រុងញ៊ូវយ៉ក។ ការសែតបានបញ្ជាក់ថា ព័ត៌មាននេះមានសរសេរ នៅក្នុងរបាយការណ៍យ៉ាងសម្ងាត់បំផុតរបស់ NSA ដែលលោក Edward Snowden បានទំលាយឱ្យដឹង។ដោយនៅក្នុងនោះគេនិយាយពីវិធីយកការណ៍លើគ្រប់មន្ត្រីការទូតរបស់សហភាពអឺរ៉ុបនៅទីក្រុងវ៉ាស៊ីនតោន។
គេបានរកឃើញមិនត្រឹមតែការដាក់ ម៉ាស៊ីនថតសំឡេង នៅក្នុងអាគារការិយាល័យរបស់សហភាពអឺរ៉ុបប៉ុណ្ណោះទេ គេបានរកឃើញផងដែរការជ្រៀតចូលទៅក្នុងប្រព័ន្ធកុំព្យុទ័រ ដើម្បីលួចអានសារអេឡិចត្រូនិច និងឯកសារផ្ទៃក្នុងនានា។
បន្ថែមលើនេះ ការសែតដដែលបានលើកឡើងថា NSA បានបំពាក់ប្រព័ន្ធស៊ើបការសម្ងាត់របស់ខ្លួនរហូតដល់ស្នាក់ការក្រុមប្រឹក្សាសហភាពអឺរ៉ុប នៅទីក្រុងBruxelles។ ហើយប្រមាណជាង៥ឆ្នាំមុន ភ្នាក់ងារការពារសន្តិសុខរបស់សហភាពអឺរ៉ុប បានរកឃើញមានការដាក់ប្រព័ន្ធលួចថតសំឡេង និងតាមដានប្រព័ន្ធអ៊ិនធ័រនែត នៅក្នុងអាគារនៃស្នាក់ការរបស់អង្គការ OTAN ជិតទីក្រុង Bruxellesទៀតផង។
កាលពីឆ្នាំ២០០៣ គេក៏បានរកឃើញមានប្រព័ន្ធតាមដាននេះបំពាក់ នៅក្នុងការិយាយមន្ត្រីការទូតជាច្រើន ដែលជាពិសេសនៅក្នុងប្រទេសបារាំង និងអាឡឺម៉ង់។ តែក្នុងរឿងនេះ កាសែតមិនបានសន្មត់ពិតប្រាកដ ថាវាមានទាក់ទងជាមួយ ភ្នាក់ងារសន្តិសុខជាតិអាមេរិកនោះទេ។
ប្រតិកម្មជុំវិញរឿងនេះ ប្រធានសភាអឺរ៉ុប យល់ថាវាជារឿងអាស្រូវមួយដ៏ធំផុត បើសិនគេរកឃើញថា នេះជាការពិត។ ហើយបញ្ហានេះ នឹងធ្វើឱ្យទំនាក់ទំនងការទូត រវាង អឺរ៉ុប និងសហរដ្ឋាអាមេរិក ឈានទៅរកការប្រេះស្រាំមិនខាន។
បើតាមការឱ្យដឹងរបស់រដ្ឋមន្ត្រីក្រសួងការបរទេស Luxembourg វិញ អាមេរិកគួរតែតាមដានការងាររបស់មន្ត្រីខ្លួន មិនមែនមកតាមដានសម្ព័ន្ធមិត្តនោះឡើយ។ កន្លងមកអាមេរិក ពន្យល់ថា ការប្រើកម្មវិធីនេះដើម្បីប្រយុទ្ធប្រឆាំងនឹងអំពើភេរវកម្ម។ តែក្នុងនេះលោកបានលើកឡើងថា មន្ត្រីការទូតរបស់សហភាពអឺរ៉ុប មិនមែនជាភេរវករនោះទេ។
ទាក់ទងនឹងរឿងអាស្រូវនេះតំណាងរាស្ត្រ នៃសភាអឺរ៉ុប ដែលមកពីបក្សបរិស្ថាននិយម អំពាវនាវឱ្យ សហភាពអឺរ៉ុបបញ្ឈប់ជាបន្ទាន់នូវការចចារជាមួយអាមេរិក ស្តីអំពីសន្ធិសញ្ញាផ្លាស់ប្តូពាណិជ្ជកម្មទីផ្សារសេរី។ ជាពិសេសសន្ធិសញ្ញាទាក់ទងនឹងការការពារ ប្រព័ន្ធទិនន័យ។ បច្ចុប្បន្នសន្ធិសញ្ញានេះ មិនទាន់សម្រេចបាននូវការយល់ព្រមណាមួយទេរវាងភាគីទាំងពីរ ចាប់តាំងពីមានការចរចាកាលពីឆ្នាំ២០១១មក។
កាលពីថ្ងៃពុធសប្តាហ៍មុននេះដែរ សហភាពអឺរ៉ុបបានស្នើរទៅសហរដ្ឋអាមេរិក បំភ្លឺឱ្យបានលឿនបំផុតទាក់ទងនឹងការប្រើប្រាស់កម្មវិធី Prism ខាងលើ។ តែរហូតមកដល់ពេលនេះ គេមិនទាន់មានប្រតិកម្មយ៉ាងណាពីសហរដ្ឋអាមេរិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ