ប្រឈមនឹងការរិះគន់ពីបស្ចឹមលោក លោកអ៊ែរដូហ្កានសុខចិត្តបន្ទាបខ្លូនទៅរករុស្ស៊ីវិញ
ចុះផ្សាយនៅថ្ងៃ៖
ស្តាប់ - ០៥:១២
ប្រឈមនឹងការរិះគន់ពីប្រទេសលោកខាងលិចចំពោះការបោសសម្អាតកងទ័ព រដ្ឋអាជ្ញា មន្ត្រីគ្រប់ជាន់ថ្នាក់ក្នុងស្រុក ប្រធានាធិបតីតួកគីបានបន្ទន់ជំហរ ទៅរករុស្ស៊ីវិញ ដោយបានបំពេញទស្សនកិច្ចជួបលោកពូទីន កាលពីថ្ងៃអង្គារ។ ប៉ុន្មានសប្តាហ៍មុននេះ លោកអ៊ែរដូហ្កានបានសរសេរលិខិតសូមទោសមួយច្បាប់ ផ្ញើទៅលោកពូទីន សូមទោសចំពោះហេតុការណ៍ដែលទាហានតួកគីបាញ់ទំលាក់យន្តហោះរុស្ស៊ី កាលពីខែវិច្ឆិកា ឆ្នាំ២០១៥។
ថ្ងៃអង្គារ៩សីហាសប្តាហ៍នេះ ប្រធានាធិបតីតួកគី លោករេសេប តៃយីព អ៊ែរដូហ្កាន បានបំពេញទស្សនកិច្ចនៅរុស្ស៊ី ជួបប្រធានាធិបតីពូទីន ដើម្បីស្តារទំនាក់ទំនងទ្វេភាគីរវាងប្រទេសទាំង២ឡើងវិញ។ នេះជាទស្សនកិច្ចលើកទី១របស់លោកអ៊ែរដូហ្កាន នៅក្រៅ ប្រទេស តាំងពីតួកគីរងរដ្ឋប្រហារមិនបានសម្រេច ថ្ងៃ១៥កក្កដាមក។
ទំនាក់ទំនងរវាងតួកគីនិងរុស្ស៊ីជួបភាពតានតឹងច្រើន ដោយសារតួកគីបានបាញ់យន្តហោះរុស្ស៊ីមួយគ្រឿង កាលពីខែវិច្ឆិកា ឆ្នាំ២០១៥ សម្លាប់ពីឡុតរុស្ស៊ីម្នាក់។ កាលនោះ តួកគីរឹងទទឹងមិនខ្ចីសូមទោសរុស្ស៊ីទាល់តែសោះ ទោះជារុស្ស៊ីទាមទារអោយសូមទោសច្រើនលើកច្រើនសាក្តី។ កន្លងមក តួកគីបានត្រឹមតែបង្ហាញការសោកស្តាយចំពោះហេតុការណ៍បាញ់យន្តហោះរុស្ស៊ីប៉ុណ្ណោះ។ ប៉ុន្តែ ទីបំផុត ប្រធានាធិបតីតួកគីបានប្តូរចិត្ត សុខចិត្តបន្ទាបខ្លួន មកសូមទោសរុស្ស៊ីជាផ្លូវការវិញ។ លោកអ៊ែរដូហ្កានបានសរសេរលិខិតផ្ញើទៅលោកពូទីន សូមទោសចំពោះហេតុការណ៍បាញ់ទំលាក់យន្តហោះរុស្ស៊ី កាលពីចុងឆ្នាំមុន។
តើលោកពូទីនមានអ្វីពិសេស ធ្វើអោយលោកអ៊ែរដូហ្កាន សុខចិត្តបន្ទាបខ្លួនវិញ ? ដំបូង យើងដឹងថា ទស្សនកិច្ចលោកអ៊ែរដូហ្កាននៅរុស្ស៊ី សប្តាហ៍នេះមិនមែនជារឿងចៃដន្យទេ។ រដ្ឋាភិបាលតួកគីកំពុងរងការរិះគន់ពីប្រទេសលោកខាងលិច ចំពោះការបោសសម្អាតទាហាន មន្ត្រី មេធាវី គ្រប់ជាន់ថ្នាក់ ដែលអាចជាប់ពាក់ព័ន្ធថាបានធ្វើរដ្ឋប្រហារ កាលពីថ្ងៃ១៥កក្កដា។ សម្រាប់លោកខាងលិច ការបោសសម្អាតបែបនេះ វាអាចបំពានលើគោលការណ៍មូលដ្ឋានសិទ្ធិមនុស្សធ្ងន់ធ្ងរ។
អឺរ៉ុបជាមិត្តល្អនឹងតួកគី អឺរ៉ុបនិងតួកគីមានទស្សនៈយល់ឃើញដូចគ្នាច្រើន។ បែបយ៉ាងនៅស៊ីរី ទាំងប្រទេសលោកខាងលិច ទាំងតួកគីសុទ្ធតែមិនចង់ឃើញលោកអាសាដនៅកាន់អំណាចទៀត ខុសពីរុស្ស៊ី ដែលគាំទ្រលោកអាសាដពេញទំហឹង។ ឥឡូវ ប្រទេសលោកខាងលិចជាមិត្តនឹងតួកគី បែរជាមិនគាំទ្រតួកគី ក្នុងការបោសសម្អាតក្រុមបះបោររដ្ឋប្រហារទៅវិញ។
លោកអ៊ែរដូហ្កានពិតជាខកចិត្តខ្លាំងណាស់ ដែលអឺរ៉ុបមិនកាន់ជើងរដ្ឋាភិបាលលោក ក្នុងសកម្មភាពបោសសម្អាតក្រុមបះបោររដ្ឋប្រហារ។ រុស្ស៊ីដែលមានទំនាក់ទំនងតានតឹងជាមួយលោកខាងលិច បូករួមនឹងតួកគីដែរនោះ បែរជាមិនបានរិះគន់តួកគីរឿងបោសសម្អាតក្រុមបះបោរទៅវិញ។ ក្រោយរដ្ឋប្រហារតួកគី លោកពូទីនបានទូរសព្ទទៅលោកអ៊ែរដូហ្កានសំដែងការគាំទ្រដល់លោក និងបរិហារពីរដ្ឋប្រហារ។ ក្រោយរដ្ឋប្រហារនៅតួកគី លោកពូទីន គឺជាមេដឹកនាំបរទេសទី២ បន្ទាប់ពីប្រធានាធិបតីកាហ្សាក់ស្ថាន ដែលជួបសំណេះសំណាលផ្ទាល់ជាមួយលោកអ៊ែរដូហ្កាន។ ដោយឡែក តាំងពីមានរដ្ឋប្រហារ១៥កក្កដាមក មិនទាន់មានតំណាងលោកខាងលិចណាមួយ ចុះទៅទស្សនកិច្ចតួកគី សំដែងការគាំទ្រដល់រដ្ឋាភិបាលតួកគីទេ។
ខុសពីលោកខាងលិច រុស្ស៊ីមិនបានបញ្ចេញមតិអ្វី ចំពោះការបោសសម្អាតក្រុមបះបោរនៅតួកគីទេ។ កន្លងមក រុស្ស៊ីធ្លាប់បានបន្ថយទណ្ឌកម្មខ្លះៗចំពោះតួកគីដែរ។ អាកប្បកិរិយាទាំងនេះបានបានផ្តល់ភាពកក់ក្តៅ និងលើកទឹកចិត្តរដ្ឋាភិបាលតួកគី។ ម្ល៉ោះហើយ ទោះជាត្រូវបន្ទាបខ្លួន លំបាកយ៉ាងណា ក៏លោកអ៊ែរដូហ្កាន ត្រូវតែធ្វើ ដើម្បីទទួលបានការគាំទ្រពីរុស្ស៊ី ចំពោះទង្វើបោសសម្អាតក្រុមបះបោររដ្ឋប្រហារតួកគីដែរ។ ដើម្បីស្តារភាពល្អក់កករក្នុងទំនាក់ទំនងឡើងវិញ លោកពូទីននិងលោកអ៊ែរដូហ្កានបានពិភាក្សាចំពោះគម្រោងសាងសង់បំពង់ឧស្ម័ន TurkStream តួកស្ទ្រីម ដែលត្រូវឆ្លងកាត់សមុទ្រខ្មៅ បញ្ជូនឧស្ម័នពីរុស្ស៊ី ទៅផ្គត់ផ្គង់តួកគី។ គម្រោងនេះ ធ្វើអោយអឺរ៉ុបមិនសប្បាយចិត្តប៉ុន្មានទេ អឺរ៉ុបមិនចង់ពឹងផ្អែកលើឧស្ម័នរុស្ស៊ីទាំងស្រុងទេ។
លោកអ៊ែរដូហ្កានឈឺចិត្តនឹងអឺរ៉ុបធ្លាប់តែជាមិត្តល្អ តែបែរជារិះគន់តួកគីរឿងបោសសម្អាតរដ្ឋប្រហារ រហូតគំរាមតួកគី ព្យួរការចរចារឿងតួកគីចូលជាសមាជិកអឺរ៉ុបទៀតផង។ ពេលនេះ ចង់អឺរ៉ុបពេញចិត្ត រឺមិនពេញចិត្តបំពង់ឧស្ម័នតួកស្ទ្រីម ដើម្បីអោយតួកគីទទួលបានឧស្ម័នពីរុស្ស៊ីនោះ លោកអ៊ែរដូហ្កានលែងខ្វល់ទៀតហើយ។ លោកដឹងច្បាស់ថា អឺរ៉ុបនិងរុស្ស៊ីមិនត្រូវគ្នាទេ ដោយសារវិបត្តិអ៊ុយក្រែន ដោយសាររុស្ស៊ីភ្ជាប់តំបន់គ្រីមេចូលក្នុងទឹកដីរុស្ស៊ីនោះ។
ប្រហែលខកចិត្តនឹងអឺរ៉ុបពេក ថ្មីៗនេះ តួកគីថែមទាំងគម្រាមថា ខ្លួនអាចនឹងមិនគោរពតាមកិច្ចព្រមព្រៀងតួកគី-អឺរ៉ុប ស្តីពីវិបត្តិជនភៀសខ្លូនទៀតផង បើអឺរ៉ុបមិនប្រកាសដកលក្ខខណ្ឌរឹតបន្តឹងទិដ្ឋាការធ្វើដំណើររបស់ពលរដ្ឋតួកគីចេញទេ។
ក្រៅពីខកចិត្តនឹងអឺរ៉ុប តួកគីក៏ខកចិត្តនឹងអាមេរិកមិនតិចដែរ។ ទំនាក់ទំនងអាមេរិកនិងតួកគីក៏តានតឹងនឹងគ្នាដែរកន្លងមក។ អាមេរិកត្រូវការតួកគីក្នុងយុទ្ធនាការកំចាត់ក្រុមភេរវជនរដ្ឋអ៊ីស្លាម នៅដើមបូព៌ា។ អាមេរិកប្រើមូលដ្ឋានទ័ពមួយកន្លែងនៅតួកគី ក្នុងយុទ្ធនាការនេះ។ អាមេរិកមិនអរគុណតួកគីហើយ បែរជាមិនបញ្ជូនហ្វេទូឡា ហ្គូឡិន មកអោយតួកគីកាត់ទោស តាមការទាមទាររបស់តួកគីទៀត។ ក្រសួងយុត្តិធម៌តួកគីបានគំរាមផ្តាច់ទំនាក់ទំនងជាមួយអាមេរិក បើអាមេរិកមិនបញ្ជូនលោកហ្គូឡិនមកអោយតួកគីវិញ។
ហ្វេទូឡា ហ្គូឡិន ជាសត្រូវរដ្ឋាភិបាលតួកគី កំពុងភៀសខ្លួននៅអាមេរិក- រដ្ឋាភិបាលតួកគីចោទលោកហ្គូឡិនថា ជាមេក្លោងរដ្ឋប្រហារមិនបានសម្រេចថ្ងៃ១៥កក្កដា។ ប្រហែលខឹងអាមេរិកខ្លាំងពេក ទើបតួកគីបង្ហាញការសង្ស័យថា អាមេរិកក៏បានជួយរៀបផែនការរដ្ឋប្រហារនេះដែរ។
ការបោសសម្អាតក្រុមបះបោរ មន្ត្រីទាហានគ្រប់ជាន់ថ្នាក់ ដែលអាចជាប់ពាក់ព័ន្ធជាមួយលោកហ្គូឡិន ធ្វើអោយតួកកីហាក់ក្លាយជាប្រទេសឯកា។ ដូច្នេះ លោកអ៊ែរដូហ្កានមិនត្រូវគ្រាំគ្រាចិត្តយូរពេកទេ ចំពោះការរិះគន់របស់ប្រទេសលោកខាងលិច។ លោកអ៊ែរដូហ្កានមិនត្រូវខកចិត្តយូរពេកទេ ចំពោះអាមេរិកដែលហាក់នៅរួញរាបញ្ជូនលោកហ្គូឡិនអោយតួកគី។
ពេលតួកគីឯកោ រុស្ស៊ីមិនបានជាន់តួកគីបន្ថែមក្នុងជ្រោះទេ។ ដូច្នេះ លោកអ៊ែរដូហ្កានត្រូវតែហ៊ានលះបង់ច្រើន ដើម្បីផ្គាប់រុស្ស៊ីវិញ។ រុស្ស៊ីវិញក៏ប្រកាសត្រៀមផ្សះផ្សាជាមួយតួកគីដែរ ទោះជាត្រូវការពេលយូរ រឺពិបាកបន្តិចក្តី។ ជាក់ស្តែង ក្នុងជំនួបថ្ងៃអង្គារកន្លងទៅ ទាំងលោកអ៊ែរដូហ្កាន ទាំងលោកពូទីនមិនបានលើកឡើងពីវិបត្តិស៊ីរីដ៏ចម្រូងចម្រាសទេ។ ភាគីទាំង២គ្រាន់តែនិយាយដូចគ្នាថា យើងមានទស្សនៈផ្សេងគ្នា ចំពោះស៊ីរី តែយើងមានជំហរដោះស្រាយវិបត្តិស៊ីរីដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ