មហាបាតុកម្មនៅតួកគីប្រឆាំងរដ្ឋប្រហារមិនបានសម្រេចថ្ងៃ១៥កក្កដា
ល្ងាចថ្ងៃអាទិត្យនេះ ប្រជាជនតួកគីរាប់លាននាក់ត្រៀមធ្វើមហាបាតុកម្ម នៅក្រុងអ៊ីស្តង់ប៊ូល ប្រឆាំងរដ្ឋប្រហារមិនបានសម្រេច កាលពីថ្ងៃ១៥កក្កដា កន្លងទៅ។ អាជ្ញាធរបានរៀបចំអោយមានមធ្យោបាយធ្វើដំណើរឥតគិតថ្លៃដល់ពលរដ្ឋ គ្រប់រូប ដែលចូលរួមបាតុកម្ម។ ប្រធានាធិបតីអ៊ែរដូហ្កានបានអញ្ជើញបក្សប្រឆាំងជាតិជ្រុលនិយមដែល គាំទ្ររូបលោក អោយចូលរួមមហាបាតុកម្មនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
មហាបាតុកម្មធ្វើឡើង នៅល្ងាចថ្ងៃអាទិត្យនេះ តាមការអំពាវនាវរបស់ប្រធានាធិបតីអ៊ែរដូហ្កាន នៅទីលានយេនីកាពី មាត់សមុទ្រម៉ាម៉ារ៉ា នៅភាគខាងលិចក្រុងអ៊ីស្តង់ប៊ូល។ ទិសដៅចំបងនៃបាតុកម្ម គឺដើម្បីប្រឆាំងរដ្ឋប្រហារមិនបានសម្រេចកាលពីថ្ងៃ១៥កក្កដា ប្រឆាំងនឹងលោកហ្វេទូឡា ហ្គូឡេន ដែលរងការចោទប្រកាន់ថា ជាមេក្លោងរដ្ឋប្រហារ។
ប្រធានាធិបតីអ៊ែរដូហ្កាន ចង់អោយប្រជាជនបាតុកម្មបង្ហាញការគាំទ្រ ដល់រដ្ឋាភិបាលលោក ដែលកើតចេញពីការបោះឆ្នោតប្រជាធិបតេយ្យ។ ដើម្បីសម្រួលដល់ការធ្វើដំណើរ និងជួយអោយប្រជាជនក្រីក្របានមកបាតុកម្មនឹងគេ នៅថ្ងៃអាទិត្យនេះដែរ អាជ្ញាធរបានរៀបចំអោយមានមធ្យោបាយធ្វើដំណើរឥតគិតថ្លៃ និងបាយទឹក សម្រាប់ប្រជាជនគ្រប់រូប។
រដ្ឋប្រហារមិនបានសម្រេចថ្ងៃ១៥កក្កដាកន្លងទៅ បានសម្លាប់មនុស្សជាង២៣០នាក់ ធ្វើអោយរដ្ឋាភិបាល ដែលកើតចេញពីការបោះឆ្នោត ពិបាកនឹងទទួលយក។ សូម្បីតែបក្សប្រឆាំងក៏មិនពេញចិត្តនឹងរដ្ឋប្រហារដែរ បើទោះជាគេមិនគាំទ្រលោកអ៊ែរដូហ្កានក៏ដោយចុះ។ តួកគីធ្លាប់រងការប៉ុនប៉ងរដ្ឋប្រហារចុងក្រោយគេ នៅឆ្នាំ១៩៨០។ ក្រោយរដ្ឋប្រហារ ថ្ងៃ១៥កក្កដាកន្លងទៅ ទាហាន រដ្ឋអាជ្ញា មន្ត្រីគ្រប់ជាន់ថ្នាក់ ជាង៦ម៉ឺននាក់ ត្រូវបានចាប់ខ្លួន ដកតំណែង រឺក៏ស្ថិតក្រោមការស៊ើបអង្កេតផ្លូវច្បាប់។
តាំងពីមានរដ្ឋប្រហារមក ៣សប្តាហ៍មកនេះ រៀងរាល់យប់ សកម្មជនគាំទ្រលោកអ៊ែរដូហ្កាន រាប់ពាន់នាក់បាននាំគ្នាចុះបាតុកម្ម នៅក្រុងអង់ការ៉ា និងក្រុងអ៊ីស្តង់ប៊ូល សំដែងការគាំទ្រដល់លោកអ៊ែរដូហ្កាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ