តួកគីចេញដីកាចាប់ខ្លួនមេដឹកនាំចលនាប្រឆាំងដែលកំពុងនិរទេសខ្លួននៅអាមេរិក
តួកគេបានចេញដីកាជាផ្លូវការ តាមចាប់ខ្លួនលោក ហ្គូឡេន មេដឹកនាំចលនាប្រឆាំង ដែលកំពុងរស់នៅនិរទេសក្នុងប្រទេសអាមេរិក ហើយដែលត្រូវចោទប្រកាន់ថាជាមេគំនិតនៅពីក្រោយការប៉ុនប៉ងធ្វើរដ្ឋប្រហារមិនបានសម្រេច កាលពីថ្ងៃទី១៥កក្កដាកន្លងទៅ។ ចាប់តាំងពីរដ្ឋប្រហារមិនបានសម្រេចនោះមក គេឃើញថា រដ្ឋាភិបាលតួកគីបានទាមទារម្តងហើយម្តងទៀត ឲ្យសហរដ្ឋអាមេរិកចាប់ខ្លួនលោក ហ្គូឡេន បញ្ជូនមកតួកគី ក៏ប៉ុន្តែ នេះជាលើកទី១ ដែលតួកគីចេញដីកាចាប់ខ្លួនជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
យោងតាមការផ្សាយរបស់ទីភ្នាក់ងារព័ត៌មានតួកគី ដីកាចាប់ខ្លួនលោកហ្គូឡេន ត្រូវបានចេញ កាលពីថ្ងៃព្រហស្បតិ៍ ហើយនៅក្នុងរយៈពេលពីរសប្តាហ៍ខាងមុខទៀតនេះ គណៈប្រតិភូតួកគីមួយក្រុម ដែលរួមមានមន្រ្តីមកពីក្រសួងការបរទេស និងក្រសួងយុត្តិធម៌ នឹងធ្វើដំណើរទៅសហរដ្ឋអាមេរិក ដើម្បីបង្ហាញពីការពាក់ព័ន្ធរបស់លោកហ្គូឡេន នៅក្នុងការប៉ុនប៉ងធ្វើរដ្ឋប្រហារមិនបានសម្រេច។
ពីទីក្រុងវ៉ាស៊ីងតោនវិញ អ្នកនាំពាក្យក្រសួងការបរទេសអាមេរិកបានឲ្យដឹងថា តួកគីបានបញ្ជូនសំណុំឯកសារចំនួន ២ច្បាប់រួចមកហើយ ដោយអះអាងថាជាភស្តុតាងទាក់ទងនឹងការចោទប្រកាន់លើលោកហ្គូឡេន។ មន្រ្តីអ្នកនាំពាក្យរូបនេះក៏បានឲ្យដឹងផងដែរថា អាមេរិកកំពុងតែពិនិត្យមើលឯកសារអស់ទាំងនេះ ដើម្បីកំណត់ថា តើវាជាឯកសារដែលត្រឹមត្រូវទៅតាមនីតិវិធី នៃការស្នើសុំធ្វើបត្យាប័នដែរឬក៏យ៉ាងណា។ ទោះជាយ៉ាងណា ក្រសួងការបរទេសអាមេរិកបានបដិសេធមិនធ្វើអត្ថាធិប្បាយអ្វីទាំងអស់ ជុំវិញការចេញដីកាចាប់ខ្លួនលោកហ្គូឡេន កាលពីថ្ងៃព្រហស្បតិ៍ម្សិលមិញនេះ។
គួរបញ្ជាក់ថា គិតចាប់តាំងពីក្រោយរដ្ឋប្រហារមិនបានសម្រេចមក រដ្ឋាភិបាលតួកគីបានទាមទារម្តងហើយម្តងទៀត ដោយទទូច ឲ្យសហរដ្ឋអាមេរិកចាប់ខ្លួនលោក ហ្គូឡេន បញ្ជូនមកតួកគី ក៏ប៉ុន្តែ អាមេរិកបដិសេធ ដោយទាមទារឲ្យតួកគីបង្ហាញភស្តុតាងច្បាស់លាស់ ទៅតាមនីតិវិធី នៃសន្ធិសញ្ញាស្តីពីបត្យាប័ន។
ការបដិសេធមិនបញ្ជូនខ្លួនលោកហ្គូឡេន បានធ្វើឲ្យតួកគីខឹងសម្បារយ៉ាងខ្លាំង រហូតសម្តែងនូវការសង្ស័យថា អាមេរិក តាមរយៈទីភ្នាក់ងារសេអ៊ីអា គឺជាអ្នករៀបចំឲ្យមានរដ្ឋប្រហារនេះ។ កាលពីពេលថ្មីៗនេះទៀត លោក អ៊ែរដូហ្កាន់ ប្រធានាធិបតីតួកគី ថែមទាំងបានចោទប្រកាន់ត្រង់ៗទៅលើសហរដ្ឋអាមេរិក និងបណ្តាប្រទេសនៅអឺរ៉ុបថា ជាអ្នកគាំទ្រភេរវជន និងគាំទ្រការប៉ុនប៉ងធ្វើរដ្ឋប្រហារនៅតួកគី។
ទាំងនេះកំពុងតែធ្វើឲ្យទំនាក់ទំនង រវាងអាមេរិក និងតួកគី ត្រូវធ្លាក់ក្នុងសភាពដ៏សែនតានតឹង នៅក្នុងពេលដែលអាមេរិកកំពុងតែត្រូវការតួកគីខ្លាំង នៅក្នុងយុទ្ធនាការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម។ បច្ចុប្បន្ននេះ អាមេរិកប្រើមូលដ្ឋានទ័ពអាកាសរបស់តួកគី នៅក្នុងប្រតិបត្តិការទម្លាក់គ្រាប់បែកលើទីតាំងក្រុមជីហាតរដ្ឋអ៊ីស្លាមនៅស៊ីរី ដែលជាប្រទេសមានព្រំដែនជាប់នឹងប្រទេសតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ