សហភាពអឺរ៉ុប បរិហារការកាត់ទោសប្រហារជីវិតមនុស្ស១៨៣នាក់ របស់តុលាការអេហ្ស៊ីប
ភ្លាមៗបន្ទាប់ពីតុលាការអេហ្ស៊ីប នៅថ្ងៃចន្ទម្សិលមិញ សម្រេចកាត់ទោសប្រហារជីវិតមនុស្សចំនួន១៨៣នាក់ ពីបទថាបានសម្លាប់ប៉ូលីសអេហ្ស៊ីប១៣នាក់ កាលពីខែសីហា ឆ្នាំ២០១៣នោះមក សហភាពអឺរ៉ុបបានចេញមុខបរិហារភ្លាមពីការកាត់ទោសនេះ។ សហភាពអឺរ៉ុបថា ការសម្រេចរបស់តុលាការអេហ្ស៊ីប គឺរំលោភលើកាតព្វកិច្ចសិទ្ធិមនុស្សអន្ដរជាតិរបស់ប្រទេសអេហ្ស៊ីបផ្ទាល់។
ចុះផ្សាយនៅថ្ងៃ៖
ស្តាប់ - ០១:៤៦
ការកាត់ទោសប្រហារជីវិតជនជាប់ចោទចំនួន១៨៣នាក់ តាមរយៈសវនាការដ៏ធំមហាសាល របស់តុលាការអេហ្ស៊ីបនៅថ្ងៃចន្ទ ទី០២ខែកុម្ភៈ គឺជាការរំលោភលើកាតព្វកិច្ចសិទ្ធិមនុស្សអន្ដរជាតិរបស់ប្រទេសអេហ្ស៊ីប។ នេះជាអ្វីដែលសហភាពអឺរ៉ុបសរសេរនៅក្នុងសេចក្ដីថ្លែងការណ៍របស់ខ្លួន ចេញផ្សាយនៅថ្ងៃចន្ទទី០២ខែកុម្ភៈ។
សេចក្ដីថ្លែងការណ៍ដដែលបានរំលឹកថា សហភាពអឺរ៉ុបប្រឆាំងចំពោះការដាក់ទណ្ឌកម្មរបស់តុលាការអេហ្ស៊ីប។ និងថា ការសម្រេចនោះ វាមានលក្ខណៈសាហាវ និងអមនុស្សធម៌ ព្រមទាំងបង្ហាញពីភាពបរាជ័យរបស់អេហ្ស៊ីប ក្នុងការបង្ហាញគំរូល្អសម្រាប់ប្រទេសដទៃទៀត។
ក្រៅពីសហភាពអឺរ៉ុប សហរដ្ឋអាមេរិកក៏សម្ដែងក្ដីព្រួយបារម្ភយ៉ាងខ្លាំង អំពីការសម្រេចរបស់តុលាការអេហ្ស៊ីបចំពោះករណីនេះផងដែរ។ អ្នកនាំពាក្យក្រសួងការបរទេសអាមេរិក លោកស្រី Jen Psaki មានប្រសាសន៍ថា ការស៊ើបអង្កេតដ៏យុត្តិធម៌ និងការពិនិត្យលើភស្ដុតាងនានា គឺពិបាកនឹងទៅរួចណាស់ សម្រាប់សវនាការដែលមានទំហំធំ កាត់ទោសជនជាប់ចោទ១៨៣នាក់នៅក្នុងពេលតែមួយដូច្នេះ។
ទោះជាយ៉ាងណាក៏ដោយ សាលក្រមរបស់តុលាការអេស៊ីបកាលពីថ្ងៃចន្ទទី០២ខែកុម្ភៈ នៅតែអាចប្ដឹងជំទាស់ទៅសាលាឧទ្ធរណ៍បាននៅឡើយ។ សូមរំលឹកថា ជនជាប់ចោទចំនួន១៨៣នាក់ ត្រូវបានកាត់ទោសប្រហារជីវិតពីបទថាបានសម្លាប់ប៉ូលីសអេហ្ស៊ីប១៣នាក់ នៅជិតទីក្រុងគែរ កាលពីថ្ងៃទី១៤ ខែសីហាឆ្នាំ២០១។ ការស្លាប់របស់ប៉ូលីសទាំង១៣នាក់នេះ កើតឡើងនៅក្នុងការប៉ះទង្គិចរវាងប៉ូលីសនិងក្រុមបាតុករគាំទ្រលោកអតីតប្រធានាធិបតីម័រស៊ី។ នៅថ្ងៃជាមួយគ្នានោះដែរ បាតុករគាំទ្រលោកម័រស៊ីរាប់រយនាក់ត្រូវបានសម្លាប់នៅក្នុងការបំបែកជំរុំធំ២កន្លែងរបស់ពួកគេ ក្នុងទីក្រុងគែរនោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ