អេហ្ស៊ីប៖តុលាការបានសម្រេចចាត់ទុកចលនាអេហ្ស៊ីឌីន អាល់ កាសាម ជាអង្គការភេរវនិយម
នៅថ្ងៃសៅរិ៍ ទី៣១ មករា តុលាការក្នុងប្រទេសអេហ្ស៊ីបបានសម្រេចចាត់ទុកចលនាអេហ្ស៊ីឌីន អាល់ កាសាម (Ezzedine-al-Qassam) ដែលជាសាខាយោធារបស់ចលនាហាម៉ាស់ប៉ាឡេស្ទីនថា ជាអង្គការភេរវនិយម។ ប្រតិកម្មភ្លាមៗ ចលនាហាម៉ាស់បានទុកការសម្រេចចិត្តរបស់តុលាការអេហ្ស៊ីបថា មានលក្ខណៈនយោបាយប្រកបដោយគ្រោះថ្នាក់។ រីឯចលនាអេហ្ស៊ីឌីនខ្លួនឯងនៅមិនទាន់បានបញ្ចេញប្រតិកម្មអ្វីទំាងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ដំបូងគួរជម្រាបជូនថា ការសម្រេចរបស់តុលាការទីក្រុងគែរនៃប្រទេសអេហ្ស៊ីបយ៉ាងដូច្នេះបានធ្វើឡើង ក្រោយពីមានបណ្តឹងរបស់មេធាវីម្នាក់ដែលបានចោទចលនាអេហ្ស៊ីឌីន អាល់ កាសាម (Ezzedine-al-Qassam) ពីបទបានជាប់ពាក់ព័ន្ធដោយផ្ទាល់នៅក្នុងអំពើភេរវកម្មក្នុងឧបទ្វីបស៊ីណៃនាពេលកន្លងមក។ ទន្ទឹមគ្នានេះ រូបមេធាវីដដែលក៏បានចោទសាខាយោធារបស់ចលនាហាម៉ាស់ប៉ាឡេស្ទីនមួយនេះពីបទបានប្រើរូងក្រោមដីដោយខុសច្បាប់នៅតាមបណ្តោយព្រំដែនរវាងប្រទេសអេហ្ស៊ីប និងតំបន់ហ្កាហ្សាដែនដីប៉ាឡេស្ទីនដើម្បីរត់ពន្ធអាវុធ និងវាយប្រហារលើកម្លំាងប៉ូលិស និងទាហានក្នុងទឹកដីអេហ្ស៊ីប។ នៅមុនប្រទេសអេហ្ស៊ីប ចលនាអេហ្ស៊ីឌីន អាល់ កាសាមនេះក៏ត្រូវបានអាមេរិក និងអ៊ីស្រាអែលចាត់ទុកជាចលនាភេរវនិយមដែរ។
ប្រតិកម្មភ្លាមៗ ចលនាហាម៉ាស់ដែលកំពុងគ្រប់គ្រងតំបន់ហ្គាហ្សាក្នុងដែនដីប៉ាឡេស្ទីនបានចាត់ទុកការសម្រេចចិត្តរបស់តុលាការអេហ្ស៊ីបថា ជាការសម្រេចចិត្តនយោបាយប្រកបដោយគ្រោះថ្នាក់ និងដែលមានគោលដៅបម្រើប្រយោជបន៍ឲ្យអ៊ីស្រាអែលតែមួយគត់។ រីឯចលនា ចលនាអេហ្ស៊ីឌីន អាល់ កាសាមដែលជាអ្នករងគ្រោះថ្នាក់ផ្ទាល់វិញនៅមិនទាន់បានបញ្ចេញប្រតិកម្មអ្វីទំាងអស់មកទល់ពេលនេះ។ សូមជម្រាបជូនថា តំាងពីកងទ័ពអេហ្ស៊ីបបានធ្វើរដ្ឋប្រហារទម្លាក់លោកប្រធានាធិបតីម័រស៊ីក្នុងខែកក្កដា ឆ្នំា ២០១៣ មក រដ្ឋអំណាចថ្មីនៅអេហ្ស៊ីបតែងតែចោទចលនាហាម៉ាស់ថា បានគំាទ្រ និងជួយជាកម្លំាងដល់ចលនាអេហ្ស៊ីឌីន អាល់ កាសាមឲ្យបង្កើនការវាយប្រហារប្រឆំាងសន្តិសុខនៅឧបទ្វីបស៊ីណៃ។
កាលពីខែមីនាកន្លងទៅ របបថ្មីនៅអេហ្ស៊ីបបានហាមសកម្មជនរបស់ចលនាហាម៉ាស់មិនឲ្យធ្វើសកម្មភាពអ្វីទំាងអស់នៅលើទឹកដីអេហ្ស៊ីប ព្រមទំាងបញ្ជាឲ្យបិទខ្ទប់លុយកាក់របស់ពួកគេដែលមាននៅអេហ្ស៊ីប។ គួររម្លឹកជូនឡើងវិញថា ពិតមែនតែអេហ្ស៊ីបបានដាក់គំនាបយ៉ាងខ្លំាងលើចលនាអ៊ីស្លាមនិយមជ្រុលរបស់ប៉ាឡេស្ទីនមួយនេះក៏ដោយ ក៏អេហ្ស៊ីបធ្លាប់បាន និងកំពុងបន្តដើរតួនាទីយ៉ាងសំខាន់នៅក្នុងជម្លោះរវាងអ៊ីស្រាអែល និងប៉ាឡេស្ទីន និយាយជារួម និងរវាងអ៊ីស្រាអែល និងចលនាហាម៉ាស់ និយាយដោយឡែក។ ថ្មីៗនេះ អេហ្ស៊ីបបានធ្វើជាអាជ្ញាកណ្តាលក្នុងសង្រ្គាមនៅតំបន់ហ្គាហ្សាដែនដីប៉ាឡេស្ទីនរវាងអ៊ីស្រាអែល និងចលនាហាម៉ាស់នារដូវក្តៅកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ