បារាំងមានប្រជាជនជាប់ចំណាប់ថ្នូរច្រើនជាងគេលើពិភពលោក
គ្រួសារបារាំងមួយមានសមាជិក៧នាក់ ក្នុងនោះបួននាក់ជាកុមារ ត្រូវបានក្រុមប្រដាប់អាវុធ ចាប់ជំរិត ជាចំណាប់ថ្នូរ នៅថ្ងៃអង្គារទី ១៩ កុម្ភៈ ម្សិលមិញ នៅភាគខាងជើងប្រទេសកាមឺរ៉ូន។ ឧប្បវហេតុនេះបានធ្វើឱ្យក្លាយជាប្រទេសមានប្រជាជានជាប់ចំណាប់ថ្នូរនៅបរទេសច្រើនជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
មានគ្នា៧នាក់ ចាស់បីនាក់ កុមារបួននាក់ (៥-១២ឆ្នាំ) ដើរកំសាន្តតាមរថយន្ត គ្រួសារបារាំងមួយគ្រួនេះ ត្រូវបានក្រុមប្រដាប់អាវុធ៥នាក់ ជិះម៉ូតូ គៀងចាប់នៅព្រឹកថ្ងៃអង្គារម្សិលមិញ នៅតំបន់ភាគខាងជើងបំផុតប្រទេសកាមេរ៉ូន ចម្ងាយប្រមាណ ១០គីឡូម៉ែត្រពីប្រទេសនីហ្សេរីយ៉ា។
ពេលនេះគេពុំទាន់ស្គាល់ច្បាស់ អត្តសញ្ញាណ របស់ភេរវជន និងមូលហេតុនៃការចាប់ចំណាប់ថ្នូរគ្រួសារបារាំងនេះ នៅឡើយទេ ប៉ុន្តែចំណាប់អារម្មណ៍កំពុងផ្តោតទៅលើក្រុម បូកូហារ៉ាម (Boko Haram)។ ប្រធានាធិបតីបារាំង លោក François Hollande ធ្លាប់បានលើកឡើងពីនិកាយសាសនាមួយនេះ និងបានបង្ហើបពីគ្រោះនៃការចាប់ចំណាប់ថ្នូរ ក្នុងខណៈដែលបារាំងធ្វើអន្តរាគមន៍យោធានៅម៉ាលី។ ប៉ុន្តែនេះជាលើកទីមួយដែលមានការចាប់ជំរិតបរទេសក្នុងតំបន់ភាគខាងជើងកាមេរ៉ូនដូច្នេះ។
តើការចាប់ខ្លួនជនជាតិបារាំងនេះមានពាក់ព័ន្ធនឹងសង្គ្រាមនៅម៉ាលី ?!
ក្រសួងការបរទេសបារាំងបានចេញសេចក្តីណែនាំដល់អ្នកធ្វើដំណើរបារាំងទាំងអស់ តាំងពីយុទ្ធនាការនៅម៉ាលីចាប់ផ្តើមភ្លាមម្ល៉េះ ថាផលប្រយោជន៍បារាំងអាចនឹងត្រូវទទួលការគំរាមកំហែង! អាជ្ញាធរបារាំងក៏បានបញ្ជាក់ពីវត្តមានរបស់ពួកយុទ្ធជនបូកូហារ៉ាម នៅភាគខាងជើងប្រទេសម៉ាលី ហើយពួកអ៊ីស្លាមជ្រុលនិយមនីហ្សេរ៉ាក៏ធ្លាប់បានចាប់ខ្លួនជនបុគ្គលិកក្រុមហ៊ុនលីបង់ ដោយពន្យល់ត្រង់ៗថាជាការសងសឹកប្រឆាំងនឹងអន្តរាគមន៍បារាំងនៅម៉ាលី។
ភាគខាងជើងប្រទេសកាមេរ៉ូនមិនមែនជាតំបន់គ្រោះថ្នាក់ខ្លាំងទេ បើតាមក្រសួងការបរទេសបារាំង ប៉ុន្តែទីតាំងរបស់បូកូហារ៉ាមនេហ្សេរីយ៉ា មិននៅឆ្ងាយប៉ុន្មានពីកន្លែងដែលចាប់ខ្លួនជនជាតិបារាំងម្សិលមិញឡើយ។
បើតាមមជ្ឈមណ្ឌលស្រាវជ្រាវសន្តិសុខអាមេរិក Intel Center media list បារាំងមានជនជាប់ចំណាប់ថ្នូរនៅបរទេស (នៅអាហ្វ្រិក) ទាំងអស់ចំនួន១៥នាក់ ក្នុងនោះយ៉ាងហោចណាស់៦នាក់ ស្ថិតក្នុងកណ្តាប់ដៃពួកភេរវជនអ៊ីស្លាម Aqmi ស្និទ្ធនឹងអាល់កៃដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ