ប្រធានាធិបតីបារាំងអញ្ជើញទៅបំពេញទស្សនកិច្ចនៅម៉ាលី
ប្រធានាធិបតី បារាំងលោក François Hollande ត្រូវអញ្ជើញទៅប្រទេសម៉ាលីនៅថ្ងៃសៅរ៍២កុម្ភៈ២០១៣នេះ និងអមដំណើរដោយរដ្ឋមន្ត្រីបារាំង៣រូបគឺលោកLaurent Fabius រដ្ឋមន្ត្រីក្រសួងការបរទេសលោក Jean-Yves Le Drian រដ្ឋមន្ត្រីក្រសួងការពារជាតិនិងលោក Pascal Canfin រដ្ឋមន្ត្រីទទួលបន្ទុកផ្នែកអភិវឌ្ឍន៍។ ជាដំណើរទស្សនកិច្ចមួយដែលនឹងនាំប្រមុខរដ្ឋបារាំងនិងម៉ាលីទៅកាន់ភាគខាងជើងប្រទេសម៉ាលីដែលពួកឧទ្ទាមអ៊ីស្លាមជ្រុល និយមប្រដាប់អាវុធមួយភាគ លាក់ខ្លួននៅតំបន់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
៣សប្តាហ៍ក្រោយពីអន្តរាគមន៍យោធាបារាំងតាំងពីលើកដំបូង លោក François Hollande ដែលជាប្រមុខកងទ័ពដែរនោះ ត្រូវអញ្ជើញទៅដល់ប្រទេសម៉ាលីនៅថ្ងៃសៅរ៍ទី២កុម្ភៈ២០១៣ នេះក្នុងគោលដៅពីរយ៉ាង។ ជាបឋម លោកប្រមុខរដ្ឋបារាំង ត្រូវជួបសន្ទនាជាមួយនឹងឥស្សនជននយោបាយម៉ាលី ហើយមុនគេ គឺលោកប្រធានាធិបតី Dioncounda Traoré ដែលនឹងទទួលស្វាគមន៍ប្រមុខរដ្ឋបារាំងនៅទីក្រុងBamako នេះបើយោងតាមវិមានប្រធានាធិបតីម៉ាលី។គោលដៅទីពីរគឺលោក François Hollande ត្រូវអញ្ជើញទៅស្វាគមន៍និងសួរសុខទុក្ខដល់កងយោធាបារាំងដែលមានចំនួនជិត៣៥០០នាក់ ដាក់ពង្រាយនៅក្នុងប្រទេសម៉ាលី។
លោកប្រធានាធិបតីបារាំងនឹង អញ្ជើញទៅជានិមត្តរូបដើម្បីស្វាគមន៍កងទ័ពអាហ្វ្រិកMisma ដែលកំពុងដាក់ពង្រាយនៅម៉ាលីដែរ។ នៅទីក្រុងបាម៉ាកូ លោក Hollande ត្រូវថ្លែងសន្ទរកថាជាសារនយោបាយមួយនៅឱកាសទទួលទានអាហារថ្ងៃត្រង់សំរាប់ការងារមួយជាមួយប្រធានាធិបតីម៉ាលី។លោករំពឹងទុកដែរថា ប្រជាជនម៉ាលីនឹងចាប់ផ្តើមធ្វើការចរចានយោបាយមួយយ៉ាងឆាប់រហ័សនៅមុនពេលធ្វើការផ្សះផ្សាជាតិ។ ការចរចាដើម្បីផ្សះផ្សាជាតិនេះហើយដែលជាអាទិភាពដ៏ចំបងរបស់លោកប្រធានាធិបតីម៉ាលី។
មួយវិញទៀត ក្រុមបច្ចេកទេសនានា ក៏បានប្រុងប្រៀបហើយដែរតាំងពីជាច្រើនថ្ងៃកន្លងមកហើយសំរាប់ដំណើរទស្សនកិច្ចនេះ។ ពីព្រោះ លោក Hollande និងលោក Traoré ត្រូវអញ្ជើញទៅកាន់តំបន់ Tombouctou ដែលនៅទីនោះប្រមុខរដ្ឋម៉ាលីនិងបារាំងនឹងអញ្ជើញទៅទស្សនានៅវិហារអ៊ីស្លាម Djingareyber ដ៏ល្បីឈ្មោះមួយនៅក្នុងទីក្រុងនិងនៅមជ្ឍមណ្ឌលឯកសារ Ahmed Baba ដែលនៅទីនេះ ក៏មានសស្តា្រខ្លះៗចំណាស់រហូតសតវត្ស៍ទី១៣។
ទស្សនកិច្ចនៅទីក្រុងនិមត្តរូប Tombouctou ដែលជាបេតិកភ័ណ្ឌពិភពលោករបស់មនុស្សជាតិ និងជាពិសេសត្រូវទទួលរងការខូចខាតដោយសារស្នាដៃក្រុមឧទ្ទាមអ៊ីស្លាមជ្រុលនិយម ពិតជានឹងធ្វើឲ្យឮសូរល្បីខ្ទរខ្ទារឥតគុណនានិងរឹតតែបង្កើនកំរិតប្រជាប្រិយភាពរបស់ប្រធានាធិបតីទាំងពីរប្រទេសបារាំងនិងម៉ាលីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ