ក្រិកលក់ទ្រព្យសម្បត្តិរដ្ឋដើម្បីផ្គាប់ចិត្តប្រទេសអឺរ៉ុប ម្ចាស់បំណុល
រដ្ឋាភិបាលថ្មីរបស់ក្រិកដែលនាយករដ្ឋមន្រ្តីGeorge Papandréouរៀបចំកាលពីថ្ងៃសុក្រ ត្រូវប្រឈមនឹងការបោះឆ្នោតទំនុកចិត្ត នៅល្ងាចថ្ងៃអង្គារ ទី ២១ មិថុនា។ នៅក្នុងស្ថានភាពដែលខ្លួនបាត់បង់សឹងទាំងស្រុងនូវប្រជាប្រិយភាព និងទំនុកចិត្តពីប្រជាជន រដ្ឋាភិបាលក្រិកត្រូវបន្តអនុវត្តវិធានការត្បិតត្បៀតថវិកា ដើម្បីអាចបំពេញចិត្តសហភាពអឺរ៉ុប។ អឺរ៉ុបដែលនឹងអាចឲ្យក្រិកខ្ចីលុយបន្ថែម ប្រសិនបើក្រិកព្រមចាត់វិធានការតឹងរ៉ឹងលើចំណាយថវិការដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ដើម្បីអាចខ្ចីលុយបន្ទាន់ ១២ពាន់លានអឺរ៉ូពីសហភាពអឺរ៉ុប ក្រិកត្រូវឆ្លងកាត់វិញ្ញាសាដ៏តឹងតែងមួយ។ នោះមានន័យថា ប្រសិនបើរដ្ឋាភិបាលថ្មីទទួលការបោះឆ្នោតទុកចិត្ត នៅសភា រដ្ឋាភិបាលក្រិកនឹងមានសង្ឃឹមទទួលបានការគាំទ្រពីសភា ដើម្បីអាចប្រកាស នៅដើមសប្តាហ៍ក្រោយ ពីផែនការនយោបាយត្បិតត្បៀតថវិកា គឺកាត់បន្ថយចំណាយឲ្យបាន២៨ ពាន់ លានអឺរ៉ូ។
ក្រិកត្រូវចាត់វិធានការត្បិតត្បៀតថវិកា និងកំណែទម្រង់សេដ្ឋកិច្ចស៊ីជម្រៅដើម្បីអាចបានទទួលកម្ចីបន្ថែមពីសហភាពអឺរ៉ុប និង ពីមូលនិធិរូបិយវត្ថុអន្តរជាតិ IMF។ នៅចុងសប្តាហ៍មុន រដ្ឋមន្រ្តីសេដ្ឋកិច្ចរបស់អឺរ៉ុប មិនទាន់សម្រេចចិត្តឲ្យក្រិកខ្ចីលុយបន្ថែម និងលើកពេលការពិភាក្សា រហូតដល់ពេលណារដ្ឋាភិបាលក្រិកព្រមកាត់បន្ថយចំណាយបន្ថែមទៀត និងបង្កើតកម្មវិធីឯកជនភាវូបនីយកម្ម។
ទីក្រុងអាថែនត្រៀមខ្លួនរួចហើយ ដើម្បីដាក់លក់អចលនទ្រព្យរដ្ឋ ដូចជាព្រលានយន្តហោះ ផ្លូវលើអាកាស សហគ្រាសរដ្ឋ អាជ្ញាប័ណ្ណល្បែង និងរួមទាំងធនាគារផង ធ្វើយ៉ាងម៉េចដើម្បីបង្ហាញដល់ប្រទេសផ្តល់ប្រាក់កម្ចីថា ក្រិកខំប្រឹងធ្វើកំណែទម្រង់ស៊ីជម្រៅ។
គម្រោងត្បិតត្បៀតថវិកាចុងក្រោយ ដែលធ្វើឲ្យប្រជាជនក្រិកមិនសប្បាយចិត្ត និងធ្វើបាតុកម្មតាមផ្លូវ នៅប៉ុន្មានសប្តាហ៍នេះ គឺការកាត់បន្ថយកម្លាំងពលកម្ម នៅសហគ្រាសអគ្គិសនីរដ្ឋ។
រដ្ឋមន្រ្តីសេដ្ឋកិច្ចនៅអឺរ៉ុបវាយតម្លៃថា ប្រសិនបើប្រទេសក្រិកមិនចាត់វិធានការត្បិតត្បៀតថវិកាទេ សេដ្ឋកិច្ចប្រទេសនេះ នឹងក្ស័យធន។ ប៉ុន្តែ ក្នុងដំណាក់កាលបច្ចុប្បន្ននេះ ប្រជាជនក្រិកជាច្រើនចង់ឲ្យរដ្ឋក្ស័យធន ជាជាង វិធានការត្បិតត្បៀតដែលដាក់ទណ្ឌកម្មបន្ថែមទៀត ទៅលើប្រជាជនក្រិកដែលមានជីវភាពដុនដាបរួចទៅហើយ។
រដ្ឋក្រិកបានខ្ចីលុយ១១០ពាន់លានអឺរ៉ូ ម្តងរួចហើយ ពីសហភាពអឺរ៉ុប និងពីមូលនិធិរូបិយវត្ថុអន្តរជាតិ នៅឆ្នាំមុន ដើម្បីយកទៅសងបំណុលគេ។ ឆ្នាំនេះ ក្រិកត្រូវការខ្ចីលុយបន្ថែមដើម្បី យកទៅសងបំណុលដែលខ្លួននៅជំពាក់គេវ័ណ្ឌក។ គេប្រមាណថា ប្រជាជនក្រិកម្នាក់ជាប់បំណុល ជំពាក់គេ បីម៉ឺនអឺរ៉ូ។ ម្ចាស់បំណុលរបស់ក្រិកគ្មាននរណាក្រៅពីធនាគារនៅអឺរ៉ុប និងជាពិសេសធនាគារកណ្តាលអឺរ៉ុបទេ។
សហភាពអឺរ៉ុបមិនអាចបោះបង់ចោលក្រិក ដែលជាសមាជិកមួយ ក្នុងចំណោមប្រទេសប្រើប្រាស់លុយអឺរ៉ូទាំង ១៧។ បោះបង់ចោលក្រិក គឺរឹតតែធ្វើឲ្យតំបន់អឺរ៉ូជួបវិបត្តិ។ រដ្ឋមន្រ្តីសេដ្ឋកិច្ចប្រទេសនៅអឺរ៉ុបបានគ្រោងរួចហើយថា ប្រសិនបើក្រិកអនុវត្តនយោបាយត្បិតត្បៀត ដូចការគ្រោងទុក គេនឹងប្រមូលប្រាក់ក្នុងចំនួនដូចមុន គឺប្រមាណ ជាង ១០០ពាន់លានអឺរ៉ូឲ្យក្រិកខ្ចី។
នៅពេលនេះ គេបារម្ភថា លុយដែលរដ្ឋាភិបាលក្រិកខ្ចី នឹងមិនផ្តល់ប្រយោជន៍ដល់ប្រជាជនទេ ប៉ុន្តែ សម្រាប់តែចម្រើនដល់ម្ចាស់ធនាគារ និងអ្នកលេងភាគហ៊ុនតែប៉ុណ្ណោះ។ អ្នកវិភាគខ្លះយល់ថា ក្រិកមិនត្រឹមតែមិនបានទទួលជំនួយស្រោចស្រង់សេដ្ឋកិច្ចខ្លួនពិតប្រាកដ ប៉ុន្តែ ក្រិកត្រូវបានប្រើប្រាស់ដើម្បីបូជាខ្លួន ស្រោចស្រង់តំបន់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ