ថ្ងៃទី២៨មេសា បានក្លាយជា « ទិវាសុវត្ថិភាពនិងសុខភាព ពិភពលោក នៅកន្លែងធ្វើការ » តាំងពីឆ្នាំ១៩៩៦មក។ ប៉ុន្តែទើបតែនៅឆ្នាំ២០០៣ប៉ុណ្ណោះ ដែលអង្គការពលកម្មអន្តរជាតិបានផ្តួចផ្តើមប្រារព្ធទិវានេះ ជាទូទៅនៅពេញពិភពលោក ដើម្បីជំរុញឲ្យមានការគិតគូរដល់សុវត្ថិភាព ក្នុងពេលបំពេញការងារ ដោយឈរលើទស្សនៈការពារប្រសើរជាងព្យាបាល។ ការពារប្រឆាំងនឹងគ្រោះថ្នាក់ក្នុងពេលធ្វើការ ការពារកុំឲ្យមានជំងឺព្រោះការងារ។
ក្នុងឱកាសទិវាសុវត្ថិភាពការងារពិភពលោក ឆ្នាំ2011នេះ អង្គការសុខភាពពិភពលោក និងការិយាល័យពលកម្មអន្តរជាតិ បានបោះផ្សាយរបាយការណ៍ជាតួលេខនៃគ្រោះថ្នាក់ក្នុងការងារ។ បើយោងតាមរបាយការណ៍នេះ មានបុគ្គលិក កម្មករ អ្នកធ្វើការចំនួន ២លាន២សែននាក់ស្លាប់ ជារៀងរាល់ឆ្នាំ ពោលគឺ៥ពាន់នាក់ក្នុងមួយថ្ងៃ នៅលើពិភពលោក ដោយហេតុតែគ្រោះថ្នាក់ ឬជំងឺក្នុងក្របខ័ណ្ឌការងារ។
អត្រាអ្នកស្លាប់ និងអ្នកឈឺព្រោះការងារ កើនឡើងជាលំដាប់ ព្រោះតែភាពជឿនលឿន និងលូតលាស់ខ្លាំងក្នុងវិស័យឧស្សាហកម្ម។ ចំណែកឯគ្រោះថ្នាក់មិនស្លាប់នៅកន្លែងធ្វើការវិញ មានប្រមាណជាជិត ២៦៨លានករណី ក្នុងមួយឆ្នាំៗ។ ហេតុដូច្នេះហើយបានជាអង្គការសុខភាពពិភពលោក និងការិយាល័យពលកម្មអន្តរជាតិ អំពាវនាវឲ្យមានការអភិវឌ្ឍន៍ និងបណ្តុះបណ្តាលវប្បធម៌ការពារសុវត្ថិភាពសុខភាព។
នៅក្នុងប្រទេសជឿនលឿន និន្នាការនៃគ្រោះថ្នាក់ដល់ជីវិតក្នុងការងារបានថយចុះ ប៉ុន្តែនៅក្នុងប្រទេសកំពុងអភិវឌ្ឍន៍វិញ នៅទ្វីបអាស៊ី និងអាមេរិកឡាទីនវិញ អត្រាគ្រោះថ្នាក់កើនឡើងគួរឲ្យព្រួយបារម្ភ។
គ្រោះថ្នាក់ដល់ជីវិតបានថយចុះ ក្នុងប្រទេសឧស្សាហកម្មរីកចម្រើនខ្លាំង ក៏ពិតមែន ប៉ុន្តែរោគាដែលបង្កឡើងដោយការងារ កើនឡើងនៅគ្រប់ទិសទីទាំងអស់។ ជំងឺដែលគេជួបប្រទះញឹកញាប់ជាងគេ មានដូចជា ជំងឺផ្លូវចិត្ត ជំងឺមហារីក (បង្កឡើងដោយការប្រឈមមុខសារធាតុគីមីពុល) រលាកសាច់ដុំឬឆ្អឹង ជំងឺផ្លូវដង្ហើម រលាកសួត ខូចត្រចៀក (ថ្លង់) ស្ទះសរសៃឈាម (ជំងឺសរសៃឈាម) ជំងឺឆ្លង ។ល។ និង។ល។ និងនៅមានច្រើនទៀត។
បើតាមរបាយការណ៍នេះដដែល វិស័យកសិកម្ម ដែលស្រូបយកកម្លាំងពលកម្មបានពាក់កណ្តាល និងដែលជាដង្ហើមសេដ្ឋកិច្ចដ៏សំខាន់របស់ប្រទេសក្រីក្រកំពុងអភិវឌ្ឍន៍ភាគច្រើននោះ បានសម្លាប់ជីវិតមនុស្ស ប្រមាណ៧ម៉ឺននាក់ក្នុងមួយឆ្នាំ ដោយមូលហេតុ ពុលថ្នាំសម្លាប់សត្វល្អិត។ នេះគេមិនបានរាប់បញ្ចូលចំនួនអ្នកស្លាប់ដោយមូលហេតុផ្សេងទៀត និងមិនបានគិតពីចំនួនអ្នករងគ្រោះកើតជំងឺរ៉ាំរ៉ៃដ៏សន្ធឹកសន្ធាប់ទៀតផងទេ។
ប្រសិនបើយើងស្តាប់របាយការណ៍របស់អង្គការសុខភាពពិភពលោកនេះហើយ យើងពិតជាចោទសួរ ថា ចុះតើស្ថានភាពសុខភាព និងសុវត្ថិភាពការងារនៅក្នុងប្រទេសកម្ពុជាវិញយ៉ាងណាដែរ ? ដោយសារប្រធានបទនេះ មានលក្ខណៈធំទូលំទូលាយពេក នៅថ្ងៃនេះ នាងខ្ញុំសូមផ្តោតទៅលើតែករណីកម្មករកម្មការិនីកាត់ដេរ
សូមអញ្ជើញស្តាប់បទសម្ភាសន៍របស់នាងខ្ញុំជាមួយលោក វេជ្ជបណ្ឌិត អ៊ាត មរកត អ្នកទទួលខុសត្រូវការផ្តល់សេវាសុខាភិបាលអង្គការGret ដែលជាការចាក់ផ្សាយឡើងវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ