កម្ពុជា៖ ថៃ មានចេតនាប្រើប្រាស់អាវុធវាយប្រហារកម្ពុជា
ក្រោយការវាយឆ្មក់សាជាថ្មីពីទាហានថៃ រដ្ឋមន្ត្រីការបរទេសកម្ពុជាលោកឧបនាយករដ្ឋមន្ត្រី ហោ ណាំងហុងធ្វើលិខិតប្តឹងទៅប្រទេសឥណ្ឌូណេស៊ីភ្លាមនៅថ្ងៃនេះ។ លោក ហោ ណាំហុង បានស្នើអោយរដ្ឋមន្ត្រីការបរទេសឥណ្ឌូណេស៊ី ក្នុងនាមជាប្រធានអាស៊ាន ជូនដំណឹងទៅក្រុមប្រឹក្សាសន្តិសុខអង្គការសហប្រជាជាតិ អំពីការវាយប្រហាររបស់ទាហានថៃមកលើកម្ពុជា។ ប្រតិកម្មពីសហរដ្ឋអាមេរិកក៏បានធ្លាក់មកភ្លាមដែរនៅថ្ងៃនេះ។ អាមេរិកអំពាវនាវអោយភាគីទាំង២អត់ធ្មត់ជាអតិបរិមាដើម្បីចៀសវាង ការផ្ទុះអាវុធ តទៀតនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប្រមុខការទូតខ្មែរលោក ហោ ណាំហុង បានអត្ថាធិប្បាយប្រាប់ប្រធានអាស៊ាន គឺរដ្ឋមន្ត្រីការបរទេសឥណ្ឌូណេស៊ី លោកMarty Natalegawaថា ការវាយប្រហាររបស់ទាហាន ថៃមកលើកម្ពុជា នៅពេលនេះ មិនត្រឹមតែជាការរំលោភលើរាល់ឧបករណ៍ផ្លូវច្បាប់ទាំងឡាយដែលកម្ពុជាធ្លាប់លើកយកមកបង្ហាញនោះឡើយ តែវាក៏ជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងសេចក្តីប្រកាសរបស់ក្រុមរដ្ឋមន្ត្រីការបរទេសអាស៊ាន ដែលអំពាវនាវអោយមានការឈប់បាញ់ជាអចិន្ត្រៃយ៍ផងដែរ។
នៅក្នុងលិខិតដែលកម្ពុជាបានសរសេរប្តឹងទៅប្រធានអាស៊ាន និងផ្ញើទៅរដ្ឋមន្ត្រីការបរទសនៃប្រទេសជាសមាជិកអាស៊ានផងនោះ លោក ហោ ណាំហុង បានបញ្ជាក់ថា ការវាយប្រហាររបស់ទាហានថៃនេះ បានកំពុងកើតឡើងនៅចំពេលដែលអាស៊ានកំពុងអន្តរាគមជួយរកដំណោះស្រាយសម្រាប់ជម្លោះយោធានៃប្រទេសទាំងពីរ ហើយថា សកម្មភាពវាយប្រហារដោយចេតនារបស់ទាហានថៃ ក៏បានបង្ហាញអោយឃើញថា ហេតុអ្វីបានជាថៃបដិសេធមិនទទួលយកបែបបទការងាររបស់ក្រុមអ្នកសង្កេតការណ៍ឥណ្ឌូណេស៊ីនោះ។ លោកហោ ណាំហុងបានបន្តនៅក្នុងលិខិតកម្រាស់២ទំព័រជាភាសាអង់គ្លេសថា ការដែលថៃទទូចចង់ដោះស្រាយជម្លោះជាមួយកម្ពុជាដោយទ្វេភាគីនោះ គឺជាលេសមួយរបស់ថៃដើម្បីប្រើប្រាស់កំលាំងយោធាដែលមានបំពាក់ដោយអាវុធទំនើបនោះ មកលើកម្ពុជាតែប៉ុណ្ណោះ។ ប៉ុន្តែថា កម្ពុជាសូមប្រើសិទ្ធិស្វ័យការពារប្រឆាំងការវាយប្រហារដែលគិតទុកជាមុននេះ។
ប្រមុខការទូតកម្ពុជាបានស្នើអោយរដ្ឋមន្ត្រីការបរទេសឥណ្ឌូណេស៊ីជូនដំណឹងស្តីពីការវាយប្រហារសាជាថ្មីរបស់ទាហានថៃមកលើកម្ពុជា ទៅក្រុមប្រឹក្សាសន្តិសុខអង្គការសហប្រជាជាតិដោយអនុលោមទៅតាមសេចក្តីសម្រេចរបស់ខ្លួន កាលពីថ្ងៃទី១៤កុម្ភៈ។
នៅថ្ងៃនេះដែរ អ្នកនាំពាក្យស្ថានទូតអាមេរិកប្រចាំកម្ពុជាក៏បានសម្តែងការព្រួយបារម្ភ ចំពោះជម្លោះប្រដាប់អាវុធនៃកងទ័ពកម្ពុជា-ថៃនៅព្រំដែនដូចគ្នា។ អ្នកនាំពាក្យស្ថានទូតអាមេរិកថ្លែងថា សហរដ្ឋអាមេរិកបន្តជំរុញអោយភាគីទាំងពីរអនុវត្តការអត់ធ្មត់ជាអតិបរិមា ហើយប្រើប្រាស់គ្រប់មធ្យោបាយទាំងអស់ដើម្បីបន្ថយភាពតានតឹង និងចៀសវាងការផ្ទុះអាវុធនៅពេលខាងមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ