កម្ពុជារង់ចាំមើលរដ្ឋាភិបាលក្រុងបាងកក ក្រោយសភាថៃថាកំណត់ហេតុប្រជុំព្រំដែនមិនបាច់ឆ្លងសភា
សភាចម្រុះរបស់ថៃបានសម្រេច នៅថ្ងៃអង្គារនេះថា កំណត់ហេតុទាំង៣នៃកិច្ចប្រជុំគណៈកម្មការវាស់វែងព្រំដែនកម្ពុជា-ថៃនោះ នឹងមិនត្រូវការឆ្លងកាត់ការអនុម័តរបស់សភានោះទេ។ សេចក្តីសម្រេចបែបនេះ ដូចគ្នាទៅនឹងតុលាការធម្មនុញ្ញថៃ ដែលបានពន្យល់ថា ឯកសារកំណត់ហេតុទាំង៣នេះមិនមានពាក់ព័ន្ធនឹងមាត្រា១៩០ នៃធម្មនុញ្ញថៃ ដែលចែងថា រាល់ឯកសារដែលទាក់ទងបូរណភាពទឹកដី ត្រូវឆ្លងកាត់អនុម័តពីសភា។ ប្រសិនបើឯកសារកំណត់ហេតុនេះមិនត្រូវឆ្លងកាត់សភានោះ តើរដ្ឋាភិបាលក្រុងបាងកកប្រកាសទទួលស្គាល់កំណត់ហេតុទាំងនេះ ហើយបន្តការពិភាក្សាទៅមុខទៀតឬយ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុច ពីភ្នំពេញ
កាសែតថៃ បាងកកប៉ុស្ត៍ បានផ្សាយ នៅថ្ងៃអង្គារទី១៩មេសានេះថា សភាចម្រុះថៃបានអនុម័តដកបញ្ហាកំណត់ហេតុទាំងបី នៃកិច្ចប្រជុំគណៈកម្មការចម្រុះព្រំដែនកម្ពុជា-ថៃកន្លងមក ចេញពីរបៀបវារៈនៃរដ្ឋសភា។ ការសម្រេចរបស់សភាថៃនៅពេលនេះ ធ្វើឡើងដូចគ្នានឹងការសម្រេចរបស់ក្រុមប្រឹក្សារដ្ឋ និងតុលាការធម្មនុញ្ញរបស់ថៃ ដែលបានពន្យល់ថា កំណត់ហេតុទាំងបីនេះមិនពាក់ព័ន្ធនឹងខ្លឹមសារ នៃមាត្រា១៩០របស់រដ្ឋធម្មនុញ្ញថៃ ដែលបញ្ញត្តអោយមានការអនុម័តពីសភា លើរាល់ឯកសារទាំងឡាយដែលទាក់ទងនឹងបូរណភាពទឹកដីនោះ។
កំណត់ហេតុទាំង៣ គឺជាលទ្ធផលនៃកិច្ចប្រជុំរវាងគណៈកម្មការចម្រុះវាស់វែងព្រំដែនកម្ពុជា-ថៃ ៣លើកកន្លងមក នៅកម្ពុជា និងនៅប្រទេសថៃ ដែលរដ្ឋាភិបាលថៃបានអះអាងថា ត្រូវដាក់ឯកសារនេះឆ្លងកាត់រដ្ឋសភា ស្របតាមរដ្ឋធម្មនុញ្ញ។ ប្រការនេះបានធ្វើអោយកម្ពុជារង់ចាំប្រទេសថៃ២ឆ្នាំហើយ ដើម្បីអាចបន្តការប្រជុំពិភាក្សាទៅមុខទៀត។
អ្នកនាំពាក្យក្រសួងការបរទេសកម្ពុជា លោកកុយ គួងបានបញ្ជាក់ថា នេះគឺជានីតិវិធីផ្ទៃក្នុងរបស់ថៃ ដែលលោកសុំមិនធ្វើអត្ថាធិប្បាយ។ ប៉ុន្តែ បើតាមលោកកុយ គួងដដែល ប្រសិនបើ កំណត់ហេតុនៃកិច្ចប្រជុំគណៈកម្មការព្រំដែននឹងមិនត្រូវការឆ្លងកាត់សភា ហើយរដ្ឋាភិបាលថៃមានឆន្ទៈក្នុងការដោះស្រាយវិបត្តិព្រំដែននោះ ប្រការនេះនឹងពិតជាជំរុញការពិភាក្សាអំពីវិបត្តិព្រំដែនអោយលឿនទៅមុខមិនខាន។ ទោះយ៉ាងណាក៏ដោយ កម្ពុជានៅប្រកាន់លក្ខខណ្ឌរបស់ខ្លួនដដែល នោះគឺ ចាប់ពីពេលនេះទៅ រាល់កិច្ចប្រជុំជាមួយថៃ ក្នុងសំណុំរឿងព្រំដែននេះ ត្រូវតែធ្វើឡើងតាមការកោះអញ្ជើញរបស់ប្រធានអាស៊ាន ឬភាគីទី៣ជាសាក្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ