អង្គការសហប្រជាជាតិទាញសញ្ញាអាសន្នស្តីពីគ្រោះទុរភិក្សនៅអាហ្រ្វិក
អង្គការសហប្រជាជាតិបានកោះប្រជុំបន្ទាន់មួយ នៅថ្ងៃចន្ទ ទី ២៥កក្កដា ២០១១ នៅទីក្រុងរ៉ូម ប្រទេសអ៊ីតាលី ទៅតាមការទទូចសុំរបស់អង្គការស្បៀងអាហារពិភពលោក និងទៅតាមការស្នើសុំរបស់ប្រទេសបារាំង ដែលកំពុងធ្វើជាប្រធានក្រុមប្រទេសមហាឧស្សាហកម្មទាំង២០។ គោលដៅនៃការប្រជុំ គឺប្រមូលឲ្យបានថវិកាដើម្បីជួយសង្រ្គោះប្រជាជននៅអាហ្រ្វិកខាងកើត ដែលកំពុងជួបគ្រោះរាំងស្ងួត និងគ្រោះទុរភិក្ស។ អគ្គលេខាធិការអង្គការសហប្រជាជាតិ បានអំពាវនាវរកជំនួយថវិកា ១ពាន់ ៦រយលានដុល្លារ ដើម្បីជួយដោះស្រាយបន្ទាន់ គ្រោះអត់ឃ្លាន ក្នុងប្រទេសសូម៉ាលី ប៉ុន្តែ រហូតមកដល់ពេលនេះ គេរកបានជំនួយប្រមាណតែពាក់កណ្តាលប៉ុណ្ណោះ។ នៅទីកន្លែងផ្ទាល់ កាកបាទក្រហមអន្តរជាតិបានប្រើឧទ្ធម្ភាគចក្រ កាលពីថ្ងៃអាទិត្យ ដើម្បីបោះ ចែកចាយអាហារូបត្ថម្ភ ជាង ៤០០តោន ទៅឲ្យប្រជាជន នៅសូម៉ាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០១
“គ្រោះមហន្តរាយដែលមិនធ្លាប់មានពីមុនមក” និង “គ្រោះរាំងស្ងួតប្រវត្តិសាស្រ្ត” នេះជាពាក្យប៉ុន្មានម៉ាត់ដែលអ្នកជំនាញខាងចំណីអាហារពិភពលោកអាចនិយាយពិពណ៌នាពីអ្វីដែលកំពុងកើតមាន នៅក្នុងប្រទេសទាំងប្រាំមួយ នៅអាហ្រ្វិកខាងកើត។ គ្រោះរាំងស្ងួតនៅអាហ្រ្វិកខាងកើត ត្រូវគេចាត់ទុកថា ធ្ងន់ធ្ងរ ព្រោះកើតមានជាប់ៗគ្នា ក្នុងរយៈពេល ពីរឆ្នាំ ចុងក្រោយនេះ ដែលគេមិនធ្លាប់ជួបប្រទះទេ ក្នុងរយៈពេល ៦០ឆ្នាំចុងក្រោយនេះ។ ប្រទេសដែលប៉ះពាល់ខ្លាំងជាងគេ គឺសូម៉ាលី។
នៅក្នុងប្រទេសកេនយ៉ា អេត្យូពី អ៊ូហ្គង់ដា ស៊ូដង់ ជីប៊ូទី ជាពិសេស សូម៉ាលី តែម្តង ដោយសារតែមានភ្លៀងធ្លាក់បន្តិចបន្តួច ឬក៏គ្មានទឹកភ្លៀងមួយគ្រាប់សោះ ប្រជាជនមិនអាចធ្វើកសិកម្មបាន ចំណែកចំណីអាហារដែលស្តុកទុកកន្លងមក បានខើច កាន់តែខ្លាំង ឬក៏អស់ពីក្នុងស្តុកតែម្តង។
គ្រោះរាំងស្ងួតបានធ្វើឲ្យជនជាតិអាហ្រ្វិក ភាគខាងកើត ជាង ១២លាននាក់ ក្នុងចំណោម៩០លាននាក់ ត្រូវការជំនួយអាហារូបត្ថម្ភជាបន្ទាន់។ បើតាមអង្គការសហប្រជាជាតិ ដោយសារគ្រោះរាំងស្ងួត និងអត់អាហារ មនុស្សជាច្រើនពាន់នាក់បានស្លាប់ ក្នុងរយៈពេលប៉ុន្មានសប្តាហ៍ចុងក្រោយនេះ។ គេអាចវាយតម្លៃថា ជួបគ្រោះទុរភិក្ស ដោយមើលទៅលើចំនួនកុមារខ្វះអាហារូបត្ថម្ភដែលកើនឡើងខ្ពស់ជាង ៣០ភាគរយ និងកុមារ ២នាក់ ក្នុងចំនោម១ម៉ឺននាក់ស្លាប់ជារៀងរាល់ថ្ងៃ។
គ្រោះទុរភិក្ស ដែលកើតមានទៅស្ត្រី និងកុមារ ច្រើនជាងគេ កំពុងលេចចេញ នៅក្នុងតំបន់ពីរ នៃភាគខាងត្បូងប្រទេសសូម៉ាលី។ ក្នុងប្រទេសក្រីក្រមួយនេះ មន្រ្តីជំនាញរបស់អង្គការសហប្រជាជាតិវាយតម្លៃ ថា យ៉ាងហោច ណាស់កុមារ៦នាក់ ក្នុងចំណោមកុមារ មួយម៉ឺននាក់ ស្លាប់ជារៀងរាល់ថ្ងៃ ដោយសារគ្រោះអត់ឃ្លាន។ ដែលនេះជាចំនួនមួយខ្ពស់ពីកម្រិតធម្មតា។ ចំណែកកុមារមនុស្សចាស់ និងកុមារផ្សេងទៀតនៅតែខ្វះអាហារូបត្ថម្ភ។
បច្ចុប្បន្ននេះ គេប្រមាណថា គ្រោះអត់ឃ្លាននឹងរីករាលដាលយ៉ាងឆាប់រហ័ស ទៅក្នុងប្រទេសជិតខាងផ្សេងទៀត ប្រសិនបើ អន្តរជាតិមិនផ្តល់ជំនួយបានទាន់ពេលវេលា។ ព្រោះថា ប្រជាជនសូម៉ាលីដែលជួបគ្រោះរាំងស្ងួត និងអត់ឃ្លាន បានរត់ចាកចេញពីប្រទេស ទៅជ្រកកោន ក្នុងប្រទេសកេនយ៉ា ឬអេត្យូពីដែលកំពុងតែជួបគ្រោះរាំងស្ងួត ធ្ងន់ធ្ងររួចទៅហើយ។
ប្រជាជនអាហ្រ្វិកដែលជួបគ្រោះអត់ឃ្លាន ដោយសារតែពួកគេរងគ្រោះដោយការរាំងស្ងួត។ ខ្វះទឹកភ្លៀង ដោយសារបញ្ហាអាកាសធាតុជារឿងមួយ ប៉ុន្តែ ទន្ទឹមគ្នានេះ គេបានមើលឃើញយ៉ាងច្បាស់ បរាជ័យរបស់រដ្ឋាភិបាលប្រទេសអាហ្រ្វិក ដែលមិនខ្វល់ផ្តល់ថវិកាសម្រាប់វិស័យកសិកម្ម និងកសាងប្រព័ន្ធធារាសាស្រ្ត។
ក្នុងទសវត្សរ៍ទី ៨០ ប្រទេសអេត្យូពីជួបគ្រោះរាំងស្ងួត និងគ្រោះទុរភិក្សរហូតសម្លាប់មនុស្សមួយលាននាក់។ ចំណែកក្នុងសូម៉ាលី វិញ ក្នុងទសវត្សរ៍ទី៩០ គ្រោះអត់ឃ្លានបានធ្វើឲ្យមនុស្សជាង ២សែននាក់បាត់បង់ជីវិត។
ប្រទេសនៅអាហ្រ្វិកខាងកើតធ្លាប់រងគ្រោះរាំងស្ងួតម្តងហើយ ក្នុងចន្លោះពីឆ្នាំ ២០០០ដល់ឆ្នាំ ២០០៦។ ភាពរាំងស្ងួត និងគ្រោះអត់ឃ្លានលើកនេះបានកាត់បន្ថយកម្លាំងពលកម្មមនុស្ស និងសម្លាប់សត្វច្រើនម៉ឺនក្បាល។
គេសង្កេតឃើញថា គ្រោះអត់ឃ្លានកើតមានភាគច្រើន ក្នុងប្រទេសអាហ្រ្វិកដែលមានញាំញីដោយសង្គ្រាមស៊ីវិល ឬកំពុងជួបអស្ថិរភាពនយោបាយ និងសង្គម។ ជួបគ្រោះរាំងស្ងួត និងគេចចេញពីសង្រ្គាមស៊ីវិល រ៉ាំរ៉ៃក្នុងស្រុក ប្រជាជនអាហ្រ្វិកនៅត្រូវរត់ភៀសខ្លួន ធ្វើការបម្លាស់ទី មិនឈប់ឈរ ដែលធ្វើឲ្យពួកគេ បាត់បង់ដីមិនអាចធ្វើកសិកម្ម និងធ្លាក់ខ្លួនកាន់តែក្រីក្រ ក្នុងពេលដែលចំណីអាហារកាន់តែឡើងថ្លៃ គឺកើនឡើងជាង ៣០០ភាគរយ ក្នុងរយៈពេលប៉ុន្មានខែចុងក្រោយនេះ។
សង្រ្គាមស៊ីវិល និងជម្លោះក្នុងតំបន់រវាងរដ្ឋាភិបាល និងពួកឧទ្ទាមរឹតតែបង្កការលំបាក មិនអាចឲ្យអង្គការមនុស្សធម៌ចូលទៅជួយជនរងគ្រោះដោយអត់អាហារបាន។ ឧទាហរណ៍ តំបន់ភាគខាងត្បូង ប្រទេសសូម៉ាលី ពួកឧទ្ទាម All Shabab ដែលជាបណ្តាញរបស់ពួកអាល់កៃដា នៅអាហ្រ្វិក និងប្រឆាំងនឹងរដ្ឋាភិបាល បានរារាំងមិនឲ្យក្រុមជំនួយមនុស្សធម៌ចូលទៅជួយប្រជាជនដែលរងគ្រោះដោយទុរភិក្ស។ ពួកនេះនៅធ្លាប់បានអះអាងថា មិនមានគ្រោះអត់ឃ្លាន ក្នុងតំបន់របស់ខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ