ឥណ្ឌា៖ គ្មានការប្រឈមមុខជាមួយអាមេរិកទេ ក្រោយរឿងរ៉ាវបណ្តេញអ្នកការទូតប្រទេសទាំង២
បន្ទាប់ពីឥណ្ឌាបានបណ្តេញអ្នកការទូតអាមេរិកម្នាក់ ចេញពីទឹកដីខ្លួន នៅថ្ងៃសុក្រកន្លងទៅ នៅថ្ងៃសៅរ៍នេះ រដ្ឋមន្ត្រីការបរទេសឥណ្ឌាបានប្រាប់ទៅអ្នកសារព័ត៌មានថា គ្មានការប្រឈមមុខអ្វីរវាងឥណ្ឌា ជាមួយសហរដ្ឋអាមេរិកនោះទេ។ គួររំលឹកថា កាលពីថ្ងៃសុក្រកន្លងទៅ ឥណ្ឌាបានទាមទារអោយអ្នកការទូតអាមេរិកមួយរូប ចាកចេញពីទឹកដីខ្លួន។ ការទាមទារនេះ ធ្វើឡើងបន្ទាប់ពីអាមេរិកបានដាក់ពិរុទ្ធស្ត្រីការទូតឥណ្ឌាមួយរូប ហើយបានបណ្តេញស្ត្រីការទូតរូបនោះ ចេញពីទឹកដីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
នៅឥណ្ឌា ថ្ងៃសៅរ៍នេះ លោក Salman Khurshid សាល់ម៉ាន ខឺស្ហ៊ីដ ជារដ្ឋមន្ត្រីក្រសួងការបរទេសឥណ្ឌា បានថ្លែងប្រាប់អ្នកសារព័ត៌មានថា គ្មានការប្រឈមមុខណាមួយរវាងឥណ្ឌានិងសហរដ្ឋអាមេរិកនោះទេ។ លោក ខឺស្ហ៊ីដ បន្ថែមទៀតថា ប្រសិនបើមានបញ្ហា នោះប្រទេសទាំងពីរនឹងធ្វើការដោះស្រាយរួមគ្នា។
ការលើកឡើងនេះ ចំពេលដែលរដ្ឋាភិបាលឥណ្ឌា ទើបតែបានបណ្តេញអ្នកការទូតអាមេរិកមួយរូប ប្រចាំក្រុងញូវដេល្លី នៅថ្ងៃសុក្រកន្លងទៅ អោយចាកចេញពីទឹកដីឥណ្ឌា។ ទង្វើនេះ បង្ហាញពីការសងសឹករបស់ឥណ្ឌា ប្រឆាំងតបរដ្ឋាភិបាលអាមេរិក ដែលហ៊ានបណ្តេញស្ត្រីការទូតខ្លួនមួយរូប ចេញពីទឹកដីអាមេរិក កាលពីថ្ងៃព្រហស្បតិ៍។ តុលាការអាមេរិក បានដាក់ពិរុទ្ធស្ត្រីការទូតឥណ្ឌាប្រចាំក្រុងញូវយក ឈ្មោះ ដេវយ៉ានី ខូប្រាហ្កាដេ ពីបទបានធ្វើសេចក្តីបញ្ជាក់ក្លែងក្លាយទាក់ទងនឹងទិដ្ឋាការស្ត្រីបំរើការងារផ្ទះខ្លួនមួយរូប។ លោកស្រីខូប្រាហ្កាដេ ក៏ជាប់ចោទពីបទ បានកេងប្រវញ្ចប្រាក់ខែស្ត្រីបំរើការងារផ្ទះនោះផងដែរ។ ក្រុងវ៉ាស៊ីនតោនបានចេញអភ័យឯកសិទ្ធិអោយដល់លោកស្រី ខូប្រាហ្កាដេ ដើម្បីអោយគាត់អាចចាកចេញពីទឹកដីអាមេរិកបាន។
ដោយសាររឿងរ៉ាវស្ត្រីការទូតនេះ ឥណ្ឌាមានការខឹងសម្បារខ្លាំងជាមួយអាមេរិក ហើយបានចាត់វិធានការសងសឹកច្រើនរួចមកហើយ។ នៅថ្ងៃសុក្រកន្លងទៅ រដ្ឋាភិបាលអាមេរិកបានសំដេងការសោកស្តាយយ៉ាងជ្រាលជ្រៅ ដែលបានបណ្តេញស្ត្រីការទូតឥណ្ឌាចេញពីទឹកដីខ្លួន។ ទន្ទឹមនោះដែរ អាមេរិកបានបង្ហាញគោលបំណងចង់អោយទំនាក់ទំនងរវាងអាមេរិកនិងឥណ្ឌា អាចឈានទៅរកភាពប្រសើរឡើងវិញ។ ក្នុងក្រសែភ្នែកក្រុងវ៉ាស៊ីនតោន ឥណ្ឌាជាដៃគូពិសេសមួយ នៅអាស៊ី នៅចំពោះមុខប្រទេសមហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ