អ៊ីរ៉ង់អាចនាំចេញឧស្ម័នទៅអឺរ៉ុប ជំនួសរុស្ស៊ី?
ចុះផ្សាយនៅថ្ងៃ៖
ស្តាប់ - ០៥:០២
កាលពីដើមខែឧសភាមុននេះ រដ្ឋមន្ត្រីប្រេងអ៊ីរ៉ង់ លោក ប៊ីចាន់ ណាំដា ហ្សាន់ហ្កាណេក បានប្រកាសថា អ៊ីរ៉ង់ត្រៀមខ្លួននឹងបញ្ជូនឧស្ម័នអោយអឺរ៉ុប ប្រសិនបើរុស្ស៊ីសម្រេចបញ្ឈប់ការផ្គត់ផ្គង់ឧស្ម័នដល់អឺរ៉ុប ដោយសារតែវិបត្តិអ៊ុយក្រែននោះ។ អ៊ីរ៉ង់ជាប្រទេសសំបូរធនធានឧស្ម័នបំផុតក្នុងពិភពលោក បន្ទាប់ពីរុស្ស៊ី។ បើប្រទេសលោកខាងលិចសម្រាលទណ្ឌកម្មសេដ្ឋកិច្ចប្រឆាំងកម្មវិធីនុយក្លេអ៊ែរអ៊ីរ៉ង់ តើអ៊ីរ៉ង់មានសមត្ថភាពគ្រប់គ្រាន់ ក្នុងការផ្គត់ផ្គង់ឧស្ម័នអោយអឺរ៉ុប ជំនួសរុស្ស៊ីបានទេ ?
រុស្ស៊ីនិងអ៊ីរ៉ង់ជាប្រទេសដៃគូនឹងគ្នា ក្នុងសំណុំរឿងអន្តរជាតិក្តៅគគុកមួយចំនួន បែបយ៉ាងវិបត្តិសង្គ្រាមនៅស៊ីរី។ រុស្ស៊ីនិងអ៊ីរ៉ង់គាំទ្ររដ្ឋាភិបាលស៊ីរី ដូចគ្នា។ ទោះយ៉ាងនេះក្តី នៅពេលនេះ ពេលរុស្ស៊ីកំពុងឈ្លោះគ្នាជាមួយបណ្តាប្រទេសនៅអឺរ៉ុប ក្នុងសំណុំរឿងអ៊ុយក្រែន ដែលជាបញ្ហាគម្រាមការផ្គត់ផ្គង់ឧស្ម័នដល់អឺរ៉ុបនោះ អ៊ីរ៉ង់កំពុងសម្លឹងមើលទីផ្សារឧស្ម័ននៅអឺរ៉ុប ព្រោះថា អ៊ីរ៉ង់ក៏ជាប្រទេសសំបូរធនធានឧស្ម័នធំបំផុតក្នុងលោកដែរ។ អ៊ីរ៉ង់ជាប្រទេសសំបូរឧស្ម័នលំដាប់ទី២ បន្ទាប់ពីរុស្ស៊ី។
កាលពីខែឧសភាមុននេះ រដ្ឋាភិបាលអ៊ីរ៉ង់ប្រាប់ថា ត្រៀមខ្លួននាំឧស្ម័នចេញទៅអឺរ៉ុប ប្រសិនបើរុស្ស៊ីឈប់ផ្គត់ផ្គង់ឧស្ម័នអោយអឺរ៉ុបទៀត។ ថ្មីៗនេះដែរ រដ្ឋមន្ត្រីឧស្សាហកម្មអ៊ីរ៉ង់ លោកម៉ូហាម៉ាត រេហ្សា នេម៉ាហ្សាដេក ប្រាប់ថា អ៊ីរ៉ង់គ្មានបំណងប្រជែងជាមួយរុស្ស៊ីរឿងឧស្ម័នទេ ប៉ុន្តែ អ៊ីរ៉ង់ដឹងថា អឺរ៉ុបត្រូវការឧស្ម័នចាំបាច់ ដូច្នេះ អ៊ីរ៉ង់ចង់មានចំណែកក្នុងរឿងនេះដែរ។ ប្រាកដណាស់ អ៊ីរ៉ង់ក៏បានសម្លឹងឃើញដែរថា អឺរ៉ុបបានបង់ថ្លៃឧស្ម័នអោយរុស្ស៊ី ដល់ទៅ៣ពាន់៥រយលានអឺរ៉ូ ជារៀងរាល់ខែ។ ក្នុង៩ខែចុងក្រោយ នៃឆ្នាំ២០១៣កន្លងទៅ សហភាពអឺរ៉ុបបានទិញប្រេងនិងឧស្ម័នពីរុស្ស៊ី ក្នុងតម្លៃដល់១៥៦ពាន់លានដុល្លារ។ នេះជាទឹកប្រាក់នេះ ដ៏មហាសាល ដូច្នេះ អ៊ីរ៉ង់ពិតជាចង់បានចំណែកក្នុងរឿងរកស៊ីផ្នែកប្រេងនិងឧស្ម័ននេះដែរហើយ។ ដោយសារមូលហេតុនេះហើយ មើលទៅ ទើបនៅខែឧសភាមុននេះ គេសង្កេតឃើញរដ្ឋាភិបាលអ៊ីរ៉ង់បើកទ្វារចំហរដល់សហគ្រាសបរទេសចំនួន៦០០ ទទួលបន្ទុកខាងថាមពល និងចង់រកស៊ីផ្តោតលើផ្នែកប្រេង។
បញ្ហាចោទពេលនេះ គឺទណ្ឌកម្មសេដ្ឋកិច្ចដែលអាមេរិក និងប្រទេសលោកខាងលិច ដាក់ប្រឆាំងកម្មវិធីនុយក្លេអ៊ែរអ៊ីរ៉ង់ ដែលជាឧបសគ្គរាំងស្ទះដល់ការធ្វើពាណិជ្ជកម្មឧស្ម័ន។ កន្លងមក អ៊ីរ៉ង់បានខិតខំបង្ហាញបំណងល្អ ទៅប្រទេសលោកខាងលិច ដោយយល់ព្រមអោយទីភ្នាក់ងារថាមពលបរមាណូអន្តរជាតិបានចូលទៅត្រួតពិនិត្យទីតាំងនុយក្លេអ៊ែរក្នុងស្រុក។ ដូច្នេះ អឺរុបនិងអាមេរិកក៏ប្រហែលជាអាចបន្ធូរបន្ថយទណ្ឌកម្មមួយកម្រិតថែមទៀត ក្នុងពេលឆាប់ៗនេះ ពិសេសពេលដែលកិច្ចចរចានុយក្លេអ៊ែរអ៊ីរ៉ង់ រវាងអ៊ីរ៉ង់និងប្រទេសមហាអំណាច៥+១ ជិតឈានដល់ដំណាក់កាលចុងក្រោយ ដែលតម្រូវអោយគ្រប់ភាគីចរចា សម្រេចអោយបានកិច្ចព្រមព្រៀង នៅមុនថ្ងៃ២០កក្កដានោះ។
អ៊ីរ៉ង់ជាប្រទេសចំបងដែលផ្គត់ផ្គង់ឧស្ម័នធម្មជាតិអោយតួកគី។ ដូច្នេះ បើអឺរ៉ុបបន្ថយទណ្ឌកម្មសេដ្ឋកិច្ចច្រើនដល់អ៊ីរ៉ង់ ហើយត្រូវទិញឧស្ម័នពីអ៊ីរ៉ង់នោះ អ៊ីរ៉ង់អាចនឹងប្រើបំពង់បង្ហូរឧស្ម័នអោយតួកគីនោះ ដើម្បីបញ្ជូនឧស្ម័នអោយអឺរ៉ុបដែរ។ ប៉ុន្តែ យោងតាមអ្នកជំនាញ អ៊ីរ៉ង់នៅជួបបញ្ហាច្រើន ដែលពិបាកនឹងសម្រេចការនាំចេញប្រេងនិងឧស្ម័នទៅអោយអឺរ៉ុប ពិបាកនឹងដណ្តើមទីផ្សារឧស្ម័នពីរុស្ស៊ី។ បញ្ហាគឺថា ការផ្គត់ផ្គង់ឧស្ម័នរបស់អ៊ីរ៉ង់នៅមានកម្រិត។ លើសពីនេះ អ៊ីរ៉ង់មានតម្រូវការ ឧស្ម័ន និងប្រេងក្នុងស្រុកខ្ពស់។ អ៊ីរ៉ង់សំបូរឧស្ម័នធម្មជាតិក្តី ឧស្សាហកម្មឧស្ម័នក្នុងស្រុកនៅខ្វះខាត និងត្រូវការការវិនិយោគខ្ពស់។ ហេតុនេះ អ៊ីរ៉ង់បាននាំចូលឧស្ម័នពីប្រទេសតួកមេនីស្ថាន ប្រមាណ៧ពាន់លានម៉ែត្រគូបក្នុងមួយឆ្នាំៗ។
បញ្ហាមួយទៀត ដើម្បីនាំឧស្ម័នអ៊ីរ៉ង់ចូលអឺរ៉ុប អឺរ៉ុបត្រូវតែកសាងហេដ្ឋារចនាសម្ព័ន្ធផ្នែកកែច្នៃឧស្ម័ន ក្នុងទឹកដីអ៊ីរ៉ង់។ ការសាងសង់ហេដ្ឋារចនាសម្ព័ន្ធនេះ ត្រូវការថវិកាខ្ពស់ ហើយពិសេសទៀតនោះ គឺពេលវេលាច្រើន។ យើងអាចលើកយកប្រទេសកាតាមកធ្វើជាឧទាហរណ៍បាន។ កាលពីឆ្នាំ២០០១ កាតាបានពន្លឿននយោបាយផ្នែកឧស្ម័ននេះ ប៉ុន្តែទម្រាំតែអាចសាងហេដ្ឋារចនាសម្ព័ន្ធផ្នែកកែច្នៃឧស្ម័នបាន កាតាត្រូវចាំរហូតដល់ឆ្នាំ២០១០រឺឆ្នាំ២០១១ឯណោះ ពោលគឺត្រូវចាំជិត១០ឆ្នាំ។ ដូច្នេះ ហេដ្ឋារចនាសម្ព័ន្ធអ៊ីរ៉ង់ក៏ត្រូវការចាំយូរទៀតដែរ ទម្រាំអឺរ៉ុបអាចនាំឧស្ម័នពីអ៊ីរ៉ង់ចូលស្រុកបាន ខណៈរុស្ស៊ី មានហេដ្ឋារចនាសម្ព័ន្ធ និងរបៀបរៀបរយឥតខ្ចោះរួចស្រេចទៅហើយ។ បញ្ហាមួយទៀតដែរ គឺថា អ៊ីរ៉ង់នៅខ្វះបច្ចេកទេសការងារ ដើម្បីដឹងថា តើត្រូវផ្តល់អាទិភាពដល់ផ្នែកបំពង់បង្ហូរឧស្ម័ន រឺក៏ផ្នែកកែច្នៃឧស្ម័នធម្មជាតិ។
អ៊ីរ៉ង់នៅមានគុណវិបត្តិមួយទៀតដែរ គឺអត្តចរិត ក្នុងការរកស៊ីជាមួយបរទេស។ ថ្វីបើរដ្ឋាភិបាលថ្មីដឹកនាំដោយលោករ៉ូហានី បើកចំហរចំពោះប្រទេសលោកខាងលិចក្តី អ៊ីរ៉ង់នៅមិនទាន់អាចអោយប្រទេសលោកខាងលិចទុកចិត្តបាននៅឡើយ។ ជាក់ស្តែង កន្លងមក រដ្ឋាភិបាលបានលុបចោលកិច្ចសន្យាតម្លៃដល់ទៅ២ពាន់៥រយលានដុល្លារ ជាមួយក្រុមហ៊ុនប្រេងចិនមួយ ដែលត្រូវធ្វើការអភិវឌ្ឍន៍កន្លែងប្រេងមួយ នៅអ៊ីរ៉ង់។ មូលហេតុគឺដោយសារតែក្រុមហ៊ុនចិន យឺតយ៉ាវផ្នែកការងារមួយចំនួន។
នេះបង្ហាញថា អ៊ីរ៉ង់មិនចេះអនុគ្រោះ មិនខ្លាចនឹងកាត់ផ្តាច់ទំនាក់ទំនងជាមួយក្រុមហ៊ុនបរទេសទេ ប្រសិនបើក្រុមហ៊ុនបរទេសមិនអាចបំពេញសំណូមពរខ្លួនបាន។ នេះនៅមិនគិតពីអ្នកនយោបាយអភិរក្សនិយមអ៊ីរ៉ង់ជាច្រើនរូប ដែលរិះគន់ប្រទេសលោកខាងលិច ដែលមិនជឿជាក់ថាកិច្ចចរចាសំណុំរឿងនុយក្លេអ៊ែរជាមួយប្រទេសមហាអំណាចអាចឈានទៅរកជោគជ័យផងនោះ។ អ្នកនយោបាយទាំងនេះ បានអំពាវនាវអោយប្រជាជនធ្វើការអភិវឌ្ឍន៍ធនធានក្នុងស្រុកដោយខ្លួនឯង ដោយមិនចាំបាច់ពឹងផ្អែកបរទេស។ ដូច្នេះ ចង់ដណ្តើមការរកស៊ីឧស្ម័ននិងប្រេង ពីរុស្ស៊ី ក្នុងទីផ្សារអឺរ៉ុប ទាល់តែអ៊ីរ៉ង់កែប្រែជំហររឹងរូសចេញសិន ធ្វើយ៉ាងណាផ្តល់ទំនុកចិត្ត ដល់អ្នកវិនិយោគបរទេស។
ទោះយ៉ាងនេះក្តី សហភាពអឺរ៉ុបកន្លងមក បានបង្ហាញជំហរចង់ធ្វើការអភិវឌ្ឍន៍ប្រភពធនធានផ្សេងទៀត ពីឧស្ម័ន ដើម្បីចៀសវាងពឹងផ្អែកទាំងស្រុងលើឧស្ម័នរុស្ស៊ី។ ពេលនេះ ចង់ក្លាយជាប្រទេសចំបងបែបយ៉ាងរុស្ស៊ី ដើម្បីលក់ធនធានប្រេងរឺក៏ឧស្ម័នអោយអឺរ៉ុបនោះ អ៊ីរ៉ង់នៅមានផ្លូវដើរវែងឆ្ងាយទៀតណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ