អ៊ីរ៉ង់បរិហាររបាយការណ៍របស់អាមេរិកស្តីពីភេរវកម្ម
ក្រសួងការបរទេសអ៊ីរ៉ង់ កាលពីថ្ងៃព្រហស្បតិ៍ ទី ១មិថុនា បានរិះគន់របាយការណ៍ប្រចាំឆ្នាំរបស់អាមេរិក ថាមានលក្ខណៈលំអៀង។ នៅក្នុងរបាយការណ៍អាមេរិកស្តីពីអំពើភេរវកម្មឆ្នាំ ២០១៣ ដែលចេញផ្សាយកាលពីថ្ងៃពុធ ក្រសួងការបរទេសអាមេរិកនៅតែចាត់ទុកអ៊ីរ៉ង់ស្ថិតនៅបញ្ជីឈ្មោះប្រទេសដែលផលិតក្រុមភេរវជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នៅក្នុងរបាយការណ៍ប្រចាំឆ្នាំរបស់ក្រសួងការបរទេសអាមេរិក អ៊ីរ៉ង់ស្ថិតនៅក្នុងចំណោមប្រទេសបួន ជាមួយ គុយបា ស៊ីរី និងស៊ូដង់ ខាងជំនាញគាំទ្រក្រុមភេរវជន។ នៅក្នុងរបាយការណ៍នោះ ក្រសួងការបរទេសអាមេរិកបានគូសបញ្ជាក់ពីតួនាទីរបស់ទីក្រុងតេអេរ៉ង់ ក្នុងការផ្គត់ផ្គង់ហិរញ្ញវត្ថុដល់រដ្ឋាភិបាលស៊ីរី ដើម្បីប្រយុទ្ធប្រឆាំងនឹងក្រុមឧទ្ទាមប្រឆាំង។
នៅក្នុងសេចក្តីថ្លែងការណ៍ចេញផ្សាយកាលពីថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសបានចាត់ទុករបាយការណ៍របស់ក្រសួងការបរទេសអាមេរិកថា មានលក្ខណៈនយោបាយ និងធ្វើឡើងអត្តនោម័តិ។ ជាមួយគ្នានោះ អ្នកនាំពាក្យរបស់ក្រសួងការបរទេសអ៊ីរ៉ង់ចោទសួរ ផ្ទុញទៅវិញ ពីនយោបាយប្រឆាំងភេរវកម្មរបស់អាមេរិក ដែលរហូតមកដល់ពេលនេះបានសម្លាប់ជនស៊ីវិល ច្រើនជាងក្រុមភេរវជនពិតប្រាកដ។
ទីក្រុងតេអេរ៉ង់បានរិះគន់អាមេរិកផងដែរពីរឿងដកក្រុមប្រជាជនMoudjahidine ចេញពីបញ្ជីឈ្មោះក្រុមភេរវជន របស់ខ្លួន កាលពីឆ្នាំ ២០១២។ កាលពីឆ្នាំ២០០៨ អង់គ្លេស និងសហភាពអឺរ៉ុប បន្តបន្ទាប់គ្នា បានដកក្រុមនេះចេញពីបញ្ជីខ្មៅរបស់ខ្លួន។ ចលនាប្រជាជន Moudjahidine ដែលមានទីតាំងនៅបរទេស ជាក្រុមដែលបានសន្យាផ្តួលរំលំរដ្ឋាភិបាលអ៊ីស្លាមរបស់អ៊ីរ៉ង់ តាមផ្លូវសន្តិភាព។ ក្រុមនេះត្រូវបានសាធារណរដ្ឋអ៊ីស្លាម អ៊ីរ៉ង់ចោទប្រកាន់ថា បានរៀបចំការវាយប្រហារ គ្រាប់បែក និងសម្លាប់មនុស្ស និងហាមមិនឲ្យចូលក្នុងទឹកដីអ៊ីរ៉ង់។
អ៊ីរ៉ង់បានក្លាយជាផ្លូវការ រដ្ឋផលិតក្រុមភេរវជន នៅឆ្នាំ១៩៨៤ ពោលគឺនៅ៥ឆ្នាំ ក្រោយបាតុករអ៊ីរ៉ង់បានចូលចាប់ជាចំណាប់ខ្មាំង មន្រ្តីស្ថានទូត អាមេរិក នៅទីក្រុងតេអេរ៉ង់ កាលពីឆ្នាំ ១៩៧៩។ សម្រាប់អាមេរិក អ៊ីរ៉ង់ នៅតែប្រទេសដែលអាចគ្រោះថ្នាក់ដល់សន្តិសុខអាមេរិក ព្រោះថា អ៊ីរ៉ង់នៅតែគាំទ្រយ៉ាងសកម្មក្រុមភេរវជន ធ្វើសកម្មភាពទាំងឡាយដែលទាក់ទងនឹងអំពើភេរវកម្ម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ