លោក កាដាហ្វី បន្តផ្គើនអន្តរជាតិ និង បំផុសប្រជាជនឲ្យងើបតស៊ូ
ស្នូរកាំភ្លើង និងគ្រាប់ផ្ទុះ នៅតែបន្តលាន់ឮ នៅតាមចំណុចផ្សេងៗនៃរដ្ឋធានីទ្រីប៉ូលី ពេញមួយយប់ និងរហូតមកទល់ព្រឹកថ្ងៃពុធនេះទៀត។ កងកម្លាំងក្រុមអ្នកបះបោរ បានទទួលជ័យជម្នះជានិមិត្តរូប នៅថ្ងៃម្សិលមិញ ដោយវាយដណ្តើមយកបានទីបញ្ជាការដ្ឋានរបស់លោកកាដាហ្វី។ ប៉ុន្តែ ប្រមុខលីប៊ីរូបនេះ នៅតែមានសេរីភាព ព្រមទាំងបានប្រកូកប្រកាសឲ្យប្រជាជនទូទៅងើបឡើងតស៊ូប្រឆាំងនឹងចលនាបះបោរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ក្រុងទ្រីប៉ូលី ស្ថិតក្រោមការគ្រប់គ្រងរបស់ពួកអ្នកបះបោរស្ទើរតែទាំងស្រុងទៅហើយ ប៉ុន្តែសំឡេងរបស់លោក កាដាហ្វី ត្រូវបានគេស្តាប់ឮជាថ្មីនៅព្រឹកថ្ងៃពុធទី ២៤សីហានេះ តាមកញ្ចក់ទូរទស្សន៍ អំពាវនាវឲ្យប្រជាជនក្រុងទ្រីប៉ូលី ងើបឡើងតស៊ូបោសសម្អាតពួកអ្នកបះបោរប្រដាប់អាវុធ ចេញឲ្យអស់ពីរដ្ឋធានី។ សារចាក់ផ្សាយនេះ បានបញ្ជាក់បន្ថែមទៀតថា លោក កាដាហ្វី ពេលនេះកំពុងធ្វើសកម្មភាព និងដើរហើរដោយសេរីក្នុងទីក្រុង ដោយគ្មាននរណាឃើញរូបលោកឡើយ។
កងទ័ពស្មោះស្ម័គ្រនឹងលោកកាដាហ្វី បានដកខ្លួនចេញទីសេនាធិការដ្ឋាន Bab el Aziziya គឺជាតាក់តិចនៃការធ្វើសង្គ្រាមតែប៉ុណ្ណោះ ! នេះជាសារមួយទៀតរបស់ប្រមុខដឹកនាំប្រទេសលីប៊ី ដែលត្រូវបានគេចាក់ផ្សាយ កាលពីល្ងាចថ្ងៃអង្គារម្សិលមិញ។
ម្យ៉ាងវិញទៀត កូនប្រុសទីពីររបស់លោកកាដាហ្វី លោក Seif Al-Islam ដែលក្រុមប្រឹក្សាជាតិអន្តរកាលលីប៊ី អះអាងថាចាប់ខ្លួនបាន ស្រាប់តែលេចមុខជាថ្មី នៅតាមផ្លូវនាក្រុងទ្រីប៉ូលី នៅព្រឹកថ្ងៃពុធនេះ ជាហេតុធ្វើឲ្យតំណាងក្រុមអ្នកបះបោរ និងតុលាការព្រហ្មទណ្ឌអន្តរជាតិក្រុងឡាអេ ស្ថិតក្នុងស្ថានការណ៍ទើសទាល់បំផុត និងបដិសេធមិនធ្វើអត្ថាធិប្បាយអ្វីទាំងអស់នាពេលនេះ។
អ្វីដែលក្រុមបដិបក្ខទាំងពីរយល់ព្រមគ្នា នោះគឺសង្គ្រាមមិនទាន់ចប់ទេ ! របបលោកកាដាហ្វីបានបញ្ជូនទ័ពប្រមាណជាង៦ពាន់នាក់បន្ថែមទៀតមួយជួយទប់ទល់នៅក្រុងទ្រីប៉ូលី។ ឯចំណែកខាងក្រុមប្រឹក្សាជាតិអន្តរកាលវិញទទួលស្គាល់ថា ដរាបណាគេនៅមិនទាន់ខ្លួនលោក កាដាហ្វី បានទេ នោះសង្គ្រាមនៅតែបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ