ពួកឧទ្ទាមរឹតបន្តឹងគំនាបទៅលើទីក្រុងទ្រីប៉ូលី
នៅប្រទេសលីប៊ី ពួកឧទ្ទាមលីប៊ីបានប្រកាសនៅថ្ងៃសុក្រ ទី១៩ សីហា ម្សិលមិញនេះ ថា បានធ្វើ ការវាយលុកដ៏ធំធេង ប្រកបដោយជោគជ័យ ទៅ លើតំបន់ Zliten និងបានវាយយកបានកណ្តាល ក្រុង នេះ ដែលស្ថិតនៅចម្ងាយ ១៥០គម ពី ខាង កើតរដ្ឋធានីទ្រីប៉ូលី។ ទីក្រុង Zliten ដែលមានបណ្តាជនរស់នៅចំនួន ២០ម៉ឺននាក់ ត្រូវបានវាយដណ្តើមគ្នាតាំងពីជាច្រើនសប្តាហ៍មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
យុទ្ធជនជាង១២០០នាក់ តាំងពីព្រឹកព្រហាមបានវាយលុកទៅលើកងកម្លាំងប្រដាប់អាវុធរបស់លោកវរសេនីយឯក កាដាហ្វី នៅទីក្រុង Zliten។ការបាញ់ផ្លោងដោយកងកាំភ្លើងធំបានបើកផ្លូវឱ្យពួកឩទ្ទាមថ្មើរជើងដែលបានសំរេចក្នុងការរុលទៅមុខ៥គីឡូម៉ែត្រ ឆ្ពោះទៅកាន់ភាគខាងជើងនៃទីក្រុង តាមបណ្តោយឆ្នេរសមុទ្រ មុននឹងវាយយកបានកណ្តាលក្រុងនៅម្តុំម៉ោង១២ម៉ោងសកល។
ពួកអ្នកបះបោរបានទាំងប្រកាសដែរថា បានចាប់បានលោកវរសេនីយឯក Umran Ali Bin Saleem ជាមេក្រសួងស៊ើបការណ៍ផ្ទៃក្នុងនៃទីក្រុងZlitenដែលទទួលភារៈកំណត់ទីតាំងរបស់ពួកអ្នកប្រឆាំងនឹងរបបលោកកាដាហ្វី។
ទីក្រុងZlitenគឺជាទីដៅនៃការវាយដណ្តើមយករបស់ពួកអ្នកបះបោរដែលបានសាកល្បងតាំងពីដើមខែនេះមកដណ្តើមយកឱ្យបាន តែដោយគ្មានជោគជ័យ។តាំងពីថ្ងៃព្រហស្បតិ៍១៨សីហាមក ការប្រយុទ្ធបានប្រព្រឹត្តទៅហើយពួកឩទ្ទាមបានដណ្តើមបានទីតាំងនៅជាយក្រុង។ស្របតាមពួកឩទ្ទាម ទាហានរដ្ឋាភិបាលចំនួន៤០នាក់បានស្លាប់នៅក្នុងការប្រយុទ្ធនេះ។នៅព្រឹកថ្ងៃសុក្រម្សិលមិញ គេនៅពុំទាន់អាចដឹងចំនួនអ្នកស្លាប់នៅឡើយទេ ទោះបីជាពួកឩទ្ទាមទទួលស្គាល់ថា មានអ្នកស្លាប់និងរបួស នៅក្នុងជួររបស់ខ្លួនក្តី។
ក្នុងប៉ុន្មានថ្ងៃចុងក្រោយនេះ សមរភូមិជាច្រើនត្រូវបានបើក នៅខាងលិចរដ្ឋធានី នៅខាងកើតនិងនៅប៉ែកនិរតី ដោយដាក់សម្ពាធកាន់តែខ្លាំងឡើងទៅលើកងទ័ពរដ្ឋាភិបាល។ម្យ៉ាងទៀត យប់មិញ ទ្រីប៉ូលីបានទទួលរងការទម្លាក់គ្រាប់បែកពីខាងកងកម្លាំងអូតង់ដែលសំដៅទៅលើមណ្ឌលដំណាក់លោកកាដាហ្វីនិងទៅលើប៉ែកខាងលិចនៃទីក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ