ទុយនីស៊ីកំពុងត្រៀមខ្លួនបង្កើតរដ្ឋាភិបាលថ្មី បន្ទាប់ពីមានការបាញ់សម្លាប់មេដឹកនាំប្រឆាំងមួយរូប
ប្រទេសទុយនីស៊ី កំពុងត្រៀមខ្លួនបង្កើតរដ្ឋាភិបាលថ្មី បន្ទាប់ពីមានការបាញ់សម្លាប់មេដឹកនាំប្រឆាំងដ៏សំខាន់មួយរូប។ នៅថ្ងៃពុធ ម្សិលមិញ ទុយនីស៊ីបានជួបនូវស្ថានការច្របូកច្របល់ខ្លាំង។ បន្ទាប់ពីលោក Chokri Belaïd ដែលជាមេដឹកនាំគណបក្សប្រឆាំងមួយ ត្រូវបានគេសំលាប់ ប្រជាជនទុយនីស៊ីរាប់ពាន់នាក់ បាននាំគ្នាធ្វើបាតុកម្ម នៅតាមបណ្តាផ្លូវនានា នៅក្នុងទីក្រុង ប្រឆាំងនឹងរដ្ឋាភិបាលអ៊ីស្លាមនិយម ដែលកំពុងតែកាន់អំណាច។ បាតុករទុយនីស៊ី បានចោទរដ្ឋាភិបាលថាចូលចិត្តបង្កការឈឺចាប់ និងហិង្សានយោបាយ ដែលមានក្នុងប្រទេស ជាច្រើនថ្ងៃមកនេះ។ មានប៉ូលិសមួយរូប បានបាត់បង់ជីវិត ក្នុងការប្រឈមមុខគ្នារវាងប៉ូលិស និងក្រុមបាតុករ។ នៅចំពោះមុខបាតុកម្មដែលពុះពោរទៅដោយកំហឹង នាយករដ្ឋមន្ត្រីទុយនីស៊ី បានប្រកាសទៅកាន់ប្រជាជាតិទាំងមូលថា នឹងមានការផ្លាស់ប្តូររដ្ឋាភិបាលសាជាថ្មី។
ចុះផ្សាយនៅថ្ងៃ៖
ស្តាប់ - ០១:៥៧
មូលហេតុនៃបាតុកម្ម និងភាពច្របូកច្របល់ក្នុងប្រទេសទុយនីស៊ី កាលពីថ្ងៃពុធម្សិលមិញ គឺបណ្តាលមកពី ការបាញ់សំលាប់លោក Chokri Belaïd ដែលជាមេដឹកនាំសំខាន់មកពីគណបក្ស រួមជាតិប្រជាធិបតេយ្យ ដែលជាបក្សប្រឆាំងឆ្វេងនិយម។
នៅរសៀលថ្ងៃពុធ ប្រជាជនរាប់ពាន់នាក់ បាននាំគ្នាចុះធ្វើបាតុកម្ម នៅតាមផ្លូវនានា ក្នុងទីក្រុង ប្រឆាំងនឹងរដ្ឋាភិបាលអ៊ីស្លាមនិយម ដែលកំពុងតែកាន់អំណាច។ បាតុករទុយនីស៊ី ចោទរដ្ឋាភិបាលថាចូលចិត្តបង្កការឈឺចាប់ និងហិង្សានយោបាយ។ បាតុកម្មកាលពីម្សិលមិញ បានបន្តរហូតដល់យប់ថ្ងៃពុធ ហើយការប្រឈមមុខគ្នារវាងប៉ូលិស និងក្រុមបាតុករ បានបណ្តាលអោយប៉ូលិសមួយរូប បាត់បង់ជីវិត។ បាតុកម្មទាំងនេះ ធ្វើអោយគេនឹកឃើញដល់ការបះបោររបស់ប្រជាជន កាលពីពីរឆ្នាំមុន។
នៅចំពោះមុខមហាបាតុកម្ម នាយករដ្ឋមន្ត្រីទុយនីស៊ី លោក Hamadi Jebali បានប្រកាសថា វិធានការផ្លាស់ប្តូររដ្ឋាភិបាល ក្នុងប្រទេសសាជាថ្មីម្តងទៀត។ ចំពោះក្រុមប្រឆាំង ការប្រកាសរបស់លោក Jebali គ្រាន់តែជាវគ្គចាប់ផ្តើមមួយតែប៉ុណ្ណោះ។ រយៈពេលមួយខែចុងក្រោយនេះ ទំនាក់ទំនងរវាងរដ្ឋាភិបាល និងបក្សប្រឆាំងមានភាពតានតឹងជាខ្លាំង។ ជារឿយៗ កិច្ចប្រជុំរបស់គណបក្សប្រឆាំងតែងតែទទួលរងនូវការវាយប្រហារផ្សេងៗ ជាប់ជានិច្ច។ កាលពីថ្ងៃអង្គារ នៅពេលដែលខ្លួននៅមានជីវិតរស់នៅ នៅឡើយ លោក Chokri Belaïd បានផ្តល់សន្និសីទសារព័តម៌ានមួយ ដោយបានបរិហាររដ្ឋាភិបាលថាបានបង្កអំពើហិង្សា។ សំរាប់ក្រុមសិទ្ធិមនុស្សទុយនីស៊ី លោក Chokri Belaïd គឺជាអ្នកដែលទើសមុខទើសមាត់ ដល់គណបក្សអ៊ីស្លាមកាន់អំណាច។
បន្ទាប់ពី លោក Chokri Belaïd បានបាត់បង់ជីវិតមក គណបក្សប្រឆាំងចំនួនបួនបានដកខ្លួន ចេញពីសភាទុយនីស៊ី។ សភាទុយនីស៊ីដែលធើ្វការយឺតយ៉ាវ ក្នុងការរៀបចំបង្កើតច្បាប់។
គណបក្សប្រឆាំងទាំងនេះ បានសុំអោយប្រជាជនធ្វើបាតុកម្មសាជាថ្មី នៅថ្ងៃសុក្រនេះ ក្នុងឧកាសបុណ្យសពរបស់ លោក Chokri Belaïd។
គណបក្សប្រឆាំងទាំងបួននេះ នៅចាំមើលថា តើវិធានការបន្ទាន់ក្នុងការផ្លាស់ប្តូររដ្ឋាភិបាល របស់នាយករដ្ឋមន្ត្រីទុយនីស៊ី អាចនឹងផ្លាស់ប្តូរអ្វីខ្លះដល់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ