បាតុករទុយនីស៊ីបន្តដាក់សម្ពាធទៅលើរដ្ឋាភិបាលអន្តរកាល
អ្នកនាំពាក្យនៃរដ្ឋាភិបាលអន្តរកាលទុយនីស៊ីបានប្រកាសឲ្យដឹងកាលពីថ្ងៃចន្ទទី២៤មករាថា នឹងមានការរុះរើប្តូរសមាសភាពនៃរដ្ឋាភិបាលអន្តរកាលនៅពេលដ៏ខ្លីខាងមុខនេះ។ ចំណែកឯប្រជាជនទុយនីស៊ីរាប់ពាន់នាក់នៅតែបន្តដាក់សម្ពាធទៅលើរដ្ឋាភិបាល ដោយជាថ្មីម្តងទៀតពួកគេបាននាំគ្នាធ្វើបាតុកម្មដោយពុំគោរពបំរ៉ាមគោចរអ្វីឡើយ។ ពួកគេនៅតែបន្តទាមទារឲ្យរដ្ឋមន្ត្រីណាដែលធ្លាប់ធ្វើការបម្រើរបបបិន អាលីឲ្យលាចាកចេញពីមុខតំណែង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នៅក្នុងជួររដ្ឋាភិបាលអន្តរកាលទុយនីស៊ី គេនៅតែមានការរួញរានៅឡើយ ដោយពុំដឹងថាតើគេត្រូវធ្វើយ៉ាងណាដើម្បីឲ្យប្រជាជនទុយនីស៊ីបាត់ខឹងក្រេវក្រោធ។ ក៏ប៉ុន្តែអ្វីដែលជាក់ ច្បាស់គឺគេសង្កេតឃើញមានការប្តូរប្រែប្រួល។ ប្រឈមមុខទល់នឹងកំហឹងរបស់បាតុករ រដ្ឋាភិបាលអន្តរកាលទុយនីស៊ីពុំអាចនៅស្ងៀមធ្វើគរធ្វើថ្លង់បានឡើយ។
អ្នកនាំពាក្យនៃរដ្ឋាភិបាលអន្តរកាលបានប្រកាសឲ្យដឹងថា នឹងមានការប្តូរប្រែសមាសភាពនៃរដ្ឋាភិបាលអន្តរកាលនៅពេលឆាប់ៗខាងមុខនេះ។ គេកត់សម្គាល់ឃើញថា ក្រោយពី មានការលាចាកចេញពីមុខតំណែងដោយរដ្ឋមន្ត្រី៥រូបកាលពីសប្តាហ៍មុន គេត្រូវរកសមាជិករដ្ឋាភិបាល៥រូបទៀតយកមកដាក់ជំនួស។ ក៏ប៉ុន្តែបាតុករដែលខឹងក្រេវក្រោធ នៅតែប្រកាសទាមទារឲ្យរាល់រដ្ឋមន្ត្រីណាដែលធ្លាប់ធ្វើការបម្រើរបបបិន អាលីត្រូវតែចាកចេញពីរដ្ឋាភិបាលអន្តរកាលទុយនីស៊ី។
រីឯយោធាទុយនីស៊ីដែលមានប្រជាប្រិយភាពដ៏ខ្លាំងក្លា ហើយដែលមានការគាំទ្រពីប្រជាជន ដោយសារតែកងកម្លាំងយោធាទុយនីស៊ីពុំបានបាញ់ទៅលើហ្វូងបាតុករ។
អគ្គសេនាធិការនៃកងកម្លាំងយោធាទុយនីស៊ីលោកRachid Amarបានថ្លែងទៅកាន់ក្រុម បាតុករឲ្យដើរចេញពីទីស្នាក់ការនៃរដ្ឋាភិបាលអន្តរកាល ដើម្បីឲ្យរដ្ឋាភិបាលអាចបំពេញកាតព្វកិច្ចរបស់គេ។ ក៏ប៉ុន្តែបាតុករទុយនីស៊ីនៅតែពុំព្រមដើរចាកចេញពីទីស្នាក់ការនៃរដ្ឋាភិបាលអន្តរកាលឡើយ។
ចំណែកឯបាតុករទុយនីស៊ីខ្លះបានថ្លែងថា ប្រជាជនទុយនីស៊ីបានស្តាប់តាមការបង្គាប់បញ្ជារបស់អ្នកដឹកនាំទុយនីស៊ីគ្រប់គ្រាន់ហើយ។ ឥឡូវនេះ ដល់វេនអ្នកដឹកនាំទុយនីស៊ីត្រូវស្ដាប់និងត្រូវឮសម្រែកទាមទាររបស់ប្រជាជនទុយនីស៊ីវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ