កងទ័ពជំនួយអាហ្វ្រិកមកដល់ម៉ាលី កាកបាទក្រហមព្រួយបារម្ភពីស្ថានការមនុស្សធម៌នៅភាគខាងជើងប្រទេស
កងទ័ពម៉ាលី បានប្រកាសថា ដណ្តើមយកតំបន់ កូណា ស្ថិតនៅភាគកណ្តាលប្រទេស នៅថ្ងៃព្រហស្បត្តិ៍ម្សិលមិញនេះ បានមកវិញហើយ។ ក្នុងប្រតិបត្តការយោធា ប្រយុទ្ធជាមួយក្រុមឧទ្ទាមអ៊ីស្លាម កងទ័ពជំនួយអាហ្វ្រិក នាំមុខដោយកងទ័ពប្រទេសឆាដ កំពុងតែធ្វើដំណើរមកកាន់ប្រទេសម៉ាលី តាំងតែពីយប់ថ្ងៃពុធម្ល៉េះ។ បេសកកម្មរបស់កងទ័ពឆាដ មានលក្ខណៈដាច់ដោយឡែកពីបេសកកម្មអន្តរជាតិ Misma។ គឺជាបេសកកម្ម ក្នុងកិច្ចព្រមព្រៀងទ្វេភាគី រវាងក្រុងបាម៉ាកូ និង ចាមេណា ដែលតំរូវអោយកងទ័ពឆាដ ជួយម៉ាលី ប្រយុទ្ធដណ្តើមយកភាគខាងជើង ប្រទេសមកវិញ។ ដោយឡែក ស្ថានការមនុស្សធម៌នៅភាគខាងជើងប្រទេស មានលក្ខណៈគួរអោយព្រួយបារម្ភ ព្រោះថា យោងតាមកាកបាទក្រហម ប្រជាជនស៊ីវិលនៅទីនោះ អាចនឹងរងនូវវិបត្តបង្កឡើងដោយសង្គ្រាមមុនគេ។
ចុះផ្សាយនៅថ្ងៃ៖
ស្តាប់ - ០១:៣២
ប្រទេសឆាដ នឹងផ្តល់ជំនួយកងទ័ព ២០០០នាក់ ដល់ប្រទេសម៉ាលី។ នៅយប់ថ្ងៃពុធកន្លងមក កងពលឆាដទីមួយ មានគ្នា ២០០ នាក់ បានចាកចេញពីទីក្រុង ចាមេណា ទៅកាន់ក្រុង នីញ៉ាម៉ី ប្រទេស នីហ្សេ ដើម្បីប្រមូលផ្តុំគ្រឿងអាវុធ មុននឹងធ្វើដំណើរ មកកាន់ប្រទេសម៉ាលី។ ប្រទេសឆាដ នឹងពង្រាយកងទ័ពខ្លួន ចំនួនបីវីរៈសេនាតូច ក្នុងនោះមានកងការពារប្រធានាធិបតីដ៏មានសក្តានុពល និងកងប្រយុទ្ធប្រឆាំងភេរវកម្ម ដែលទើបតែនឹងបង្កើតថ្មីមួយផងដែរ។
នៅសមរភូមិឯណោះវិញ កងទ័ពម៉ាលី មានជំនួយពីទាហានបារាំង បានប្រាប់ នៅថ្ងៃព្រហស្បត្តិ៍ ម្សិលមិញថា ខ្លួនដណ្តើមកាន់កាប់យកតំបន់ កូណា ស្ថិតនៅភាគកណ្តាលប្រទេស ពីក្រុមឧទ្ទាមអ៊ីស្លាមមកវិញហើយ។ បន្ទាប់ពីមានការវាយប្រហារដោយពួកឧទ្ទាម យកតំបន់នេះបាន កាលពីថ្ងៃទី ១០ មករា កងទ័ពបារាំង បានចុះអន្តរាគមន៍ ជួយទ័ពម៉ាលី នៅតំបន់នេះ ដើម្បីចៀសវៀងមិនអោយ ពួកឧទ្ទាមចូលទៅដល់ ភាគខាងត្បូងនៃទីក្រុង បាម៉ាកូ បាន។ បច្ចុប្បន្ននេះ នៅម៉ាលី បារាំងបានដាក់ទ័ពរបស់ខ្លួនបាន ១៤០០ នាក់ ព្រមទាំងយន្តហោះ និងឧត្ថម្ភាគចក្រផ្សេងៗ។
ដោយឡែក ស្ថានការមនុស្សធម៌នៅភាគខាងជើងប្រទេស មានលក្ខណៈគួរអោយព្រួយបារម្ភ ព្រោះថា យោងតាមកាកបាទក្រហម និងអង្គការក្រៅរដ្ឋាភិបាលនានា ប្រជាជនស៊ីវិលនៅទីនោះ អាចនឹងរងនូវវិបត្តសង្គ្រាមមុនគេ។
ស្បៀងអាហារដែលធ្លាប់តែដឹកពីភាគខាងត្បូង ទៅកាន់ទីនោះ បានត្រូវកាត់ផ្តាច់ ចាប់តាំងពីមានការប្រយុទ្ធគ្នាម្ល៉េះ។ លើសពីនេះ ប្រទេសអាល់ហ្សេរី បានបិទព្រំដែនរបស់ខ្លួន ធ្វើអោយប្រជាជនម៉ាលី កាន់តែរងនូវវិបត្តកង្វះស្បៀងអាហារថែមទៀត។ ប្រជាជនរាប់ពាន់នាក់ បាននាំគ្នាចាកចេញ ពីក្រុងនានា ដោយភ័យខ្លាចការទំលាក់គ្រាប់បែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ