តើកូនប្រុសកាដាហ្វី Seif al-Islam Kadhafi កំពុងស្ថិតនៅទីណា ?
នៅប្រទេសលីប៊ី ព័ត៌មានស្រពេចស្រពិលកំពុងកើតមានឡើងជុំវិញជោគវាសនារបស់កូនប្រុសកាដាហ្វីម្នាក់ឈ្មោះ Seif al-Islam Kadhafi និងអតីតប្រធានក្រសួងស៊ើបការសម្ងាត់ក្នុងជំនាន់កាដាហ្វីឈ្មោះ Abdallah Senoussi។ បើយោងតាមប្រភពពីក្រុមប្រឹក្សាជាតិអន្តរកាលលីប៊ី អ្នកទំាងពីរបានសុខចិត្តប្រគល់ខ្លួនទៅឲ្យតុលាការព្រហ្មទណ្ឌអន្តរជាតិ។ ចំណែកលោករដ្ឋអាជ្ញានៃតុលាការព្រហ្មទណ្ឌអន្តរជាតិក៏បានបញ្ជាក់ក្រៅផ្លូវការថា ធ្លាប់បានជជែកជាមួយកូនប្រុសកាដាហ្វី។ ចំណែកកាសែតនៅអាហ្រ្វិកខាងត្បូងឯណោះបានបញ្ជាក់ថា កូនប្រុសកាដាហ្វីកំពុងស្ថិតក្រោមការ ការពារពីក្រុមទាហានស៊ីឈ្នួលអាហ្រ្វិកខាងត្បូង។ សូមជម្រាបជូនថា កាលពី ៤ខែមុន តុលាការព្រហ្មទណ្ឌអន្តរជាតិបានចេញដីកាចាប់ខ្លួន Seif al-Islam Kadhafi និង Abdallah Senoussi។
ចុះផ្សាយនៅថ្ងៃ៖
ស្តាប់ - ០១:៥៩
ឆ្លើយនឹងសំណួររបស់អ្នកកាសែតនៃទូរទស្សន៍ CNN ដែលថា តើកូនប្រុសកាដាហ្វី Seif al-Islam Kadhafi ចង់ប្រគល់ខ្លួនទៅឲ្យតុលាការព្រហ្មទណ្ឌអន្តរជាតិ ឬទេនោះ ? លោករដ្ឋអាជ្ញានៃតុលាការព្រហ្មទណ្ឌអន្តរជាតិ Luis Moreno Ocampo មិនបានឆ្លើយឲ្យបានច្បាស់លាស់ទេ មានក៏ថា អត់មានក៏មិនថាដែរ។ ក៏ប៉ុន្តែ លោក Ocampo គ្រាន់តែបានលើកឡើងក្រៅផ្លូវការថា ធ្លាប់បានជជែកជាមួយ Seif al-Islam Kadhafi តាមរយៈអន្តរការីម្នាក់។ គឺតាមរយៈកិច្ចចរចាដោយប្រយោលដែលលោករដ្ឋអាជ្ញាមានអារម្មណ៍ថា Seif al-Islam Kadhafi មានបំណងចង់ប្រគល់ខ្លួនទៅឲ្យតុលាការព្រហ្មទណ្ឌអន្តរជាតិ។
ទន្ទឹមគ្នានេះ លោករដ្ឋអាជ្ញានៃតុលាការព្រហ្មទណ្ឌអន្តរជាតិក៏បានអះអាងពីការទទួលព័ត៌មានក្រៅផ្លូវការថា មានក្រុមទាហានស៊ីឈ្នួលមួយបានយល់ព្រមបញ្ជូនខ្លួន Seif al-Islam Kadhafi ទៅកាន់រដ្ឋមួយដែលមិនស្ថិតក្នុងលក្ខន្តិកៈនៃទីក្រុងរ៉ូម។
លោករដ្ឋអាជ្ញាបានសន្យាថា បើ Seif al-Islam Kadhafi សុខចិត្តប្រគល់ខ្លួនឲ្យតុលាការព្រហ្មទណ្ឌអន្តរជាតិមែន រូបគេនឹងត្រូវទទួលការកាត់ទោសទៅតាមច្បាប់របស់តុលាការអន្តរជាតិ ហើយនឹងអាចរួចខ្លួន ប្រសិនបើគ្មានភស្តុតាងបញ្ជាក់ពីបទឧក្រិដ្ឋរបស់គេទេនោះ។ ដើម្បីអាចទៅដល់តុលាការព្រហ្មទណ្ឌអន្តរជាតិបាន លោករដ្ឋអាជ្ញាបានឲ្យ Seif al-Islam Kadhafi ប្រគល់ខ្លួនទៅរដ្ឋអំណាចនៃប្រទេសណាមួយតាមជម្រើសរបស់ខ្លួន បន្ទាប់មក តុលាការព្រហ្មទណ្ឌអន្តរជាតិជាអ្នករ៉ាប់រងរៀបចំបញ្ជូនទៅកាន់តុលាការនៅទីក្រុងឡាអេ។
សូមរម្លឹកជូនថា តុលាការព្រហ្មទណ្ឌអន្តរជាតិបានតាមរកចាប់ខ្លួន Seif al-Islam Kadhafi ពីបទឧក្រិដ្ឋកម្មប្រឆំាងមនុស្សជាតិ។ Seif al-Islam Kadhafi ត្រូវបានចោទប្រកាន់ថា ជាអ្នកទទួលខុសត្រូវម្នាក់នៃការកាប់សម្លាប់ និងធ្វើទុក្ខបុកម្នេញលើជនស៊ីវិលដែលប្រព្រឹត្តដោយកម្លំាងសន្តិសុខលីប៊ី តំាងពីមានការងើបបះបោរប្រឆំាងនឹងកាដាហ្វីនាពាក់កណ្តាលខែកុម្ភៈ។
តើ Seif al-Islam Kadhafi កំពុងស្ថិតនៅទីណា ? អត់មានអ្នកណាដឹងច្បាស់ទេ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ