អង្គការក្រៅរដ្ឋាភិបាលអំពាវនាវអោយមេដឹកនាំអាស៊ានដោះស្រាយជម្លោះព្រំដែនខ្មែរ-ថៃ អោយមានប្រសិទ្ឋិភាព
ក្នុងពេលកិច្ចប្រជុំកំពូលអាស៊ាននឹងបើកជាផ្លូវការនៅថ្ងៃសៅរ៍ ស្អែកនេះ ក្រុមសមាគមអង្គការក្រៅរដ្ឋាភិបាលមកពីប្រទេសអាស៊ី ជាង៤០បានចេញសេចក្តីអំពាវនាវរួមគ្នា ជំរុញអោយមេដឹកនាំអាស៊ានផ្តោតការយកចិត្តទុកដាក់ខ្ពស់បំផុត ក្នុងការស្វែងដោះស្រាយជម្លោះព្រំដែនខ្មែរ ថៃ។ តំណាងសំឡេងប្រជាពលរដ្ឋបណ្តាប្រទេសអាស៊ានបង្ហាញថា សង្រ្គាមប្រដាប់អាវុធតាមបណ្តោយព្រំដែនខ្មែរ-ថៃ នាពេលកន្លងមកបានធ្វើអោយប្រជាជន ជាជនស៊ីវិលរាប់ម៉ឺននាក់ក្នុងប្រទេសទំាងពីរទទួលរងការរំលោភ សិទ្ធិមនុស្ស សិទ្ឋិជាមូលដ្ឋានរបស់មនុស្សក្នុងការស់រានមានជីវិត យ៉ាងធ្ងន់ធ្ងរ។ ក្រុមសង្គមស៊ីវិលបានចាត់ទុកតួនាទីអាស៊ាន មានតួនាទីសំខាន់ណាស់ក្នុងការបញ្ចប់ទុក្ខលំបាករបស់ប្រជាជន កម្ពុជា-ថៃទំាងអស់នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នៅក្នុងទីក្រុងហ្សាការតា ប្រទេសឥណ្ឌូណេស៊ី ជាទីដែលក្រុមមេដឹកនាំបណ្តាប្រទេសអាស៊ានជួបជុំគ្នាសម្រាប់កិច្ចប្រជុំកំពូលលើកទី១៨របស់ខ្លួន ក្រុមបណ្តាអង្គការសង្គមស៊ីវិលមកពីប្រទេសជាសមាជិកអាស៊ាន មានឈ្មោះថា “វេទិកាប្រជាជនអាស៊ាន” (ASEAN People Forum) ក៏មានកិច្ចប្រជុំរបស់ខ្លួននៅទីនោះផងដែរ។ ជាកិច្ចប្រជុំដើម្បីផ្តល់យោបល់ ជំរុញអោយមេដឹកនាំអាស៊ាន ផ្តោតការយកចិត្តទុកដាក់ក្នុងការស្វែងរកដំណោះស្រាយ ដ៏មានប្រសិទ្ឋិភាព ក្នុងជម្លោះព្រំដែនកម្ពុជា-ថៃ។
តំណាងសំឡេងប្រជាពលរដ្ឋបណ្តាប្រទេសក្នុងសមាគមអាស៊ានបានទទូចមុនថ្ងៃបើកកិច្ចប្រជុំកំពូលអាស៊ាននេះថា មេដឹកនាំអាស៊ានត្រូវខិតខំដំណោះស្រាយអោយខ្លំាងបំផុត អោយមានប្រសិទ្ធិភាព ធ្វើយ៉ាងណាកុំអោយមានសំឡេងអាវុធនៅតាមបន្ទាត់ព្រំដែនកម្ពុជា- ថៃបន្តទៀត។ នៅក្នុងកិច្ចប្រជុំលើកទី១៨នេះ អាស៊ានត្រូវតែសម្រេចអោយបានឆាប់ក្នុងការបញ្ជូនអ្នកសង្កេតការណ៍មកឈរជើងនៅតាមបន្ទាត់ព្រំដែនប្រទេសទំាងពីរនេះ ជាការបង្កើតអោយបានសន្តិភាពអចិន្ត្រៃយ៍នៅទីនោះ។
នៅក្នុងសេចក្តីថ្លែងការណ៍រួមបណ្តាញវេទិកាប្រជាជនអាស៊ានមានការព្រួយបារម្ភយ៉ាងខ្លំាងថាសង្រ្គាមប្រដាប់អាវុធកម្ពុជា-ថៃកន្លងមកនេះ បានបណ្តាលអោយមានជនភៀសសឹករាប់ម៉ឺននាក់នៅក្នុងប្រទេសទំាងពីរ រត់ភៀសខ្លួនពីផ្ទះសម្បែង បាត់បង់ឱកាសប្រកបការងារ ប៉ះពាល់សុខភាព ចំណែកក្មេងៗមិនបានទៅសាលារៀន។ ក្រុមអង្គការសង្គមស៊ីវិលចំនួនជាង៤០បានចេញសេចក្តីថ្លែងការណ៍នៅក្នុងទីក្រុងហ្សាការតាថាសង្រ្គាមព្រំដែនកម្ពុជា-ថៃ បានបង្កទុក្ខលំបាកជាច្រើនយ៉ាងដល់ជនភៀសសឹក និងជាការរំលោភសិទ្ឋិមនុស្សយ៉ាងធ្ងន់ធ្ងរទៅលើប្រជាជន ជាជនស៊ីវិលទំាងនោះ។
ក្រៅពីអំពាវនាវ អោយសមាគមអាស៊ានដោះស្រាយជម្លោះកម្ពុជា-ថៃអោយបានឆាប់ និងមានប្រសិទ្ឋិភាព បណ្តាញវេទិកាប្រជាជនអាស៊ាន ក៏បានដាស់តឿន ដល់មេដឹកនាំអាស៊ាន ត្រូវមានវិធានការបង្ការជាមុន កុំអោយមានជម្លោះប្រដាប់អាវុធបែបនេះកើតមានទៀតនៅលើប្រទេសជាសមាជិកអាស៊ានផ្សេងទៀត ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ