អូតង់បំផ្លាញនាវាចម្បាំង ៨គ្រឿងរបស់លីប៊ី
នៅអធ្រាត្រថ្ងៃព្រហស្បតិ៍ ចូលដល់ថ្ងៃសុក្រទី ២០ ឧសភា ២០១១ យន្តហោះ អូតង់ បានបើកការវាយប្រហារខ្លាំង ទៅលើទីតាំងកម្លាំងទ័ពជើងទឹកលីប៊ី នៅទីក្រុងទ្រីប៉ូលី ដោយបានបាញ់បំផ្លាញ នាវាចម្បាំង៨គ្រឿងរបស់រដ្ឋាភិបាលលីប៊ី។ ប្រធានាធិបតីអាមេរិក បារ៉ាក់ អូបាម៉ាបានស្វាគមដល់ការងាររបស់អូតង់ដែលបានអន្តរាគមទាន់ពេលវេលា ជួយស្រោចស្រង់ជីវិតប្រជាជនស៊ីវិលរាប់ពាន់នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សម្រាប់អង្គការអូតង់ ដែលបើកប្រតិបត្តិការជិត ពីរខែ នៅលីប៊ី ការវាយប្រហារ បំផ្លាញនាវាចម្បាំងរបស់លោកកាដាហ្វី គឺជាកិច្ចការមួយខានមិនបាន ដើម្បីការពារជនស៊ីវិលផង និងដើម្បីការពារនាវាអូតង់ដែលប្រចំាការ នៅក្នុងសមុទ្រមេឌីទែរ៉ាណេ។ អូតង់បានបង្ហាញពីភាពស្របច្បាប់ និងចាំបាច់ របស់ខ្លួន ក្នុងការវាយប្រហារលើកនេះ ដោយថា កាដាហ្វី មេដឹកនាំផ្តាច់ការលីប៊ី កំពុងប្តូរយុទ្ធសាស្រ្ត ប្រើនាវាចម្បាំងបាញ់សម្លាប់ជនស៊ីវិល នៅទីក្រុងមីស្រាតា និងរារាំងមិនឲ្យនាវាដឹកជំនួយមនុស្សធម៌ចូលលីប៊ី។
នៅប៉ុន្មានសប្តាហ៍នេះ យន្តហោះអូតង់បានបាញ់ជាច្រើនដង សំដៅផ្ទះរបស់កាដាហ្វី ដោយប្រើហេតុផលថា ក្នុងបរិវេណផ្ទះរបស់កាដាហ្វី មានបង្កប់ទៅដោយទីតាំងបញ្ជាការទាហាន និងឃ្លាំងស្តុកទុកគ្រាប់។ ការវាយប្រហារជាប់ៗគ្នា រហូតធ្វើឲ្យគេសង្ស័យថា មេដឹកនាំកាដាហ្វីត្រូវរបួសផង។ ប៉ុន្តែ នៅយប់ថ្ងៃព្រហស្បតិ៍ម្សិលមិញ ទូរទស្សន៍រដ្ឋលីប៊ីបានបង្ហាញមុខលោកកាដាហ្វី សុខភាពល្អ ពាក់វ៉ែនតាខ្មៅ និងឈរនិយាយយ៉ាងស្រស់ស្រាយជាមួយ សហការីទូតដែលទើបត្រលប់មកពីរុស្ស៊ី។
លោកAnders Fogh Rasmussen អគ្គលេខាធិការរបស់អូតង់បានវាយតម្លៃថា ប្រតិបត្តិការជាប់ៗគ្នារបស់អូតង់ បានបំផ្លាញម៉ាស៊ីនសម្លាប់មនុស្សរបស់លោកកាដាហ្វី។ លោកជឿជាក់ថា ការដាក់គំនាបផ្នែកអាវុធ និងនយោបាយនឹងធ្វើឲ្យលោកកាដាហ្វីចុះពីអំណាច នៅពេលដ៏ខ្លីខាងមុខ។
ប្រធានគណៈកម្មការសហភាពអាហ្រ្វិកដែលធ្លាប់បើកភ្លើងខៀវឲ្យមានអន្តរាគមន៍ទ័ពអន្តរជាតិ នៅលើដែនអាកាសលីប៊ី បានចេញប្រតិកម្ម នៅថ្ងៃនេះ ថា ប្រទេសចូលរួមក្នុងប្រតិបត្តិការយោធានៅលីប៊ី កំពុងរំលោភលើសេចក្តីសម្រេចចិត្តរបស់អង្គការសហប្រជាជាតិ ដោយថា សេចក្តីសម្រេចរបស់ក្រុមប្រឹក្សាសន្តិសុខ បាននិយាយតែពីការការពារសន្តិសុខប្រជាជនស៊ីវិល តែមិនមែនការបណ្តេញលោកកាដាហ្វីចេញពីអំណាចនោះទេ។
អ្នកនាំពាក្យរបស់រដ្ឋាភិបាលលីប៊ីវិញ ចាត់ទុកប្រតិបត្តិការរបស់អូតង់ ថា ធ្វើឡើងដោយមិនត្រឹមត្រូវ។ អ្នកនាំពាក្យរូបនេះក៏បានបដិសេធសំដីរបស់ប្រមុខការទូតបរទេសអាមេរិកាំងដែលថា ការវាយប្រហារខ្លាំងរបស់អូតង់បានធ្វើឲ្យកូនស្រី និងប្រពន្ធរបស់កាដាហ្វី រត់ទៅជ្រកលាក់ខ្លួន នៅទុយនីស៊ី ដែលជាប្រទេសជិតខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ