ម៉ូស្គូដើរតួជាអន្តរការីរវាងក្រុងទ្រីប៉ូលី និងក្រុងបិនហ្គាហ្ស៊ី
តាមដែលប្រមុខការទូតរុស្ស៊ី លោក Serguei Lavrov បានថ្លែង ល្ងាចមិញ គឺ ថ្ងៃអង្គារនេះ ដែលពួកអ្នកតំណាងនៃរបប កាដាហ្វី ម៉ូស្គូ ហើយ ថ្ងៃពុធស្អែក ទាំងគណៈប្រតិភូរបស់ ភាគីប្រឆាំង នៅលីប៊ី ក៏ត្រូវមកដល់រដ្ឋធានីរុស្ស៊ីដែរ ប៉ុន្តែ ភាគីប្រឆាំងនេះបានបង្ខំចិត្ត សុំលើកពេលទស្សនកិច្ចរបស់គេ ទៅថ្ងៃក្រោយបន្តិចសិន មកពី “ មូលហេតុបច្ចេកទេស“។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ថ្លែងទៅកាន់បេសកជនពិសេសរបស់អគ្គលេខាធិការអ.ស.ប. ទទួលបន្ទុក ខាងបញ្ហាលីប៊ី លោក Abdel Ilah al-Hatyb ក្នុងជំនួបនៅទីក្រុងម៉ូស្គូ ល្ងាចម្សិលមិញ លោក រដ្ឋមន្ត្រីការបរទេសរុស្ស៊ី Serguei Lavrov បានប្រកាសឲ្យដឹងថា រុស្ស៊ី គាំទ្រពេញទី ដល់គំនិតផ្តួចផ្តើម បំផុសមកដោយអង្គការ “សហភាពអាហ្វ្រិក” (សហភាព ដែលបច្ចុប្ប្នន្ន មាន៥២ប្រទេសនេះជាសមាជិក) សំដៅទៅបញ្ឈប់ការបាញ់គ្នា នៅលីប៊ី ហើយ ឲ្យគូភាគីបដិបក្ខ ចាប់ផ្តើមសង្វាតទៅ គ្រាន់នឹងសម្រេចឲ្យបាន នូវការផ្សះផ្សាជាតិ ក្នុងផលប្រយោជន៍ របស់ប្រជាជនលីប៊ីទាំងមូល ក្នុងផលប្រយោជន៍នៃអធិបតេយ្យ និង បូរណភាពដែនដីរដ្ឋលីប៊ី។
តាមប្រសាសន៍ ប្រមុខការទូតរុស្ស៊ី មានការសម្របយោបល់គ្នាទៅហើយ ថា ទាំងពួកអ្នកតំណាងក្រុង ទ្រីប៉ូលី ទាំងពួកអ្នកតំណាង ក្រុង ប៊ិនហ្គាហ្ស៊ី នឹងធ្វើដំណើរមកកាន់ក្រុងម៉ូស្គូ។ ពីចំណែកខ្លួន ម៉ូស្គូត្រៀមនិយាយ ជាមួយ គ្រប់ភាគីទាំងអស់។ រុស្ស៊ី ប្រាថ្នាខ្លាំងមែនទែន ឲ្យមានការឈប់បង្ហូរឈាម យ៉ាងឆាប់បំផុត នៅលីប៊ី ហើយផ្តើមដោះស្រាយស្ថានការណ៍ នៅទីនោះ តាមផ្លូវនយោបាយ។
ព្រមជាមួយនេះ លោក Lavrov ក៏សង្កត់ធ្ងន់ថា ពេលជួប ជាមួយពួកអ្នកតំណាងរបស់លោកកាដាហ្វី ម៉ូស្គូនឹងទទូច ឲ្យក្រុងទ្រីប៉ូលី បំពេញឥតខ្ចោះ តាមការទាមទារធំជាគោល របស់ក្រុមប្រឹក្សាសន្តិសុខអ.ស.ប. គឺ ចៀសវាងជាចាំបាច់ កុំប្រព្រឹត្តសកម្មភាពណា ដែលនាំឲ្យមាន អ្នកធ្លាក់ខ្លួនរងគ្រោះ ក្នុងចំណោមបណ្តាជនស៊ីវិល។
បើពួកអ្នកតំណាងរបប កាដាហ្វី មកម៉ូស្គូ គឺដើម្បីសុំការគាំទ្ររបស់រុស្ស៊ី ដោយសារទី១-រុស្ស៊ី ជាសមាជិកអចិន្ត្រៃយ៍នៃក្រុមប្រឹក្សាសន្តិសុខ អ.ស.ប.។ រុស្ស៊ីដែល មិនលង់ខ្លួនទៅចូលរួមឡើយ ក្នុង ”សម្ព័ន្ធប្រទេស” ដែលវាយប្រហារ ទៅលើលីប៊ី។ ទី២- រុស្ស៊ីនៅរក្សាទំនាក់ទំនងជាផ្លូវការ នៅឡើយជាមួយរបបនេះ។ ចុះពួកអ្នកតំណាង ក្រុងប៊ិនហ្គាហ្ស៊ី ដែលប្រឆាំងនឹង កាដាហ្វ៊ី មកដើម្បីអ្វី?
តាមមតិកាសែតរុស្ស៊ីខ្លះ ចុះផ្សាយនៅថ្ងៃនេះ បើគេមកមែន គឺដើម្បីបង្ខូចគម្រោងផែនការ របស់ក្រុងទ្រីប៉ូលី ទេតើ ឬមួយមិនមកទេដឹង ដោយលើកពេល ក្រោមលេសថា មកពី ”មូលហេតុបច្ចេកទេស”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ