លោក វ៉ាត់តារ៉ា អំពាវនាវឲ្យមានការផ្សះផ្សាជាតិ
ដោយមិនអាចផ្តួលលោក ឡូរ៉ង់ បាក់បូ ប្រធានាធិបតីផុតអាណត្តិ ដោយកម្លាំងបាយបាន លោក អាឡាសាន វ៉ាត់តារ៉ាប្រធានាធិបតីប្រទេសកូតឌីវ័រ ទទួលស្គាល់ដោយអន្តរជាតិ បានរៀបចំយុទ្ធសាស្ត្រថ្មី។ តាមរយៈសុន្ទរកថា យ៉ាងឧឡារិក តាមកញ្ចក់ទូរទស្សន៍ជាតិ នៅយប់ថ្ងៃព្រហស្បតិ៍ម្សិលមិញ ទៅកាន់ជនរួមជាតិ លោកវ៉ាត់តារ៉ា បានអំពាវ នាវសុំឲ្យមានការផ្សះផ្សាជាតិឡើងវិញ ដោយឈរលើឧត្តមគតិ អត់អោនទោសគ្នា និងយោគយល់គ្នាជាបងប្អូនរួមជាតិតែមួយ ព្រមទាំងប្រកាសចាត់វិធានការ ទាំងផ្នែកសន្តិសុខ សុវត្ថិភាព និងសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ចប់ហើយឆាកឈុតប្រយុទ្ធគ្នាដោយប្រើកម្លាំងទ័ព ដើម្បីគាស់រំលើងលោក ឡូរ៉ង់ បាក់បូ ! នេះជាជម្រើសរបស់ លោក អាឡាសាន វ៉ាត់តារ៉ា ដែលកំពុងប្តូរយុទ្ធសាស្ត្រទៅរៀបចំ ដាក់ពង្រាយទ័ពឡោមព័ទ្ធ និងបិទខ្ទប់ប្រធានាធិបតីផុតអាណត្តិ បាក់បូ ឲ្យជាប់នៅក្នុងវិមានប្រធានាធិបតី។
នៅពេលថ្លែងសុន្ទរកថា ទៅកាន់ជនរួមជាតិកូតឌីវ័រ យប់មិញ លោកវ៉ាត់តារ៉ា ដែលចាត់ទុកការប្រឈមមុខជាមួយនឹងលោកបាក់បូ បានកន្លងផុតទៅហើយនោះ បានអំពាវនាវឲ្យបណ្តាជនកូតឌីវ័រទាំងអស់ ផ្សះផ្សាជាតិឡើងវិញ ចេះអត់ទោសឲ្យគ្នា ស្រឡាញ់គ្នាជាបងប្អូនរួមជាតិ និងមិនជ្រើសរើសការសងសឹកគ្នា។ លោក វ៉ាត់តារ៉ា ក៏បានប្រកាសអំពីវិធានការមួយចំនួន ដើម្បីនាំសន្តិសុខ និងសុវត្ថិភាព ដល់ក្រុង អាប៊ីហ្សង់ ដែលក្លាយជាចំណីនៃអំពើហិង្សា អសុវត្ថិភាព និងការលួចប្លន់ពីសំណាក់ក្រុមប្រដាប់អាវុធ។
លោកថែមទាំងបានសន្យាបង្កើតគណៈកម្មការជាតិមួយ អង្កេតលើសំណុំរឿងប្រល័យពូជសាសន៍ និងឧក្រិដ្ឋកម្មផ្សេងៗ។
បំរាមគោចរ នឹងត្រូវបន្ធូរបន្ថយ ចាប់ពីថ្ងៃសុក្រទី ៨មេសានេះតទៅ ដើម្បីអនុញ្ញាតឲ្យក្រុងអាប៊ីហ្សង់មានសកម្មភាពជាធម្មតា និងមានដំណើរការសេដ្ឋកិច្ចឡើងវិញ បន្តិចម្តងៗ។ ក្នុងបញ្ហាសេដ្ឋកិច្ចនេះ លោកប្រធានាធិបតីទទួលស្គាល់ដោយអន្តរជាតិ បានស្នើសុំសហភាពអឺរ៉ុបឲ្យលើកទណ្ឌកម្ម ចេញពីកំពង់ផែ អាប៊ីហ្សង់ និង សិនប្រាដូ វិញ ព្រោះពេលនេះ រដ្ឋាភិបាលរបស់លោកគ្រប់គ្រងប្រទេសស្ទើរតែស្រុង កំពង់ផែទាំងពីរនេះលែងនៅក្រោមគ្រប់គ្រងរបស់ លោក បាក់បូ ទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ