ភេរវកម្មអត្តឃាតសងសឹកឲ្យមេអាល់-កៃដា ?
មានស្លាប់យ៉ាងហោចណាស់ ១៩នាក់ និងជាង៤០នាក់ទៀត ត្រូវរងរបួស នៅក្នុងភេរវកម្មអត្តឃាត ពីរផ្ទួនៗគ្នា នៅថ្ងៃពុធនេះ ប្រឆាំងនឹងកងកម្លាំងយោធាមួយក្រុម ដែលបានចូលរួមធ្វើប្រតិបត្តិការចាប់មេដឹកនាំជាន់ខ្ពស់អាល់-កៃដា។ ពុំទាន់មានក្រុមណាចេញមុខទទួលស្គាល់ទង្វើភេរវកម្មនៅក្រុងQuetta ភាគនិរតីប្រទេសនេះនៅឡើយទេ ប៉ុន្តែវាទំនងណាស់ថាមានជាប់ពាក់ព័ន្ធនឹងការចាប់ខ្លួន យូនី អាល់-ម៉ូរីតានី (Younis Al-Mauritani)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
រថយន្តមួយគ្រឿងផ្ទុកពេញទៅដោយគ្រាប់រំសេវ ត្រូវបានគេបំផ្ទុះឡើង ដើម្បីទម្លាយរបង គេហដ្ឋានរបស់ឧត្តមសេនីយត្រី Farrukh Shahzad មេបញ្ជាការរងកងកម្លាំងស្វ័យត្រាណ Frontier Corps បន្ទាប់មកទើបមានអត្តឃាតជនម្នាក់ដើរចូលទៅក្នុងបរិវេណផ្ទះ ដោយគប់គ្រាប់បែកពីរគ្រាប់ មុននឹងចុចបំផ្ទុះសម្លាប់ខ្លួនឯង។
ភេរវកម្មដែលដៅទិសលើកងស្វ័យត្រាណ បានបង្កឲ្យលោកមេបញ្ជាការរង Farrukh Shahzad រងរបួស។ ចំណែកភរិយា និងកូនពីររបស់លោក ព្រមទាំងពលទាហានរបស់កងស្វ័យត្រាណ ៧នាក់បានស្លាប់។
រហូតមកទល់ពេលនេះ ពុំទាន់មានក្រុមណាចេញមុខទទួលសារភាពចំពោះអំពើភេរវកម្មនេះទេ ប៉ុន្តែគេអាចសន្និដ្ឋានបានថា ជាស្នាដៃរបស់ពួកភេរវនិយមអាល់-កៃដា ព្រោះនៅថ្ងៃចន្ទទី៥កញ្ញាកន្លងទៅថ្មីៗនេះ អាជ្ញាធរប៉ាគីស្ថានទើបបានផ្សព្វផ្សាយជាសាធារណៈ អំពីការចាប់ខ្លួនមេដឹកនាំជាន់ខ្ពស់អាល់-កៃដា យូនី អាល់-ម៉ូរីតានី (Younis Al-Mauritani)។ ជាប្រតិបត្តិការ ដែលកងកម្លាំងស្វ័យត្រាណ Frontier Corps បានចូលរួមយ៉ាងសស្រាក់សស្រាំ ជាមួយនឹងភ្នាក់ងារស៊ើបការសម្ងាត់អាមេរិក។
យូនី អាល់-ម៉ូរីតានី ជាមេកើយធំម្នាក់របស់ចលនាអាល់-កៃដា និងជាអ្នកដែលបានទទួលបន្ទុកកិច្ចការផ្ទាល់ខ្លួនជាច្រើនពី អ៊ូសាម៉ា បិនឡាដិន ក្នុងការរៀបចំធ្វើភេរវកម្ម ប្រឆាំងផលប្រយោជន៍សេដ្ឋកិច្ចអាមេរិក។
ជាសរុប ក្នុងរយៈពេល៤ឆ្នាំចុងក្រោយនេះ មានមនុស្សជាង៤៦០០នាក់ បានស្លាប់បាត់បង់ជីវិត ក្នុងអំពើភេរវកម្ម នៅប្រទេសប៉ាគីស្ថាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ