ប៉ាគីស្ថានសន្យាសហការជាមួយចិនដើម្បីប្រឆាំងពួកភេរវជន
ចាប់ពីថ្ងៃពុធទី ៣១ សីហា ទីក្រុងប៉េកាំងបានពង្រាយ ប៉ូលិស និងទាហានក្រាសក្រែលដើម្បីពង្រឹងសន្តិសុខនៅក្នុងខេត្តស៊ីនជាំង កន្លែងដែលគេរៀបចំវេទិកាសេដ្ឋកិច្ចចិន អឺរ៉ុបអាស៊ី ចាប់ពីថ្ងៃព្រហស្បតិ៍ស្អែក ដល់ថ្ងៃចន្ទទី ៥ កញ្ញា។ ប្រធានាធិបតី ប៉ាគីស្ថាន និងកៀហ្ស៊ីស្ថានបានទៅដល់ទីក្រុងយូរ៉ុមគី របស់ខេត្តស៊ីនជាំង នៅថ្ងៃនេះ និងបង្ហាញពីជំហរសហប្រតិបត្តិការជាមួយរដ្ឋអំណាចចិនដើម្បី ប្រយុទ្ធប្រឆាំងពួកភេរវករ។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងជំនួបជាមួយលេខាបក្សកុម្មុយនិស្តចិន ប្រចាំខេត្តស៊ីនជាំង លោកប្រធានាធិបតីប៉ាគីស្ថាន Asif Ali Zardari បាននិយាយបញ្ជាក់ភ្លាមៗទៅសមភាគីថា ទីក្រុងអ៊ីស្លាម៉ាបាតប្រឆាំងជានិច្ចចលនាភេរវនិយម និងទីក្រុងអ៊ីស្លាម៉ាបាតនឹងសហការយ៉ាងជិតស្និទ្ធជាមួយប៉េកាំងដើម្បីប្រយុទ្ធប្រឆាំងនឹងពួកភេរវក។
ការដែលប្រធានាធិបតីប៉ាគីស្ថានប្រញាប់ប្រញាល់និយាយធានាចិនមហាអំណាច មកពីចិន កាលពីពេលថ្មីៗនេះបានចោទថា ក្រុមមនុស្សដែលបានបង្កការវាយប្រហារនៅក្នុងខេត្តស៊ីនជាំងកន្លងមក គឺជាពួកអ៊ីស្លាមជ្រុលនិយម ដែលបានទទួលការហ្វឹកហ្វឺន នៅក្នុងប្រទេសប៉ាគីស្ថាន។ ប៉ាគីស្ថានត្រូវបញ្ជាក់ជំហរច្បាស់របស់ខ្លួនដល់ ចិនដើម្បីបានជំនួយសេដ្ឋកិច្ច និងយោធា បន្ទាប់ពីប្រទេសនេះទើបតែមើលមុខគ្នាមិនចំជាមួយអាមេរិក ក្នុងរឿងសម្លាប់អូសាម៉ា បិនឡាដិន។
ក្នុងការប្រយុទ្ធប្រឆាំងនឹងអំពើភេរវកម្ម ចិនត្រូវការចិន ព្រោះ បើមើលពីទីតាំងភូមិសាស្រ្ត ខេត្តស៊ីនជាំងដែលសំបូរមានការបះបោររបស់ប្រជាជន ស្ថិតនៅជាប់ព្រំដែន ភាគឦសានប៉ាគីស្ថាន។ ប៉ាគីស្ថានដែលល្បីជាជម្រករបស់ពួកអ៊ីស្លាមជ្រុលនិយមអាល់កៃដា និងតាលីបង់ ក៏ជាប្រទេសដែលកំពុងញាំញី រងគ្រោះខ្លាំងដោយអំពើភេរវកម្ម។
នៅក្នុងខេត្តស៊ីនជាំង កាលពីជាងមួយខែមុន មនុស្សយ៉ាងជាង ២០នាក់ត្រូវសកម្មជនមួយក្រុមចាក់សម្លាប់។ ប៉ូលិសចិនបានបាញ់សម្លាប់ក្រុមឃាតករទាំងនោះ ដែលក្រោយមកទីក្រុងប៉េកាំងបានវាយតម្លៃថា ជាសមាជិករបស់ចលនាអ៊ីស្លាមទៀកកេសស្តង់ខាងលិច។ ប៉ុន្តែ រហូតមកដល់ពេលនេះ មិនមានក្រុមភេរវជនណាមួយចេញមុខអះអាងថា ការវាយប្រហារនៅក្នុងខេត្តស៊ីនជាំងកន្លងមក ជាស្នាដៃរបស់ខ្លួនទេ។
ចិននិយាយថា ខ្លួនកំពុងរងអំពើភេរវកម្ម ជាពិសេសនៅក្នុងខេត្តស៊ីនជាំងដែលសម្បូររស់នៅដោយប្រជាជនអ៊ីស្លាម អ៊ុយហ្គួរ។ កាវាយប្រហារបានផ្ទុះឡើងកាន់តែច្រើន បើទោះបីជារដ្ឋអំណាចចិនបានបង្កើនវត្តមានទាហាន និងប៉ូលិស យ៉ាងណាក៏ដោយ។ គេបានមើលឃើញថា ទាហានចិនត្រូវពង្រាយច្រើន ទៅក្នុងខេត្ត ស៊ីនជាំង ដើម្បីបង្កាទប់ស្កាត់ កុំឲ្យមានការបះបោររបស់ប្រជាជនអ៊ុយហ្គួរ ដូចកាលពី ២ឆ្នាំមុន។ គេបានវាយតម្លៃថា ក្នុងជម្លោះហិង្សារវាងប្រជាជនអ៊ុយហ្គួរ និងប្រជាជនចិន “ហាន” ដែលមានទាហាននៅពីក្រោយ បានសម្លាប់មនុស្សយ៉ាងតិច ១៩០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ