បក្សសង្គ្រោះជាតិ និងហ្វ៊ុនស៊ិនប៉ិចចូលរួមវេទិកានយោបាយ
ដូចការគ្រោងទុក វេទិកាពិភាក្សានយោបាយដែលរៀបចំឡើងដោយអង្គការសង្គមស៊ីវិលត្រូវបានរៀបចំឡើងនៅឯសណ្ឋាគារ អ៊ីមភើរៀល ក្នុងទីក្រុងភ្នំពេញនៅព្រឹកថ្ងៃព្រហស្បតិ៍នេះ។ ប៉ុន្តែមានតែគណបក្សពីរប៉ុណ្ណោះដែលបានចូលរួមបង្ហាញគោលនយោបាយរបស់ខ្លួនចំពោះប្រជាសហគមន៍ប្រមាណជា៥០០នាក់ដែលបានចូលរួម។ ចំណែកគណបក្សប្រជាជនកម្ពុជាបានអវត្តមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ទីបំផុតទៅមានតែគណបក្សនយោបាយពីរប៉ុណ្ណោះ ដែលចូលរួមវេទិកាពិភាក្សានយោបាយដែលរៀបចំឡើងដោយអង្គការសង្គមស៊ីវិលនៅព្រឹកមិញនេះ នៅទីក្រុងភ្នំពេញ ក្នុងចំណោមគណបក្សធំៗ៣ដែលត្រូវបានអញ្ជើញឲ្យធ្វើជាវាគ្មិន។ គណបក្សប្រជាជនកម្ពុជាបានអវត្តមានដោយមិនបានឆ្លើយតបតាមការអញ្ជើញនេះទេ។
យ៉ាងណាក៏ដោយ គណបក្សសង្គ្រោះជាតិ និងគណបក្សហ្វ៊ុនស៊ិនប៉ិចបានបង្ហាញគោលនយោបាយរបស់ខ្លួនដល់ប្រជាសហគមន៍ប្រមាណជា ៥០០ នាក់ដែលបានចូលរួមស្តាប់។ លោក ទេព នន្ទរី តំណាងគណបក្សហ៊្វុនស៊ិនប៉ិច បានលើកឡើងពីគោលនយោបាយរបស់គណបក្សនេះដោយផ្តោតលើបញ្ហាកសិកម្ម។
បើយោងតាម លោក ទេព នន្ទរី គណបក្សហ៊្វុនស៊ិនប៉ិច មានគោលនយោបាយលើកទឹកចិត្តវិស័យកសិកម្ម តាមរយៈការធ្វើទំនើបកម្មវិស័យនេះ ដោយបច្ចេកវិជ្ជាទំនើប ការស្វែងរកទីផ្សារឲ្យកសិករ និងការកំណត់តម្លៃទំនិញក្នុងស្រុកជាដើម។ គណបក្សរាជានិយមមួយនេះក៏អះអាងថា ខ្លួនមានគោលនយោបាយលើកស្ទួយវិស័យទេសចរណ៍ និងទាក់ទាញការវិនិយោគបរទេសផងដែរ។
ទំនងជាចង់ទាក់ទាញការចាប់អារម្មណ៍របស់អ្នកចូលរួមដែលភាគច្រើនមកពីសហគមន៍ដែលមានទំនាស់ដីធ្លី លោក គីវណ្ណរ៉ា តំណាងគណបក្សសង្គ្រោះជាតិ ហាក់ផ្តោតសំខាន់ទៅលើបញ្ហាដីធ្លីយ៉ាងខ្លាំង។ ក្រៅពីនោះ គោលនយោបាយ៧ចំណុចរបស់គណបក្សសង្គ្រោះជាតិដែលផ្តោតលើការលើកកម្ពស់ជីវភាពមន្ត្រីរាជការ កម្មករ និងការផ្តល់ប្រាក់ឧបត្ថម្ភដល់ជនចាស់ជរា ក៏ត្រូវបានលើកឡើងផងដែរ។
សូមបញ្ជាក់ថា អ្នកដែលបានចូលរួមក្នុងវេទិកានោះត្រូវបានគេអញ្ជើញមកពីសហគមន៍ផ្សេងៗ ដូចជា សហគមន៍ព្រៃឡង់ ថ្មគោល បូរីកីឡា និងសហគន៍ផ្សេងៗទៀត។
លោក ឈិត សំអាត នាយកអង្គការវេទិកានៃអង្គការក្រៅរដ្ឋាភិបាលកម្ពុជាដែលជាតំណាងអ្នករៀបចំកម្មវិធីពិភាក្សានយោបាយនេះបានប្រាប់វិទ្យុបារាំងអន្តរជាតិថា គោលបំណងនៃការរៀបចំវេទិកានេះ គឺដើម្បីឲ្យគណបក្សនយោបាយដែលមានកៅអីក្នុងសភាបានបង្ហាញគោលនយោបាយសំខាន់ៗរបស់ខ្លួនទៅកាន់អ្នកបោះឆ្នោត។ យ៉ាងណាក៏ដោយ គណបក្សកាន់អំណាចហាក់មិនចាប់អារម្មណ៍នឹងវេទិកាដែលមានសុទ្ធតែអ្នកមានបញ្ហាដីធ្លីចូលរួមនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ