នាយករដ្ឋមន្ត្រីឥណ្ឌានិងប៉ាគីស្ថាននឹងជួបពិភាក្សាគ្នា នៅចុងសប្តាហ៍នេះ
នាយករដ្ឋមន្ត្រីឥណ្ឌា ម៉ាន់ម៉ូហាន ស៊ីង បានប្រកាស នៅព្រឹកថ្ងៃពុធនេះថា លោកនឹងជួបពិភាក្សាគ្នាជាមួយនាយករដ្ឋមន្ត្រីប៉ាគីស្ថាន គឺលោក ណាវ៉ា ស្ហារីហ្វ នៅចុងសប្តាហ៍នេះ នៅក្រុងញូវយក សហរដ្ឋអាមេរិក ផ្សេងគ្នាពីមហាសន្និបាតរបស់អង្គការសហប្រជាជាតិ។ គិតចាប់ពីឆ្នាំ២០១០មក នេះជាលើកទី១ហើយ ដែលមេដឹកនាំកំពូលនៃរដ្ឋាភិបាលឥណ្ឌា និងប៉ាគីស្ថាន ត្រូវជួបគ្នាជាថ្មីម្តងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
នាយករដ្ឋមន្ត្រីឥណ្ឌា ម៉ាន់ម៉ូហាន ស៊ីង បានប្រកាសនូវជំនួបជាមួយនាយករដ្ឋមន្ត្រីប៉ាគីស្ថាននេះ កាលពីព្រឹកថ្ងៃពុធម្សិលមិញ មុននឹងលោកឡើងយន្តហោះធ្វើដំណើរទៅចូលរួមមហាសន្និបាតអង្គការសហប្រជាជាតិ នៅក្រុងញូវយក។
ជំនួបរវាងនាយករដ្ឋមន្ត្រីឥណ្ឌា និងប៉ាគីស្ថាន នៅចុងសប្តាហ៍នេះ ផ្តោតសំខាន់ទៅលើបញ្ហា តំបន់ជម្លោះកាស្មៀរ។ ចាប់ពីបានទទួលឯករាជ្យពីអាណានិគមអង់គ្លេស ក្នុងឆ្នាំ១៩៤៧មក ឥណ្ឌានិងប៉ាគីស្ថានធ្លាប់ធ្វើសង្គ្រាមរឿងតំបន់កាស្មៀរនេះ ពីរដងរួចមកហើយ ហើយបានឈានទៅដល់បទឈប់បាញ់មួយ នៅឆ្នាំ២០០៣។ ប៉ុន្តែ ប្រទេសទាំងសងខាងមិនបានគោរពបទឈប់បាញ់នេះទេ។
ជំនួបរវាងមេដឹកនាំកំពូលទាំងពីរ នៅចុងសប្តាហ៍នេះ មិនបានធ្វើអោយគណបក្សប្រឆាំងឥណ្ឌាពេញចិត្តនោះទេ។ ព្រោះថា ចាប់តាំងពីដើមខែសីហាមក ទាហានឥណ្ឌា៥នាក់ បានបាត់បង់ជីវិត នៅក្នុងការពួនស្ទាក់របស់កងទ័ព នៅតាមព្រំដែនរវាងប្រទេសទាំងពីរ។ ឥណ្ឌាតែងចោទប៉ាគីស្ថានថា ជាអ្នកបង្កហេតុការណ៍ទាំងអស់នេះ។ គណបក្សប្រឆាំងឥណ្ឌា បានលើកឡើងថា ការពិភាក្សានិងអំពើភេរវកម្ម មិនអាចដំណើរការទៅបានទន្ទឹមគ្នានោះទេ។
គួររំលឹកថា ដោយសារហេតុការបាញ់ប្រហារគ្នារវាងឥណ្ឌានិងប៉ាគីស្ថាន នៅតាមព្រំដែនក្នុងតំបន់កាស្មៀរនេះហើយ ទើបបានជាការពិភាក្សាស្វែងរកសន្តិភាពរវាងប្រទេសទាំងពីរ ដែលបានគ្រោងធ្វើនៅចុងខែសីហាកន្លងទៅនេះ ត្រូវបានព្យួរចោលទៅវិញ។
ទោះជាមានសម្ពាធពីបក្សប្រឆាំង និងពីការបោះឆ្នោតសភាឆ្នាំ២០១៤ ខាងមុខក្តី នាយករដ្ឋមន្ត្រីឥណ្ឌាបានសំរេចចាប់ដៃនាយករដ្ឋមន្ត្រីប៉ាគីស្ថាន ណាវ៉ា ស្ហារីហ្វ ឡើងវិញ។ នេះក៏ប្រហែលមកពីនាយករដ្ឋមន្ត្រីប៉ាគីស្ថាន ដែលទើបជាប់ឆ្នោត កាលពីខែឧសភានោះ បានបង្ហាញគោលជំហរមុតមាំ ក្នុងការបន្ធូរបន្ថយភាពតានតឹងជាមួយឥណ្ឌានោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ