កម្ពុជា-ថៃ ផ្ទុះអាវុធ នៅប្រាសាទតាក្របី និងប្រាសាទតាមាន់ ក្នុងខេត្តឧត្តរមានជ័យ
កងទ័ពកម្ពុជា និងកងទ័ពថៃ បានផ្តើមផ្ទុះអាវុធដាក់គ្នាជាថ្មីម្តងទៀត តាមបណ្តោយព្រំដែនប្រហែល ២៥ គីឡូម៉ែត្រ ក្នុងខេត្តឧត្តរមានជ័យ ចំណុចប្រាសាទតាក្របី និងប្រាសាទតាមាន់។ ការវាយប្រហារដោយកាំភ្លើងគ្រប់ធុន ចាប់ពីម៉ោង ៦ ព្រឹក រហូតដល់រសៀលថ្ងៃសុក្រនេះ បណ្តាលឲ្យកងទ័ពកម្ពុជា ពលីលើសមរភូមិ ៣ នាក់ និងរបួស ៦ នាក់។ នេះបើតាមការបញ្ជាក់របស់អ្នកនាំពាក្យក្រសួងការពារជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ក្នុងសន្និសីទកាសែត កាលពីប៉ុន្មានម៉ោងមុននេះ លោកឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិ របស់កម្ពុជា បានប្រកាសថា នៅម៉ោង ៦ ព្រឹកព្រលឹមថ្ងៃសុក្រនេះ ទាហានថៃ បានឆ្លងដែនចូលមកធ្វើការឆ្មក់វាយប្រហារមកលើទីតាំងកងទ័ពកម្ពុជា នៅតាមបណ្តោយព្រំដែនកម្ពុជា-ថៃ ចាប់ពីតំបន់ប្រាសាទតាក្របី រហូតដល់ជប់គគីរ និងចូលជ្រៅមកក្នុងទឹកដីកម្ពុជា។
លោកឧត្តមសេនីយ៍ឯក ឈុំ សុជាតិ បានបន្ថែមថា នៅពេលដែលកងទ័ពថ្មើរជើងថៃ ចូលមកធ្វើការឆ្មក់វាយប្រហារ មកលើមូលដ្ឋានកងទ័ពកម្ពុជានោះ ទាហានថៃបានប្រើប្រាស់អាវុធគាំទ្រធុន ដូចជាប្រភេទ ដេកា ៧៥ មីលីម៉ែត្រ ដេកា ៨២ មីលីម៉ែត្រ ១០៥ មីលីម៉ែត្រ និង ១៥៥ មីលីម៉ែត្រ បាញ់ផ្លោងចូលមកជ្រៅក្នុងទឹកដីកម្ពុជា ចំងាយ ២១ គីឡូម៉ែត្រ ពីព្រំដែនកម្ពុជា-ថៃ និងធ្លាក់លើតំបន់ ដែលមានប្រជាជនស៊ីវិលរស់នៅ។
អំពីតុល្យការចុងក្រោយ ត្រូវបានលោកឧត្តមសេនីយ៍ឯក ឈុំ សុជាតិ ប្រកាសជាផ្លូវការថា កងទ័ពកម្ពុជា បានពលីជីវិតលើសមរភូមិចំនួន ៣ នាក់ និងរបួស ៦ នាក់។ ចំណែកកងទ័ពថៃ មិនត្រូវបានប្រកាសឲ្យដឹងជាផ្លូវការទេ។
នៅក្នុងសន្និសីទកាសែត លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី ក៏បានមានប្រសាសន៍ថា ការឆ្មក់វាយពីក្រោយខ្នងកងទ័ពកម្ពុជានៅថ្ងៃនេះ ជាអំពើមួយ ដែលមិនអាចទទួលយកបាន ហើយផ្ទុយស្រលះពីឆន្ទៈរបស់កម្ពុជា និងផ្ទុយស្រលះពីស្មារតីខិតខំប្រឹងប្រែងរបស់ក្រុមប្រឹក្សាសន្តិសុខអង្គការសហប្រជាជាតិ ដែលចង់ឲ្យមានបទឈប់បាញ់ជាអចិន្ត្រៃយ៍។
លោក ផៃ ស៊ីផាន បានកត់សម្គាល់ថា ថៃបានវាយប្រហារមកលើកម្ពុជា នៅក្នុងទឹកដីកម្ពុជា ដែលជាការឈ្លានពានលើបូរណភាពទឹកដីកម្ពុជា។ ថៃក៏បានវាយប្រហារចំលើប្រាសាទតាមាន់ និងប្រាសាទតាក្របី ព្រមទាំងចំលើចំណុចប្រជាជនស៊ីវិលខ្មែរ ដែលរស់នៅ ចម្ងាយ ២១ គីឡូម៉ែត្រ ពីខ្សែព្រំដែន។
នៅថ្ងៃនេះ ប្រជាជនកម្ពុជារាប់ពាន់នាក់ បានរត់ភៀសសឹក ចេញពីបណ្តោយព្រំដែន ក្នុងស្រុកបន្ទាយអំពិល ខេត្តឧត្តរមានជ័យ ជាទីដែលថៃវាយប្រហារលើកម្ពុជា។
ថៃវាយប្រហារលើកងទ័ពកម្ពុជា នៅប្រាសាទតាមាន់ និងតាក្របី ក្នុងខេត្តឧត្តរមានជ័យ ដែលស្ថិតនៅចម្ងាយប្រមាណ ២០០ គីឡូម៉ែត្រ ខាងលិចប្រាសាទព្រះវិហារ នាពេលនេះ គឺជាលើកទី១ហើយ ចាប់តាំងពីមានការតានតឹងផ្នែកយោធានៅព្រំដែនកម្ពុជា-ថៃ រយៈពេលជិត ៣ ឆ្នាំមកនេះ។ កម្ពុជា-ថៃ វាយប្រយុទ្ធគ្នា ៤ លើកមកហើយ នៅព្រំដែនប្រាសាទព្រះវិហារ ចាប់តាំងពីថៃ លើកទ័ពចូលឈ្លានទឹកដីកម្ពុជា កាលពីថ្ងៃ១៥កក្កដា ឆ្នាំ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ