ថៃអញ្ជើញកម្ពុជាប្រជុំក្រុមការងារថ្ងៃទី៣-៥ មេសា ដើម្បីអនុវត្តដីកាតុលាការឡាអេ
ក្រុមការងារចម្រុះកម្ពុជាថៃនឹងជួបគ្នារយៈពេល៣ថ្ងៃនៅដើមខែមេសាក្រោយនេះនៅក្នុងទីក្រុងបាងកកដើម្បីពិភាក្សាអំពីនីតិវិធីនៃការដកកងទ័ពចេញពីតំបន់ដែលគ្មានព្រំដែនបណ្តោះអាសន្នតាមដីកាបញ្ជារបស់តុលាការយុត្តិធម៌អន្តរជាតិ។ រដ្ឋាភិបាលថៃបានប្រើពេលជាង៣ខែ បន្ទាប់ពីកិច្ចប្រជុំគណៈកម្មាធិការព្រំដែនទូទៅកាលពីចុងខែធ្នូ ដើម្បីកំណត់ពេលវេលានៃកិច្ចប្រជុំក្រុមការងារចម្រុះ។ ក្រុមការងារចម្រុះនេះដែលជាយន្តការសំខាន់ក្នុងការអនុវត្តន៍ដីកាបង្គាប់របស់តុលាការឡាអេថ្ងៃទី១៨កក្កដា២០១១។
ចុះផ្សាយនៅថ្ងៃ៖
ស្តាប់ - ០១:២៦
ទីបំផុត ភាគីថៃបានកំណត់ពេលវេលានៃកិច្ចប្រជុំក្រុមការងារចម្រុះកម្ពុជាថៃដែលកម្ពុជាបានរង់ចាំជាយូរមកហើយនោះហើយ។ លិខិតអញ្ជើញប្រជុំត្រូវបានផ្ញើពីប្រទេសថៃទៅលោកនាយឧត្តមសេនីយ នាង ផាត តាមរយៈក្រសួងការបរទេសកម្ពុជា។ អ្នកនាំពាក្យក្រសួងការបរទេសកម្ពុជាលោក កុយ គួងបានបញ្ជាក់អោយដឹងថា លិខិតអញ្ជើញដែលមានចុះហត្ថលេខានៅថ្ងៃទី២៣មីនានោះ បានកំណត់ថ្ងៃប្រជុំរយៈពេល៣ថ្ងៃ ចាប់ពីថ្ងៃទី៣ ដល់ថ្ងៃទី៥ ខែមេសាខាងមុខនេះ។
មន្ត្រីជាន់ខ្ពស់ក្រសួងការបរទេសកម្ពុជាបានអត្ថាធិប្បាយថា ការកំណត់បានពេលវេលានៃកិច្ចប្រជុំក្រុមការងារចម្រុះកម្ពុជាថៃនេះ គឺជាដំណើរឈានទៅមុខមួយនៅក្នុងការអនុវត្តន៍ផែនការសន្តិភាពនៅព្រំដែនប្រាសាទព្រះវិហារ។ ពោលគឺការដកបុគ្គលិកយោធាចេញពីតំបន់ដែលត្រូវគ្មានកងទ័ពបណ្តោះអាសន្ន ក្រោមការឃ្លាំមើល របស់អ្នកសង្កេតការណ៍ឥណ្ឌូណេស៊ី។ កម្ពុជារង់ចាំពេលវេលានេះជាយូរមកហើយ។
ក្រោយពីមានកិច្ចប្រជុំគណៈកម្មាធិការព្រំដែនទូទៅកម្ពុជាថៃ កាលពីថ្ងៃទី២១ខែធ្នូ ភាគីទាំងពីរដែលរួមមានរដ្ឋមន្ត្រីការពារជាតិទាំងពីរបានសម្រេចបង្កើតក្រុមការងារចម្រុះមួយដើម្បីអនុវត្តដីការបស់តុលាការឡាអេ ពិសេសគឺការដកកងទ័ពចេញពីតំបន់ដែលត្រូវគ្មានកងទ័ពបណ្តោះអាសន្ននោះឯង។ ប៉ុន្មានថ្ងៃក្រោយមក កម្ពុជាបានតែងតាំងនាយឧត្តមសេនីយ នាង ផាត ដែលជារដ្ឋលេខាធិការក្រសួងការពារជាតិធ្វើជាប្រធានក្រុមការងារចម្រុះភាគីកម្ពុជាដឹកនាំសមាសភាពក្នុងក្រុមប្រមាណ២០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ