ទស្សនកិច្ចដ៏ចម្រូងចម្រាសរបស់ប្រធានាធិបតីស៊ូដង់នៅលីប៊ី
ទោះបីជាមានដីកា របស់តុលាការព្រហ្មទណ្ឌអន្តរជាតិ តាមចាប់ខ្លួន ក៏ដោយ ក៏លោក អូម៉ា អែល-បេស្ហៀ បន្តធ្វើដំណើរពីប្រទេសមួយទៅប្រទេសមួយដោយគ្មានរអា។ នៅថ្ងៃសៅរ៍ទី ៧មករា ម្សិលមិញ ប្រធានាធិបតីស៊ូដង់រូបនេះ បានអញ្ជើញមកដល់ក្រុងទ្រីប៉ូលី ប្រទេសលីប៊ី ដើម្បីបំពេញទស្សនកិច្ចពីរថ្ងៃ ក្រោមការទទួលស្វាគមន៍យ៉ាងកក់ក្តៅពីសំណាក់ប្រធានក្រុមប្រឹក្សា អន្តរកាលលីប៊ី លោក Moustapha Abdeljalil និងសមាជិករដ្ឋាភិបាលបណ្តោះអាសន្នជាច្រើនរូបទៀត ប៉ុន្តែជាការក្តៅក្រហាយបំផុតសម្រាប់កងកម្លាំងរំដោះស៊ូដង់ នៅ ដាហ្វួរ។
ចុះផ្សាយនៅថ្ងៃ៖
ស្តាប់ - ០២:២៧
ដំណើរទស្សនកិច្ចរបស់លោក បេស្ហៀ នៅលីប៊ីនេះ បានទទួលការរិះគន់យ៉ាងខ្លាំងពីសំណាក់ក្រុមអង្គការការពារសិទ្ធិមនុស្ស Human Right Watch និងបានបង្កើតជាក្តីមន្ទិលសង្ស័យយ៉ាងខ្លាំងចំពោះតម្លាភាពរបស់ក្រុមប្រឹក្សាអន្តរកាលលីប៊ី (CNT) ក្នុងផ្នែកសិទ្ធិមនុស្ស។ ព្រោះបុរសខ្លាំងទីមួយរបស់ស៊ូដង់នេះ កំពុងស្ថិតក្រោមការតាមចាប់ខ្លួនរបស់តុលាការព្រហ្មទណ្ឌអន្តរជាតិ ក្រុងឡាអេ ពីបទបានប្រព្រឹត្តឧក្រិដ្ឋកម្មប្រឆាំងមនុស្សជាតិ នៅដាហ្វួរ។
ពីដាហ្វួរ ប្រទេសស៊ូដង់ ក្រុមរណសិរ្សបដិវត្តន៍ដាហ្វួរ បានអំពាវនាវឲ្យអាជ្ញាធរលីប៊ី ចាប់ខ្លួន លោក បេស្ហៀនេះ ស្របតាមដីការរបស់តុលាការ។
ប៉ុន្តែសម្រាប់លោក បេស្ហៀ វិញ គ្មានរអាឡើយ។ ទស្សនកិច្ចរបស់លោកនេះ គឺដើម្បីសម្តែងអំណរគុណដល់រដ្ឋាភិបាលបណ្តោះអាសន្នលីប៊ី ដែលបានផ្តល់អំណោយដ៏ថ្លៃថ្លាបំផុតក្នុងប្រវត្តិសាស្ត្រស៊ូដង់។ នោះគឺការដួលរលំទៅនៃរបបកាដាហ្វី។ កាដាហ្វី ដែលជាអ្នកជំរុញដោយផ្ទាល់ឲ្យមានភាពអយុត្តិធម៌ ហិង្សា វាយប្រហារគ្នា និងការបែកបាក់នៅស៊ូដង់។ នេះជាសំដីរបស់លោក បេស្ហៀ ទៅកាន់អ្នកសារព័ត៌មាននៅទីក្រុងទ្រីប៉ូលី ដោយបញ្ជាក់ទៀតថា ស៊ូដង់ស្ថិតក្រោមការគំរាមកំហែងពីរបបកាដាហ្វីជារហូតមក ហើយគឺរដ្ឋាភិបាលលោកតែម្តងជាអ្នកផ្តល់អាវុធយុទ្ធភណ្ឌដល់ក្រុមអ្នកបះបោរលីប៊ី ដើម្បីផ្តួលកាដាហ្វី។
សម្រាប់តុលាការព្រហ្មទណ្ឌវិញ ក្រុងឡាអេបានបដិសេធមិនធ្វើអត្ថាធិប្បាយអ្វីទាំងអស់ជុំវិញទស្សនកិច្ចរបស់ប្រមុខដឹកនាំស៊ូដង់នេះទេ។ ព្រោះសូមបញ្ជាក់ថា លីប៊ី មិនបានចុះហត្ថលេខា និងមិនបានផ្តល់សច្ចាប័ន ទទួលស្គាល់តុលាការអន្តរជាតិនេះទេ ដូច្នេះលីប៊ីគ្មានកាតព្វកិច្ចចាប់បញ្ជូនជនជាប់ដីកាណាម្នាក់ទៅឡាអេឡើយ។
ទោះជាមានប្រវត្តិនិងចំណងនយោបាយយ៉ាងណាក៏ដោយ ក៏ការគោរពសិទ្ធិមនុស្ស ជាករណីកិច្ចរបស់គ្រប់រដ្ឋទាំងអស់ ! នេះជាគូសបញ្ជាក់របស់អ្នកទទួលខុសត្រូវម្នាក់នៃអង្គការការពារសិទ្ធិមនុស្ស HRW។ ប៉ុន្តែប្រមុខដឹកនាំក្រុមប្រឹក្សាអន្តរកាលលីប៊ី បានបញ្ចេញប្រតិកម្មការពារខ្លួន និងការពារលោក បេស្ហៀ ថា ក្រុងទ្រីប៉ូលី ធ្វើអ្វីៗទាំងអស់ស្របតាមក្របខ័ណ្ឌជាសមាជិកសម្ព័ន្ធអារ៉ាប និងសហភាពអាហ្វ្រិក ព្រមទាំងប្រកាសភ្ជាប់ទំនាក់ទំនងឲ្យប្រសើរឡើងជាមួយស៊ូដង់ មិនដូចសម័យមុនដែលតានតឹងដាក់គ្នាទេ។ ក្រុងខាទូន និងទ្រីប៉ូលី នឹងធ្វើសហប្រតិបត្តិការលើគ្រប់វិស័យ មិនថាសេដ្ឋកិច្ច នយោបាយ និងសន្តិសុខ ឬកសិកម្មនិងសំណង់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ