កូរ៉េខាងជើងនិងកូរ៉េខាងត្បូងសម្រេចចេញកិច្ចព្រមព្រៀងអោយមានជំនួបគ្រួសារដែលព្រាត់ប្រាសគ្នា ក្រោយសង្គ្រាម
ចុះផ្សាយនៅថ្ងៃ៖
ស្តាប់ - ០៤:៤១
នៅថ្ងៃពុធនេះ កូរ៉េខាងជើងនិងកូរ៉េខាងត្បូង បានសម្រេចចេញកិច្ចព្រមព្រៀងមួយ អនុញ្ញាតអោយគ្រួសារកូរ៉េមួយចំនួន ដែលបានព្រាត់ប្រាសគ្នាក្រោយសង្គ្រាមកូរ៉េ ឆ្នាំ១៩៥០-១៩៥៣ បានជួបជុំគ្នាឡើងវិញ នៅខែកុម្ភៈនេះ។ យោងតាមកិច្ចព្រមព្រៀងដ៏កម្រមាននេះ ការជួបជុំគ្រួសារកូរ៉េដែលបានបែកគ្នានេះ ធ្វើឡើង៦ថ្ងៃ ពីថ្ងៃ២០ដល់ថ្ងៃ២៥កុម្ភៈ នៅភ្នំគុំហ្កាំង Kumgang ក្នុងទឹកដីកូរ៉េខាងជើង ប៉ែកខាងជើងព្រំដែនរវាងកូរ៉េទាំង២។ កាលពីខែកញ្ញាឆ្នាំ២០១៣ ក្រុងព្យុងយ៉ាងបានលុបចោលគម្រោងជំនួបនេះម្តងហើយ ដោយសារតែកូរ៉េខាងត្បូងត្រៀមធ្វើសមយុទ្ធជាមួយអាមេរិក។ ក្នុងក្រសែភ្នែកក្រុងព្យុងយ៉ាង សមយុទ្ធនេះជាការត្រៀមវាយលុកទឹកដីកូរ៉េខាងជើង។
កូរ៉េខាងត្បូងបានប្រកាសច្រើនលើកច្រើនសាហើយថា នឹងមិនលុបចោលសមយុទ្ធយោធាជាមួយអាមេរិក ដែលគ្រោងធ្វើនៅចុងខែកុម្ភៈនេះទេ។ កិច្ចព្រមព្រៀងអោយមានជំនួបគ្រួសារកូរ៉េ នៅថ្ងៃពុធ៥កុម្ភៈនេះ គ្មានហេតុផលទាក់ទងសមយុទ្ធយោធាកូរ៉េខាងត្បូង-អាមេរិក
ជាផ្លូវការ ចំពោះកិច្ចព្រមព្រៀងអោយមានជំនួបគ្រួសារកូរ៉េដែលព្រាត់គ្នាក្រោយសង្គ្រាម សម្រេចបានរវាងប្រទេសបងប្អូនកូរ៉េទាំង២ នៅថ្ងៃពុធនេះ កូរ៉េខាងជើងមិនបានភ្ជាប់ហេតុផលជាមួយសមយុទ្ធយោធារវាងកូរ៉េខាងត្បូងនិងអាមេរិកនោះទេ។ កាលពីខែកញ្ញាឆ្នាំ២០១៣ កូរ៉េខាងជើងបានលុបចោលជំនួបគ្រួសារកូរ៉េ ព្រោះ ចាត់ទុកសមយុទ្ធយោធារវាងក្រុងសេអ៊ូលនិងក្រុងវ៉ាស៊ីនតោន ថាជាការត្រៀមលក្ខណៈ ចូលវាយលុកទឹកដីកូរ៉េខាងជើង។
ប៉ុន្តែ នៅពេលនេះ ក្រុងព្យុងយ៉ាងបានប្តូរជំហរខ្លួនមកវិញ ដើម្បីបង្ហាញថា ខ្លួនជាអ្នកមានបំណងល្អ ព្រមអោយមានជំនួបគ្រួសារកូរ៉េនេះ បង្ហាញថា ការផ្សះផ្សានិងឯកភាពរវាងបងប្អូនកូរ៉េទាំង២ គឺជាបំណងផ្ទាល់ចេញពីសមានចិត្តរបស់កូរ៉េខាងជើងតែម្តង។ កាលពីខែមករាមុននេះ ប្រមុខដឹកនាំកូរ៉េខាងជើងគឹម ជុងអ៊ុន បានបង្ហាញជំហរថ្មីដោយអំពាវនាវអោយមានការផ្សះផ្សា និងឯកភាពរវាងប្រទេសកូរ៉េទាំងពីរ។
កិច្ចព្រមព្រៀងថ្ងៃពុធនេះ ជាដំណឹងល្អសម្រាប់កូរ៉េខាងត្បូងដែលតែងអំពាវនាវអោយមានជំនួបគ្រួសារកូរ៉េក៏ពិតមែន តែវាជាមោទនភាពរបស់កូរ៉េខាងជើងទៅវិញទេ ដែលចង់អួតថា ខ្លួនជាអ្នកមានអំណាចសម្រេចថា តើជំនួបគ្រួសារនេះ ត្រូវធ្វើរឺមិនធ្វើ។
ទន្ទឹមនេះដែរ កូរ៉េខាងជើងបន្ទន់ឥរិយាបថ យល់ព្រមអោយមានជំនួបគ្រួសារកូរ៉េ រយៈពេល៦ថ្ងៃក្នុងខែកុម្ភៈនេះ ដើម្បីបន្ធូរបន្ថយភាពតានតឹងជាមួយក្រុងសេអ៊ូលក្នុងពេលកន្លងមក។ កន្លងមក អោយតែដល់ពេលក្រុងសេអ៊ូលធ្វើសមយុទ្ធយោធាជាមួយអាមេរិក ក្រុងព្យុងយ៉ាងតែងបង្កភាពតានតឹងក្នុងឧបទ្វីបកូរ៉េជានិច្ច។ ប៉ុន្តែ ការដែលក្រុងសេអ៊ូលនៅតែមានៈ បន្តសមយុទ្ធយោធាជាមួយអាមេរិក អាចធ្វើអោយក្រុងព្យុងយ៉ាងគិតថា ខ្លួនមិនអាចលេងធម៌ក្តៅគ្រប់ពេលវេលាបានទេ។ ប្រហែលជាមូលហេតុនេះហើយ ទើបថ្ងៃពុធនេះ កូរ៉េខាងជើងសម្រេចប្តូរជំហរមកវិញ ដោយយល់ព្រមអោយមានជំនួបគ្រួសារកូរ៉េដែលព្រាត់គ្នា ក្រោយសម័យសង្គ្រាមនេះ។
ដោយឡែក នៅពីក្រោយជំនួបគ្រួសារកូរ៉េនេះ កូរ៉េខាងជើងក៏ជាអ្នកចំណេញប្រយោជន៍ ដើម្បីជួយប្រជាជនខ្លួនផងដែរ។ ព្រោះថា កន្លងមក ក្នុងការអំពាវនាវអោយកូរ៉េខាងជើងយល់ព្រមអោយគ្រួសារកូរ៉េបានជួបជុំគ្នាឡើងវិញនេះ លោកស្រី ប៉ាក់ គុនហឺ ជាប្រធានាធិបតីកូរ៉េខាងត្បូង ក៏បានសន្យាផ្តល់ជំនួយមនុស្សធម៌បន្ថែមទៀតអោយកូរ៉េខាងជើង។ កូរ៉េខាងត្បូងជួយផ្នែកមនុស្សធម៌ដល់កូរ៉េខាងជើង តាមរយៈអង្គការអន្តរជាតិបែបយ៉ាងអង្គការយូនីសេហ្វ គិតជាទឹកប្រាក់ក្នុងឆ្នាំ២០១៣កន្លងមក គឺមានជាង៩លានអឺរ៉ូ។
ដូច្នេះ ជំនួបគ្រួសារកូរ៉េនេះ វាផ្តល់ផលចំណេញដល់ក្រុងព្យុងយ៉ាង ចៀសមិនផុត។ គួរបន្ថែមថា ដោយសារតែមហច្ឆតានុយក្លេអ៊ែរហួសដែនកំណត់របស់កូរ៉េខាងជើង សហគមន៍អន្តរជាតិបានដាក់ទណ្ឌកម្មសេដ្ឋកិច្ចធ្ងន់ធ្ងរដល់កូរ៉េខាងជើង ធ្វើអោយក្រុងព្យុងយ៉ាងពិបាករកចំណូលជួយប្រជាជនដែលកំពុងអត់ឃ្លានក្នុងស្រុក។ វិស័យសេដ្ឋកិច្ចកូរ៉េខាងជើងទន់ខ្សោយ ដោយសារតែកូរ៉េខាងជើងពង្រឹងនិងអភិវឌ្ឍន៍ផ្នែកយោធាហួសហេតុ។ ដូច្នេះ ជំនួបគ្រួសារកូរ៉េនេះ ជាយុទ្ធសាស្ត្រមួយរបស់ក្រុងព្យុងយ៉ាង ដើម្បីជំរិតទាមទារប្រយោជន៍ពីកូរ៉េខាងត្បូង។
ក្នុងការអំពាវនាវអោយមានជំនួបគ្រួសារកូរ៉េ ពីសំណាក់កូរ៉េខាងត្បូង កន្លងមក ប្រធានាធិបតីកូរ៉េខាងត្បូង ប៉ាក់ គុនហឺ មិនបានអត្ថាធិប្បាយអ្វីទាក់ទងនឹងការដែលប្រមុខដឹកនាំកូរ៉េខាងជើង បានប្រហារជីវិតឳពុកមាខ្លួន ចាង សុងថេក ដែលជាជនលំដាប់ខ្លាំងទី២ នៅកូរ៉េខាងជើងនោះទេ
កាលពីពាក់កណ្តាលខែធ្នូ ឆ្នាំ២០១៣ លោកគឹម ជុងអ៊ុន បានសម្រេចប្រហារជីវិតលោកចាង សុងថេក ជាឳពុកមាខ្លួន យោងលើមូលហេតុថា លោកចាង ជាជនក្បត់ជាតិ។ ប៉ុន្តែ ផ្នែកចារកិច្ចកូរ៉េខាងត្បូង បានផ្តល់ព័ត៌មានថា កូរ៉េខាងជើងបានសម្រេចប្រហារជីវិតលោក ចាង សុងថេក ប្រហែលដោយសារតែលោក ចាង សុងថេក ព្យាយាមគ្រប់គ្រងផ្នែកនាំចេញធ្យូងថ្មរបស់កូរ៉េខាងជើង និងចង់បានប្រយោជន៍ហួសពីអ្វីដែលគាត់ត្រូវបាន។
ប្រធានាធិបតីកូរ៉េខាងត្បូង ប៉ាក់ គុនហឺ មិនចង់បន្ថែមល្បោយក្នុងសម្លដែលផ្អូមរួចហើយនោះទេ។ លោកស្រីប៉ាក់ គុនហឺ ធ្លាប់លើកឡើងក្នុងរឿងនេះថា គេពិបាកនឹងកំណត់ជាមុននូវទំនាក់ទំនងរវាងបងប្អូនបង្កើតណាស់។ កូរ៉េខាងត្បូងមានភាពឆ្លាតវៃ មិនលូកដៃចូលកិច្ចការផ្ទៃក្នុងក្រុងព្យុងយ៉ាង ចៀសវាងបង្កភាពតានតឹងបន្ថែមទៀត ពិសេសនៅពេលដែលកងទ័ពកូរ៉េខាងត្បូងជិតធ្វើសមយុទ្ធយោធាជាមួយកងទ័ពអាមេរិកទៀតនោះ។
ប្រហែលជាការដែលក្រុងសេអ៊ូលមិនបន្ថែមភាពតានតឹង មិនលូកដៃរឿងផ្ទៃក្នុងនយោបាយកូរ៉េខាងជើងនេះហើយ ដែលសម្រួលអោយក្រុងព្យុងយ៉ាងយល់ព្រមសម្រេចកិច្ចព្រមព្រៀង ជាមួយក្រុងសេអ៊ូល អនុញ្ញាតអោយគ្រួសារកូរ៉េទាំងសងខាង បានជួបគ្នា ក្នុងខែកុម្ភៈនេះ។ ហើយកិច្ចព្រមព្រៀងនេះហើយ ជាអ្វីដែលក្រុងសេអ៊ូលចង់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ