កូរ៉េខាងជើងយល់ព្រមឲ្យមានជំនួបរវាងក្រុមគ្រួសារដែលព្រាត់ប្រាសគ្នានៅក្រោយសង្រ្គាម
នៅថ្ងៃចន្ទ ទី៣ កុម្ភៈនេះ កូរ៉េខាងជើងបានយល់ព្រមឲ្យមានការរៀបចំជំនួបរវាងក្រុមគ្រួសារកូរ៉េដែលបានព្រាត់ប្រាសគ្នានៅក្នុងក្រោយសង្រ្គាមកូរ៉េកាលពី ៦០ឆ្នំាមុន នេះបើយោងតាមការប្រកាសរបស់ក្រសួងបង្រួបបង្រួមកូរ៉េនៅកូរ៉េខាងជើង។ សូមជម្រាបជូនថា ផែនការរៀបចំជំនួបរវាងក្រុមគ្រួសារកូរ៉េដែលបែកបាក់គ្នាក្រោយសង្រ្គាមត្រូវបានគ្រោងទុកតំាងពីខែកញ្ញា ឆ្នំា ២០១៣ មកម្ល៉េះ តែត្រូវបានរបបក្រុងព្យុងយ៉ាងលប់ចោលវិញនៅនាទីចុងក្រោយ។
ចុះផ្សាយនៅថ្ងៃ៖
ស្តាប់ - ០២:១៩
នៅទីបំផុត កូរ៉េខាងជើងបានព្រមព្រៀងឲ្យមានការរៀបចំជំនួបរវាងក្រុមគ្រួសារកូរ៉េដែលបានព្រាត់ប្រាសគ្នាតំាងពីជាង ៦០ឆ្នំាមកហើយ។ តាមគម្រោង ជំនួបនេះនឹងត្រូវធ្វើឡើងនៅថ្ងៃពុធ ទី៥កុម្ភៈនៅក្នុងស្រុកកូរ៉េខាងជើងជាប់ព្រំដែន Panmunjom ដែលខ័ណ្ឌចែកកូរ៉េជាពីរ។ គឺនៅក្នុងស្រុក Panmunjom នោះឯងដែលបងប្អូនបង្កើតគូសត្រូវទំាងពីរបានចុះហត្ថលេខាលើយុទ្ធសន្តិភាពបញ្ចប់សង្រ្គាមរវាងគ្នាកាលពីឆ្នំា ១៩៥៣។ អ្នកនំាពាក្យក្រសួងបង្រួបបង្រួមកូរ៉េនៅកូរ៉េខាងត្បូងបានប្រកាសឲ្យដឹងនៅក្នុងសន្និសីទកាសែតថា ភាគីទំាងពីរបានផ្តើមជជែកអំពីរបៀបវារៈនៃការរៀបចំជំនួបដែលគ្រោងធ្វើជាផ្លូវការនៅថ្ងៃពុធ ទី៥កុម្ភៈ។
គួរជម្រាបជូនថា គម្រោងរៀបចំឲ្យមានជំនួបរវាងក្រុមគ្រួសារកូរ៉េបែកបាក់គ្នានៅក្រោយសង្រ្គាមកូរ៉េពីឆ្នំា ១៩៥០ ដល់ឆ្នំា ១៩៥៣ ត្រូវបានគេគ្រោងធ្វើម្តងហើយកាលពីខែកញ្ញាឆ្នំា ២០១៣ តែត្រូវបានរដ្ឋាភិបាលក្រុងព្យុងយ៉ាងលុបចោលនៅនាទីចុងក្រោយ។ កាលពីឆ្នំា ២០១០ ក៏ធ្លាប់បានរៀបចំឲ្យមានការជួបជុំរវាងក្រុមគ្រួសារកូរ៉េបែកបាក់គ្នារបៀបនេះម្តងហើយ ក្រោមការជួយឧបត្ថម្ភពីកាកបាទក្រហម។ ជំនួបកាលណោះបានអនុញ្ញាតឲ្យប្រជាជនកូរ៉េចំនួន ១ ៧០០០នាក់អាចឱបរឹតឱពុកម្តាយ ប្តីប្រពន្ធ កូនចៅ ចៅទួតដែលមិនដែលបានឃើញមុខគ្នាតំាងពីជាង ៦០ឆ្នំាមកហើយ។
តំាងពីក្រោយសង្រ្គាមមក មានប្រជាជនកូរ៉េរាប់សិបលាននាក់បានព្រាត់ប្រាសសាច់ញាតិ និងដែលភាគច្រើនបានស្លាប់ ដោយមិនដែលបានជួបមុខគ្នាម្តងឡើយ។ បច្ចុប្បន្ននេះ មានប្រជាជនកូរ៉េខាងត្បូងជាង ៧០ ០០០នាក់ ក្នុងនោះមានជាងពាក់កណ្តាលមានអាយុលើសពី ៨០ឆ្នំាកំពុងរង់ចំាជួបក្រុមគ្រួសាររបស់ពួកគេរស់នៅប៉ែកខាងជើងយ៉ាងអន្ទះសារ។
យ៉ាងណាក៏ដោយ ក្រុមអ្នកតាមដានស្ថានការណ៍នៅឧបទ្វីបកូរ៉េ ក៏ដូចជាប្រជាជនកូរ៉េទូទៅបានសម្តែងការបារម្ភរបស់ខ្លួន ខ្លាចតែថ្នាក់ដឹកនំាកូរ៉េខាងជើងលុបចោលជំនួបនេះវិញនៅនាទីចុងក្រោយដូចដែលខ្លួនបានធ្វើកាលពីខែកញ្ញា ឆ្នំា ២០១៣។ ការលុបចោលកាលណោះមកពីក្រុងព្យុងយ៉ាងមិនសប្បាយចិត្តនឹងទង្វើរបស់ក្រុងសេអ៊ូលដែលកំពុងត្រៀមធ្វើសមយុទ្ធជាមួយអាមេរិក។ សមយុទ្ធដែលព្យុងយ៉ាងចាត់ទុកជាការត្រៀមជើងព្រួលវាយលុកចូលក្នុងទឹកដីកូរ៉េខាងជើង។ តែក្រុងសេអ៊ូលបានរម្លឹកជាថ្មីថា ទោះជាយ៉ាងណាក៏ដោយ សមយុទ្ធនឹងត្រូវរៀបចំធ្វើដូចដែលបានគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ