ប៉ាគីស្ថាន៖ការប៉ះទង្គិចគ្នារវាងសកម្មជនបក្សប្រឆាំងនិងប៉ូលីសនៅអ៊ីស្លាម៉ាបាត
នៅប៉ាគីស្ថាន ខណៈពេលដែលការកេណ្ឌប្រមែប្រមូលផ្តុំគ្នាដើម្បីប្រឆាំងទល់នឹងនាយករដ្ឋមន្ត្រីប៉ាគីស្ថាន Nawaz Sharif កាន់តែខិតជិតមកដល់ កាលពីថ្ងៃសុក្រម្សិលមិញ មានការប៉ះទង្គិចគ្នារវាងសកម្មជនបក្សប្រឆាំង និងកម្លាំងប៉ូលីសនៅក្បែរក្រុងអ៊ីស្លាម៉ាបាត។ នាឱកាសនោះ ប៉ូលីសបានចាប់ខ្លួនអ្នកប្រឆាំងរាប់សិបនាក់។
ចុះផ្សាយនៅថ្ងៃ៖
ស្តាប់ - ០២:១១
នៅក្រុងRawalpindi ដែលជាទីប្រជុំជន នៅជាប់រដ្ឋធានី ក្រុមប៉ូលីសប៉ាគីស្ថាន បានបាញ់ឧស្ម័នបង្ហូរទឹកភ្នែកនិងចាប់ខ្លួនពួកបាតុករដែលបាននាំគ្នាគប់ចោលដុំថ្មលើប៉ូលីស។
ក្រុមសកម្មជនរបស់បក្សប្រឆាំងសំខាន់នៅក្នុងប្រទេស PTI របស់លោកImran Khan ដែលជាអតីតកីឡាករជើងឯកខាងកីឡាCricket បាននាំគ្នាធ្វើការប្រឆាំងទល់នឹងការចាប់ខ្លួនសមាជិកផ្សេងៗទៀតនៃបក្សប្រឆាំង នៅថ្ងៃមុនបន្ទាប់ពីសេចក្តីសម្រេចចិត្តរបស់តុលាការដែលហាមមិនអោយមានការកែណ្ឌប្រមូលផ្តុំគ្នានៅក្នុងរដ្ឋធានី ក្នុងរយៈពេលពីរខែទៅមុខ។
អាជ្ញាធរប៉ាគីស្ថាន បានដាក់conteneurs ដឹកជញ្ជូនធ្វើជារបាំងនៅលើដងផ្លូវនានា ដើម្បីធ្វើជាឧបស័គ្គក្នុងការធ្វើចរាចរនៅតាមផ្លូវថ្នល់សំខាន់ៗដែលតភ្ជាប់ក្រុង Rawalpindi ទៅកាន់ទីក្រុង Islamabad ។ នៅទីនោះដែរ លោក Imran Khan ប្រធានបក្សប្រឆាំង បានអំពាវនាវឲ្យមានការកែណ្ឌគ្នីគ្នាជាថ្មីទៀត នៅថ្ងៃទី២វិច្ឆិកាខាងមុខ។
សូមបញ្ជាក់ថា បក្ស PTI នេះ ធ្លាប់បានធ្វើការបិទផ្លូវក្នុងរដ្ឋធានីរួចម្តងមកហើយចំនួន៤ខែកាលពីឆ្នាំ២០១៤ ដើម្បីទាមទារជាអាទិ៍ឲ្យនាយករដ្ឋមន្ត្រីប៉ាគីស្ថាន ធ្វើការពន្យល់ប្រាប់ពីទ្រព្យសម្បត្តិដែលកាន់កាប់ដោយក្រុមគ្រួសាររបស់លោកនៅឯក្រៅប្រទេស។
ចំនួនសកម្មជនបក្សប្រឆាំងដែលត្រូវបានប៉ូលីសចាប់ខ្លួនកាលពីយប់ថ្ងៃព្រហស្បតិ៍មុនមានគ្នាចំនួន៤៣នាក់និងកំពុងស្ថិតនៅក្នុងការឃុំឃាំងនៅឡើយ តែអ្នកផ្សេងៗទៀតត្រូវបានប៉ូលីសដោះលែង។
គួរកត់សម្គាល់ដែរថា នៅពេលនេះ ប៉ូលីសប៉ាគីស្ថានមួយកងធំ បានធ្វើការឡោមព័ទ្ធផ្ទះរបស់មេបក្សប្រឆាំងដែលស្ថិតនៅជិតទីក្រុងអ៊ីស្លាម៉ាបាតនិងហាមឃាត់មិនឲ្យចេញពីផ្ទះរបស់គាត់ដែរ។
ចំណែកបក្សព័ន្ធគាំទ្រលោក Imran Khan វិញដែលមានគ្នាចំនួនរាប់សិបនាក់ បានប្រមូលផ្តុំគ្នានៅពីមុខផ្ទះរបស់លោកនាយករដ្ឋមន្ត្រីប៉ាគីស្ថាននិងបានទាមទារឲ្យលោក Sharif លាលែងចេញពីមុខដំណែង។
ចំណែកខាងលោក Imran Khan វិញ លោកនៅតែរក្សាទុកជំហររបស់លោក ក្នុងការអំពាវនាវឲ្យមានការជួបជុំគ្នាដ៏សំខាន់មួយទៀតនៅថ្ងៃបន្ទាប់ បើទោះបីជាមានការហាមប្រាមពីអាជ្ញាធរប៉ាគីស្ថានមិនឲ្យធ្វើបាតុកម្មក៏ដោយក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ