សភាប៉ាគីស្ថានអនុម័តច្បាប់ប្រឆាំងអំពើឃាតកម្ម”ដើម្បីកិត្តិយស”គ្រួសារ
ថ្ងៃព្រហស្បតិ៍ម្សិលមិញ សភាប៉ាគីស្ថានបានអនុម័តច្បាប់ដាក់ទោសជនឧក្រិដ្ឋដែលសម្លាប់មនុស្សដើម្បីកិត្តិយសគ្រួសារ ជាច្បាប់ដែលសង្គមប៉ាគីស្ថាននិងអង្គការសិទ្ធិមនុស្សរង់ចាំយូរមកហើយ។ រៀងរាល់ឆ្នាំ ឧក្រិដ្ឋកម្មដើម្បីកិត្តិយសនេះ បានសម្លាប់ស្ត្រីប៉ាគីស្ថានរាប់រយនាក់។ ម្សិលមិញ សភាប៉ាគីស្ថានក៏បានអនុម័តច្បាប់ពង្រឹងការដាក់ទោសករណីរំលោភភេទមួយចំនួនផងដែរ ដោយបានបន្ថែមទោសធ្ងន់ធ្ងរដល់ជនល្មើស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ច្បាប់ដាក់ទោសជនល្មើសដែលសម្លាប់ស្ត្រី ក្រោមលេសថា ដើម្បីកិត្តិយសគ្រួសារ ត្រូវបានសភាប៉ាគិស្ថានសម្រេចអនុម័តជាឯកច្ឆ័ន្ទ ថ្ងៃព្រហស្បតិ៍ម្សិលមិញ។ ចាប់ពីពេលនេះទៅ ជនល្មើសដែលសម្លាប់ស្ត្រីប៉ាគីស្ថាន ក្រោមលេសថា ដើម្បីកិត្តិយសគ្រួសារ នឹងត្រូវជាប់គុកមួយជីវិត។ នាយករដ្ឋមន្ត្រីណាវ៉ា ស្ហារីហ្វ បានអបអរការអនុម័តច្បាប់នេះ និងអះអាងថា ច្បាប់នេះនឹងត្រូវអនុវត្តនៅទូទាំងប្រទេស។
ការអនុម័តច្បាប់ធ្វើឡើង ៣ខែក្រោយមានឃាតកម្មលើតារាស្រីប៉ាគីស្ថានក្នុងបណ្តាញសង្គមម្នាក់ ឈ្មោះថា Qandeel Baloch កាន់ឌែល បាឡុច។ នារីរូបនេះ ស្លៀកពាក់ស៊ីវិល័យ និងមានរូបរាងស្រដៀងនឹងតារាអាមេរិក គីម កាដាស្ហៀន។ បងប្រុសនារីរូបនេះ បានច្របាច់កសម្លាប់នាង កាលពី ខែកក្កដា ក្រោមមូលហេតុថា ដើម្បីកិត្តិយសក្រុមគ្រួសារគាត់ ព្រោះប្អូនស្រីគាត់បានរងការរិះគន់ពីភាពហ៊ឺហា ស៊ីវិល័យនេះ។
ក្នុងមួយឆ្នាំៗ ឃាតកម្មដើម្បីកិត្តិយសគ្រួសារ បានសម្លាប់ស្ត្រីប៉ាគីស្ថានរាប់រយនាក់។ កន្លងមក ច្បាប់បានលើកលែងទោសដល់ឧក្រិដ្ឋជន ប្រសិនបើគ្រួសារឧក្រិដ្ឋជនព្រមលើកលែងទោសរូបគេ ហើយព្រមបង់ប្រាក់កាសមួយចំនួន។ ច្បាប់អនុម័តម្សិលមិញនេះ តំរូវអោយតុលាការដាក់ទោសជនល្មើសអោយជាប់ពន្ធនាគារ២៥ឆ្នាំ បើទោះជាជនល្មើសបានទទួលការលើកលែងទោសពីគ្រួសារក៏ដោយ។
ឆ្នាំ២០១៦នេះ ភាពយន្តឯកសារខ្នាតខ្លីមួយ របស់ប៉ាគីស្ថាន មានចំណងជើងថា « A Girl in the River » លើកឡើងពីឧក្រិដ្ឋកម្មដើម្បីកិត្តិយសគ្រួសារ បានទទួលពានអូស្កា។ គួររំលឹកដែរថា កាលពីខែកុម្ភៈ នាយករដ្ឋមន្ត្រីណាវ៉ា ស្ហារីហ្វ បានជួបស្ត្រីផលិតករភាពយន្តមួយនេះ ហើយបានសន្យានឹងគាត់ថា លោកនឹងដោះស្រាយបិទបញ្ចប់បញ្ហាបែបនេះ ក្នុងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ