ឥណ្ឌាបណ្តេញមន្ត្រីទូតប៉ាគីស្ថានម្នាក់ រងការចោទប្រកាន់ពីបទចារកម្ម អោយចេញពីទឹកដីឥណ្ឌា
ក្រសួងការបរទេសឥណ្ឌាបានប្រកាស នៅថ្ងៃព្រហស្បតិ៍នេះ ថាបណ្តេញបុគ្គលិកបម្រើការស្ថានទូតប៉ាគីស្ថានមួយរូប អោយចេញពីទឹកដីឥណ្ឌា។ មន្ត្រីទូតរូបនោះរងការចោទប្រកាន់ថា បានធ្វើសកម្មភាពស៊ើបការណ៍សំងាត់នៅឥណ្ឌា។ គាត់បានទទួលលិខិតបង្គាប់ មានពេល៤៨ម៉ោង ដើម្បីចាកចេញពីឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមអាជ្ញាធរឥណ្ឌា បុគ្គលិកបម្រើការស្ថានទូតប៉ាគីស្ថានដែលត្រូវឥណ្ឌាបណ្តេញចេញពីទឹកដីឥណ្ឌានោះ មានឈ្មោះថា ម៉ុ អាក្ខតា Mohd Akhtar បម្រើការផ្នែកសេវាទិដ្ឋាការ នៅស្ថានទូត។ លោក អាក្ខតា ត្រូវឥណ្ឌាចោទប្រកាន់ថា បានលួចស៊ើបការណ៍ក្នុងទឹកដីឥណ្ឌា។ កងកម្លាំងឥណ្ឌាចាប់ខ្លួន គាត់ ថ្ងៃពុធម្សិលមិញ។ ផ្អែកលើព័ត៌មានយកជាការបាន ៦ខែចុងក្រោយនេះ ប៉ូលិសបានចោទ អាក្ខតា ថាជាអ្នកបម្រើការអោយផ្នែកចារកិច្ចយោធាប៉ាគីស្ថាន។
អាជ្ញាធរឥណ្ឌារកឃើញឯកសារជាច្រើនច្បាប់ នៅនឹងខ្លួនគាត់ ជាឯកសារទាក់ទងការពង្រាយកងទ័ពឥណ្ឌានៅតាមព្រំដែន។ ក្រសួងការបរទេសឥណ្ឌាបានកោះហៅឯកអគ្គរដ្ឋទូតប៉ាគិស្ថាន ប្រាប់ពីរឿងបណ្តេញបុគ្គលិកទូតនេះ។ ប៉ាគីស្ថានបានតវ៉ាទៅនឹងការចាប់ឃុំខ្លួនបុគ្គលិកស្ថានទូតខ្លួន។ ប៉ាគីស្ថានលើកឡើងថា ឥណ្ឌាបានរំលោភលើអនុសញ្ញាស្តីពីការការពារបុគ្គលិកផ្នែកការទូត។
ឥណ្ឌានិងប៉ាគីស្ថានជាមហាអំណាចនុយក្លេអ៊ែរនៅអាស៊ីខាងត្បូង។ ការប៉ះទង្គិចទៅលើស្ថានទូតប៉ាគីស្ថាន កើតឡើងចំពេលប្រទេសទាំង២កំពុងតានតឹងនឹងគ្នា ជុំវិញតំបន់ជម្លោះកាស្មៀរ។ ទំនាក់ទំនងរវាងឥណ្ឌានិងប៉ាគីស្ថានបានធ្លាក់ដុនដាបកាន់តែខ្លាំង ចាប់ពីពេលបន្ទាយទាហានឥណ្ឌានៅកាស្មៀរ រងការវាយប្រហារ កាលពីខែកញ្ញាមុននេះ សម្លាប់ទាហានឥណ្ឌា១៨នាក់។ ឥណ្ឌាបានទំលាក់កំហុសការវាយប្រហារនេះទៅលើក្រុមជីហាត មួយក្រុម ដែលមានមូលដ្ឋាននៅប៉ាគីស្ថាន។ នាយករដ្ឋមន្ត្រីឥណ្ឌាចាត់ទុករហូតថា ប៉ាគីស្ថានជាប្រទេសនាំភេរវកម្មចេញទៅគ្រប់ទិសទីទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ