ក្រុមតាលីបង់សម្លាប់ទាហានអាហ្វហ្កានីស្ថាន២០នាក់ និងចាប់៧នាក់ទៀតធ្វើចំណាប់ខ្មាំង
នៅអាហ្វហ្កានីស្ថាន ថ្ងៃអាទិត្យនេះ ក្រុមឧទ្ទាមតាលីបង់បានវាយប្រហារទីតាំងកងទ័ពមួយកន្លែង ជិតព្រំប្រទល់ជាមួយប៉ាគីស្ថាន សម្លាប់ទាហានអាហ្វហ្កានីស្ថាន២០នាក់។ ក្រុមតាលីបង់ក៏បានចាប់ទាហានអាហ្វហ្កានីស្ថាន៧នាក់ទៀត ធ្វើជាចំណាប់ខ្មាំងផងដែរ។ គិតច្រើនខែមកនេះ នេះជាការវាយប្រហារសម្លាប់មនុស្សច្រើនបំផុត នៅអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ការវាយប្រហាររបស់ក្រុមឧទ្ទាមតាលីបង់ សម្លាប់ទាហានអាហ្វហ្កានីស្ថាន ថ្ងៃអាទិត្យនេះ បានកើតឡើង នៅទីតាំងទាហាន សង្កាត់ ហ្កាហ្ស៊ីយ៉ាបាត Ghaziabad ក្នុងខេត្តគូណាភាគខាងកើត ជាប់ព្រំប្រទល់ជាមួយប៉ាគីស្ថាន។ យោងតាមអភិបាលខេត្តគូណា ក្រុមតាលីបង់អាចចូលវាយលុកទីតាំងទាហាននេះបាន គឺដោយសារមានការឃុបខិតជាមួយទាហានមួយចំនួន។ កងកម្លាំងបន្ថែមអាហ្វហ្កានីស្ថាន ត្រូវបានបញ្ជូនទៅកន្លែងកើតហេតុ ដើម្បីធ្វើប្រតិបត្តិការរំដោះយកទាហានដែលក្រុមតាលីបង់ ចាប់ធ្វើជាចំណាប់ខ្មាំងមកវិញ។
ការវាយប្រហារនេះ ធ្វើអោយប្រធានាធិបតីហាមីដ កាហ្សៃ លុបចោលដំណើរទស្សនកិច្ចរបស់លោក ទៅប្រទេសស្រីលង្កា។ ក្នុងពេលទាហានអូតង់ជិតដកចេញអស់ពីអាហ្វហ្កានីស្ថាន នៅចុងឆ្នាំ២០១៤ខាងមុខ ការវាយប្រហាររបស់ក្រុមតាលីបង់ ថ្ងៃអាទិត្យនេះ រឹតតែធ្វើអោយគេព្រួយបារម្ភថា អាហ្វហ្កានីស្ថានអាចធ្លាក់ចូលក្នុងអំពើហិង្សាសាជាថ្មី ពិសេសពេលអាហ្វហ្កានីស្ថានត្រូវរៀបចំការបោះឆ្នោត នៅថ្ងៃ៥មេសា ខាងមុខនេះទៀត។ សហរដ្ឋអាមេរិកចង់បន្តវត្តមានកងទ័ពខ្លួននៅអាហ្វហ្កានីស្ថាន ក្រោយឆ្នាំ២០១៤ ប៉ុន្តែ ប្រធានាធិបតីកាហ្សៃបានបដិសេធមិនចុះហត្ថលេខាលើកិច្ចព្រមព្រៀងសន្តិសុខទ្វេភាគីជាមួយអាមេរិក ទាក់ទងនឹងវត្តមានអាមេរិកក្រោយឆ្នាំ២០១៤ទេ។
បន្ទាប់ពីការវាយប្រហារពីតាលីបង់ នៅថ្ងៃអាទិត្យនេះ ប្រធានាធិបតីកាហ្សៃបានបរិហារប៉ាគីស្ថានថា មិនអើពើនឹងកំចាត់ជម្រកក្រុមភេរវជន។ លោកកាហ្សៃបានជំរុញប៉ាគីស្ថាន ជាថ្មីម្តងទៀត អោយគាំទ្រអាហ្វហ្កានីស្ថាន ក្នុងការកំចាត់ក្រុមឧទ្ទាមតាលីបង់។ អាហ្វហ្កានីស្ថានតែងចោទប៉ាគីស្ថាន ថាបានផ្តល់ជម្រកអោយក្រុមតាលីបង់ នៅតាមព្រំដែនជាប់ជាមួយអាហ្វហ្កានីស្ថាន។
ទោះជាប៉ាគីស្ថានសន្យារកដំណោះស្រាយសន្តិភាពដែលបញ្ចូលគ្រប់ភាគីបះបោរ ភ្នាក់ងារចារកិច្ចប៉ាគីស្ថានមួយចំនួន នៅតែរងការចោទប្រកាន់ថា បានធ្វើគ្រប់សកម្មភាពដើម្បីត្រួតចលនាតាលីបង់អាហ្វហ្កានីស្ថាន ដើម្បីជាប្រយោជន៍ខ្លួននៅអាហ្វហ្កានីស្ថាន។ ដោយឡែក ការចរចារកសន្តិភាព ជាការចរចាផ្ទាល់ជាមួយក្រុមតាលីបង់ ដែលមានវត្តមានអាមេរិកដែរនោះ នៅមិនទាន់ផ្តល់លទ្ធផលអ្វីជាក់ស្តែងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ