សំរាប់បេសកជនអាហ្វ្រិក សភាពការណ៍នៅកូតឌីវ័រ"ធ្ងន់ធ្ងរ"
លោកអតីតប្រធានាធិបតីអាហ្វ្រិកខាងត្បូង Thabo Mbeki ដែលត្រូវបានសហភាពអាហ្វ្រិកបញ្ជូនមកកាន់ទីក្រុងAbidjan ដើម្បីរកដំណោះស្រាយដោយសន្តិវិធីឱ្យវិបត្តិនៅកូតឌីវ័រ យល់ឃើញថាសភាពការណ៍” ធ្ងន់ធ្ងរណាស់ “។ សព្វថ្ងៃ ប្រទេសមានប្រធានាធិបតីពីរនិងនាយករដ្ឋមន្ត្រីក៏ពីររូបដែរ។ ដើម្បីចេញពីសភាពទ័លច្រកនេះ អាចមានដំណោះស្រាយដូចតទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
សាធារណរដ្ឋកូតឌីវ័រនៃអាហ្វ្រិកខាងលិចប្រកបដោយបណ្តាជនជិត២០លាននាក់ស្ថិតក្នុងសភាពជ្រួលច្របល់ ចាប់តាំងពីលោកឡូរ៉ង់ បាក់បូ( Laurent Gbagbo )ត្រូវបានប្រកាសកាលពីថ្ងៃសុក្រ៣ធ្នូជាអ្នកឈ្នះឆ្នោតប្រធានាធិបតី ដោយក្រុមប្រឹក្សាធម្មនុញ្ញដែលមិនទុកជាបានការ លទ្ធផលឆ្នោត៥៤,១%របស់គណៈកម្មការឆ្នោតឯករាជ្យដែលប្រកាសគូប្រជែង លោកអាឡាសាន វាត់តារ៉ា(Alassane Ouattara)ជាអ្នកឈ្នះឆ្នោត។ដើម្បីចេញពីសភាពទ័លច្រកបច្ចុប្បន្ននេះ អាចមានដំណោះស្រាយដូចតទៅនេះ។
ទី១-តើអាចមានការសម្របសម្រួលគ្នាឬទេ? ទស្សនវិស័យសុទិដ្ឋិនិយមនេះទំនងជាពុំអាចកើតទៅរួចទេ ដរាបណាគូប្រជែងទាំងពីរនៅតែប្រកាន់ខ្ជាប់គោលជំហររបស់ខ្លួន។ប៉ុន្តែ វាប្រហែលជាច្រកចេញដោយសន្តិវិធីតែមួយគត់សំរាប់អតីតដែនដីអាណានិគមបារាំងនេះម្យ៉ាងទៀត វាត្រូវស្មុគស្មាញដោយការទទួលស្គាល់សឹងតែទាំងស្រុងដោយសហគមន៍អន្តរជាតិជ័យជំនះឆ្នោតរបស់លោកវាត់តារ៉ាជាអតីតអគ្គនាយករងនៃមូលនិធិរូបិយវត្ថុអន្តរជាតិ( FMI )។
ទី២-តើតាមរយៈបាតុកម្មមហាជនឬ? លោកបាក់បូនៅតែមានប្រជាប្រិយភាព នៅទីក្រុងAbidjanជាទីដែលគាត់បានសន្លឹកឆ្នោតគាំទ្រគាត់ភាគច្រើន។ប៉ុន្តែ ពិតជាមានគ្រោះប៉ះទង្គិចគ្នាបង្ហូរឈាមដាបរវាងបក្សព័ន្ធនៃគូប្រជែងទាំងពីរ។ការនេះអាចប្រែក្លាយទៅជាហិង្សារវាងសហគមន៍ ជាអាទិ៍នៅខាងលិចប្រទេសដែលជាឃ្លាំងរំសេវជាតិពន្ធុពិតប្រាកដ។
ទី៣-តើវិបត្តិអាចនឹងអូសបន្លាយពេលយូរតទៅទៀតឬ? វិបត្តិដែលកើតចេញពីឩទ្ទាមកម្មខកខានពុំបានសម្រេចរបស់ពួកអ្នកនៅភាគខាងជើងប្រទេស នៅឆ្នាំ២០០២និង២០០៣ប្រឆាំងនឹងលោកបាក់បូដែលបានបណ្តាលឱ្យពុះចែកប្រទេសជាពីរភាគ អាចនឹងអូសបន្លាយពេលយូរតទៅទៀត។ភាគីម្ខាងៗមានប្រយោជន៍រៀងៗខ្លួន។
ទី៤-តើអាចមានការវិលត្រឡប់ទៅរកសង្គ្រាមទាំងស្រុងវិញឬទេ? ការប្រជែងគ្នានៅឱកាសបោះឆ្នោតវគ្គទី២ កាលពីថ្ងៃ២៨វិច្ឆិកា បានធ្វើឱ្យមានភាពតានតឹងឡើងវិញរវាងពួកអ្នកនៅភាគខាងជើងនិងភាគខាងត្បូងប្រទេស។មេពួកឩទ្ទាមឈ្មោះChérif Ousmaneបានព្រមានប្រាប់ជាមុនថា គាត់នឹងពុំឈរឱបដៃ នៅស្ងៀមនៅចំពោះមុខការរក្សាទុកលោកបាក់បូឱ្យកាន់រដ្ឋអំណាចតទៅទៀតនោះទេ។ការនេះគឺជាដំណោះស្រាយដ៏អាក្រក់បំផុតសំរាប់ប្រទេសជិតខាងនឹងកូតឌីវ័រដែលគ្មានអារម្មណ៍ត្រៀមខ្លួននឹងទទួលការរត់ភៀសខ្លួនម្តងទៀតរបស់បណ្តាជនស៊ីវិលនោះទេ។
លោកប្រធានាធិបតីបារាំង Nicolas Sarkozy នៅឱកាសសន្និសីទសារព័ត៌មាន នៅទីក្រុងNew Delhi នៅថ្ងៃចន្ទ៦ធ្នូនេះ បានអំពាវនាវជាថ្មីម្តងទៀតលោកឡូរ៉ង់ បាក់បូ ឱ្យចាកចេញពីអំណាច ឱ្យគោរពឆន្ទៈរបស់ប្រជាជនកូតឌីវ័រផង បន្ទាប់ពីការជាប់ឆ្នោតរបស់លោកអាឡាសាន វាត់តារ៉ាដែលត្រូវទទួលស្គាល់ដោយសហគមន៍អន្តរជាតិទាំងមូលនិងគ្រប់ប្រទេសជិតខាងនឹងកូតឌីវ័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ