នាយករដ្ឋមន្រ្តី របស់ Ouattara ទទូចឲ្យអ.ស.ប ប្រើកម្លាំងបណ្តេញលោក បាក់បូ ពីតំណែង
បើទោះបីជាមានការដាក់គំនាប និងទណ្ឌកម្មជាច្រើន ពីសណាក់សហគមន៍អន្តរជាតិ ក៏ដោយ លោក ប្រធានាធិបតីកូតឌីវ័រផុតអាណត្តិ បាក់បូនៅតែក្រាញននាលលើកៅអី មិនស្របច្បាប់របស់ខ្លួន។ ការអត់ធ្មត់របស់ក្រុមលោក Ouattara ប្រធាធិបតីជាប់ឆ្នោតថ្មី លែងមានទៀតហើយ។ លោក Guillaume SOROដែលជានាយករដ្ឋមន្ត្រីរបស់លោក Ouattara អះអាងថា វាដល់ពេលហើយដែលត្រូវប្រើប្រាស់កម្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ុង ច័ន្ទសោភា
ជំរើសតែមួយគត់ដែលធ្វើឲ្យលោកបាក់បូ ចេញពីកៅអីប្រធានាធិបតីនោះ គឺការប្រើប្រាស់កម្លាំងបាយ។ សំរាប់លោក SORO នាយករដ្ឋមន្ត្រីរបស់លោក Ouattara ប្រធានាធិបតីជាប់ឆ្នោតថ្មី ការចរចាដោយមាត់វាគ្មានប្រយោជន៍ទៀតឡើយ។ ដូច្នេះកាលពីថ្ងៃពុធម្សិលមិញ នាយករដ្ឋមន្រ្តីស្របច្បាប់របស់ កូតឌីវ័ររូបនេះ បានស្នើឲ្យអសប និងសហគមន៍អឺរ៉ុប ប្តូរយុទ្ធសាស្រ្តមកប្រើមធ្យោបាយកម្លាំងវិញ។
មើលទៅគូប្រជែងទាំងពីរ មិនព្រមបន្ធូរបន្ថយដៃឲ្យគ្នាទៅវិញទៅមកនោះទេ។ នៅថ្ងៃព្រហស្បតិ៍នេះទៀត លោក SORO បានសុំឲ្យតុលាការព្រហ្មទណ្ឌអន្តរជាតិហៅកាត់ថាCPI ចុះមកធ្វើការផ្លូវច្បាប់មួយចំនួននៅក្នុងប្រទេសរបស់ខ្លួន។ លោកចង់ឲ្យអ្នកដែលប្រព្រឹត្តអំពើខុសច្បាប់កន្លងមក ត្រូវបញ្ជូនទៅតុលាការ ឡាអេ។ និយាយឲ្យចំគឺសំដៅទៅលើលោកបាក់បូ និងបក្សពួករបស់គាត់។
“យើងសង្ឃឹមថាសហគមន៍អន្តរជាតិមិនចំណាយពេលយូរពេកទេ ទម្រាំឲ្យដឹងថាកន្លែងលោកដែលលោកបាក់បូគួរតែនៅនោះមិនមែនជាវិមាន ប្រធានាធិបតីទេ គឺតុលាការព្រហ្មទណ្ឌអន្តរជាតិទីក្រុងឡាអេឯណោះវិញ” នេះជាសំដីរបស់លោក SOROដែលដកស្រង់ដោយកាសែតបារាំង Libération។
ថ្មីៗនេះ សហភាពអឺរ៉ុប បានដាក់គំនាបឲ្យលោក បាក់បូចេញពីតំណែងជាប្រញាប់។ ការហាមឃាត់មិនឲ្យប្រធានាធិបតីផុតអាណត្តិរូបនេះព្រមទាំងភរិយានិង អ្នកជំនិត១៨នាក់ទៀតធ្វើដំណើរក្នុងទឹកដីសហភាពអឺរ៉ុបក៏បានចូលជាធរមាន រួចហើយកាលពីថ្ងៃពុធម្សិលមិញ។
ក៏ប៉ុន្តែលោកបាក់បូ ហាក់ដូចជាមិនចុះញ៉មចំពោះទណ្ឌកម្មនេះឡើយ។ គួររំលឹកដែរថា ចាប់តាំងពីការបោះឆ្នោតប្រធានាធិបតីថ្មីកាលពីខែវិច្ឆិកាកន្លងទៅ ប្រទេសកូតឌីវ័រ បានធ្លាក់ចូលក្នុងវិបត្តិនយោបាយដ៏ធ្ងន់ធ្ងរ ដោយសារតែលោកបាក់បូមិនព្រមប្រគល់តំណែងទៅឲ្យលោក Ouattaraដែលបានជាប់ឆ្នោតដោយស្របច្បាប់និងទទួលស្គាល់ពីសហគមន៍ អន្តរជាតិ។ ក្រោយពីលទ្ធផលបោះឆ្នោត អំពើហិង្សាដ៏ឃោរឃៅបានផ្ទុះឡើង បានធ្វើឲ្យមនុស្សយ៉ាងហោចណាស់ ១៧៣ នាក់បានស្លាប់ បើតាមរបាយការណ៍របស់អ.ស.ប ជាតិនៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ